Yesu onuuluulela niphwanaphwaniho nawe vooloca sa ovekela, nave ola tahi pahiru muchaka onalaleyeiye variyari va orummwa awe. Vaava aapakeiye sootikhiniha o Kalileya, Yesu aahihoolela wiiciwa wawi aakumiha masololo ni owerya wa mwene a masololo. Nlelo wiiciwa wuuwu onnakhumelela o Yuteya wanaawiili.

Vaava Yesu onakumiheiye nsololo mwa mulopwana mmoha nenlo naamweeriha ohiloca achu annatikhiniheya. Nyenya tahi yaawo anamwiica. Ale anamwiica annaruuha wiica omohamoha: “Ni Beelzibuli mutokwene a masololo, anakumiha masololo.” (Luka 11:15, Nlakano Nahihano) Akina, yaavyaka onamoona mukina ntoko yawooniherya ya Yesu annamveka eneneeryo ya wirimu.

Asuwelaka wi awo aneererya omweeha, Yesu onnawaakhula yaawo ntoko enreiye ni ale yaamwiica o Kalileya. Owo onnaloca wi omwene onakawanyeya mukhataaya ti woowoka, alocaka: “Vanotho satana ikawanya mukhateiye, omwene awe okhala oni were hai?” Voocharela Yesu onnaaleela mookhwakwaleya: “Vano kakumihaka [masololo] ni ikuru sa Muluku, omwene wa Muluku wophiya wa nyuwo.”—Luka 11:18-20.

Yesu oloca wawe “ikuru sa Muluku” waaphwanela owuupuxerya achu yanwiriyana wuupuwela seiho seeren’ye khalai mmiyaha sa a Isarayeli. Amuthoriha a Farawo yaawo yaamonne Mose apakaka sootikhiniha yaakhuwela: “Eyo ekatha ya Muluku!” Yaaritho “ekatha ya Muluku” yeeyo yaarempe Malamulo Khumi va mapawa meeli a maluku. (Mukwaha 8:19; 31:18) Moolikana, “ekatha ya Muluku”—munepa awe waweela, naari saweera sawe sa kuru—Ti seiho inamweeriha Yesu hiihaano okumiha Masololo ni waapenusa achu awiiceliwa. Mwawiihiiha, omwene wa Muluku wohaapwaha amwiicani oothene, nthowa nawi Mwene oothanliwa a Omwene Yesu ori vaava apakaka miteko sootikhiniha.

Yesu owerya wawe okumiha masololo ti yawooniherya ya owerya wawe ompwaha Satana. Yesu onnuuluulela niphwanaphwaniho nawe vooloca sa munepa woonanara yoowo okuminheiye mwa mulopwana ola. Wakhala wi mulopwana ola hanasepa soonanara araceelihaka ni ichu saphaama, munepa woonanara ole onahaala oruuha minepa mikina mithanu nasese, imweerihaka mulopwana owo okhala awuukhuleya mmikhalelo sawe opwaha voopacerya. (Mateu 12:22, 25-29, 43-45) Mwawiihiiha eyo enooniherya okhala vamoha ni Aisarayeli.

Muthiyana yoowo onanwiriyana Yesu onnakhuwela: “Òrèriwa t’amai à oyanre ni awamwin’he!” Athiyana ari Ayuta yaaweherya wi anamukhala mayi a mulipa a miririmu, xaxaxa Mesiya. Mwawiihiiha muthiyana ola onuupuwela wi Mariya onanwerya okhala oohakalala ntoko mai a muhusiha. Mwawiihiiha Yesu aamookolola muthiyana ntoko ehime ya ohakalala: “Òrèriwa toko, t’ale aniwa masu a Muluku ni enakhapelela.” (Luka 11:27, 28) Yesu hantoko oloca wi Mariya onaphwanela ovahiwa ncicimiho navameekhaaya. Opwaha yeeyo, ohakalala wa mulopwana naari wa muthiyana ori oothene onaphwanyeya mu omurumeela Muluku moororomeleya, ohiya echu eri yoothene yoomwiilini naari yawaakhwaniheryiwa vyakala.

Ntoko enreiye o Kalileya, Yesu onnaavaanya achu yaawo anamveka eneneeryo ya wirimu. Owo onaloca wi hiyaavovo eneneeryo eneeraaya evahiwe “ohiya yele ya Yona.” Yona aarumeela ntoko eneneeryo voopiili orweela mwa okhala mahiku mararu mmirimani mwa ehopa ni olaleerya wawe moolipa murima, weiwo  waamukerinhe wa Aninive wi awo echaruwe. Yesu onnaloca: “Nave vava òkhalavo mutokwene ompwan’he Yona.” (Luka 11:29-32) Navetho Yesu ompwaha Solomoni, yoowo mwene amwaamuthiyana o Xepa aruule wi amwiiwe.

“Havo onapariha epanthe,” Yesu onnaaceererya, “wi akuhe nipuro nawipitheya nari mukulukuthelani, nto onakuha votxukhuwavo wi atxhu anavolowa yoneke ekamama.” (Luka 11:33) Akhweya owo aataphulela wi ohusiha ni opaka sootikhiniha wa achu ale waari ntoko okuha epanthi vawiipitheyavo nthowa nawi miitho aya hiyaahaala woona, awo anahaala oyeleela yoolakelela ya miteko sawe.

Yesu ookumiha nsololo hiihaanoru nave oomweeriha mulopwana oohiloca oloca. Ela enaphwanela waaceenyerya achu omvuwiha Muluku ni waaleela akina yeeyo Yehova onakhwaaniheryeiye. Mwawiihiiha Yesu ookhalano masu a waalopolano amwiicani awe: “Vanonto wone phama wi ekamama eri mwa weyano ehikhale epiphi. Hihatho mwili à wothene wamwaleliwaka, ohakanyeryenrye ni epiphi, mwili-à wothene onamukhala womwaleliwa ntoko epanthe yomwalelaka ni warya waya.”—Luka 11:35, 36.