Amanle oloca sa olevelela vachokoni va Nfarisi Simau, Yesu onnapacerya muteko mukina wa olaleerya o Kalileya. Ela eyaakha yanawiili ya muteko awe woolaleerya, nave vano hari meekheiye. Arummwa awe 12 ari ni yoowo, hiiha ntoko athiyana akina yaawo “yapenusiwe wa minepa sonanara ni iretxa.” (Luka 8:2) Variyari va yaawo Mariya oniichaniwatho Matalena, Susana, ni Xowana, yoowo iyawe ori muhooleli a Mwene Antipa.

Vaavaa achu ancipale anahuseryaaya vooloca sa Yesu, ovaanyihana vooloca sa muteko awe onnaacereryeya. Eyo enakhala yawooneya vaavaa mulopwana ophariwe ti nsololo, yoowo ohinawerya woona ni oloca, onaruuhiweiye wa Yesu nave ampenusa. Vano mulopwana ori ootaphuwa ohooleliwa ni satana nave onnawerya woona ni oloca. Achu anakhala ootikhiniheya, elocaka: “Tahi yola mwana a Davide?”—Mateu 12:23.

Muloko othukumanne variyari va empa yeeyo Yesu oreiyevo wootepa waaca, nave owo ni amuhuserya awe hanawerya olya. Tahi wi oothene anuupuwela wi Yesu ti yoowo aalaiheryiwe “mwana a Davide.” Alipa oorepa ni Afarisi akina aruule makupa oothene a Yerusalemu—nyenya ohiya wi ehuserye orweela wa Yesu naari wi emukhaviherye. Awo anaaleela achu: “Ókhalano Beelzibule” nave wi onalapa ni “mutokwene aya a masololo.” (Marko 3:22, Nlakano Nahihano) Vaavaa amusi a Yesu aniiwaaya vooloca sa ovaanyihana wuuwu, awo annarwa wi emukuse Yesu. Wa nthowa taani?

Phaameene, ophiyerya vaava, anna a Yesu haneemererya wi owo Mwaana a Muluku. (Yohani 7:5) Yesu yoowo onakhala wi tonatannya ovaanyihana wuuwu tahi Yesu yoowo yaamusuwenlaaya vaavaa yinnuwaayano vamoha o Nasareti. Yuupuwelaka wi ichu hasineeca phaama  ni yoowo, awo annaloca: ‘orimusavuwa.’—Marko 3:21.

Tiheeni saweereya sinooniheryaaya? Yesu ompenusa mulopwana aaphariwe ni masololo yoowo vano onawerya woona ni oloca. Haavo onawerya okhooca yeela. Nyenya alipa oorepa ni Afarisi anneererya omwaakaaha Yesu moorweela wa omootherya. Awo annaloca: “Ola hanakumiha masololo nyenya ni ikuru sawe sa Beelzebule, mutokwene a masololo.”—Mateu 12:24, NN.

Yesu onnasuwela yeeyo alipa oorepa ni Afarisi anuupuwelaaya, mwawiihiiha onnaloca: “Omwene onikawanya mukhataya onakhala milepe. Nave epoma ni etxheko sakawanyeya mukhataya inammwaryeya. Vano, satana amukumihà satana, onamwikawanya: nave oni okhale hai omwene awe?”—Mateu 12:25, 26.

Ela chiryene eparipari! Afarisi aasuwela wi Ayuta akina annakumiha minepa sonanara. (Saweriwa T’arummwa 19:13) Hiiha Yesu onnakoha: “Miyo kákumihaka masololo ni ikuru sawe sa Beelzebule, anamwananyu enakumiha ni ikuru sa wani?” Ni masu makina, munyemu aya onaphwanela ophariheleya wa yaawo. Voocharela Yesu onnavuwiha mwaha: “Nyenya Miyo kákumihaka masololo ni ikuru sawe sa Munepa wa Muluku, vavo Omwene wa Muluku orimphiya va nyuwo.”—Mateu 12:27, 28, NN.

Ooniheryaka wi okumiha wawe masololo yawooniherya ya owerya onampwaha Satana, Yesu onnaloca: “Tani onawerya ovolowa mpa mwa mutxhu awupa wi iye itxhu sawe, ahimmanke toko? Ammaka, onan’werya wiya mpa mwawe. Yowo ohiri ni miyo, onnakivirikanya; ni yowo ohinathukumanya vamoha ni miyo, onammwaryamwasa.” (Mateu 12:29, 30) Mweeparipari alipa oorepa ni Afarisi yaawo anamwiica Yesu, annooniherya wi alapeli a Satana. Awo annaahiiha achu onwiriyana Mwaana a Muluku, yoowo onalapa ni ikuru sa Yehova.

Yesu onnaalopola alapeli yaala a satana: “Sotxheka sothene sa ana a atxhu ni soruwana saya sothene inamuleveleliwa; nto yowo onanyemula Munepa Wawela harwa aleveleliwa, ntakhara otannyile yotxheka yohimala.” (Marko 3:28, 29) Muupuwele mulacu aryaayano yaawo analoca wi ikuru sa Satana ichu seiyo mwawooneya inapakiwa moorweela wa munepa wa Muluku!