Vaavaa Yesu ni amuhuserya awe aneecaaya o “Galileya wothene alaleyaka musinagoga,” michaka vooloca sa ichu sootikhiniha Yesu onapakeiye sinnamwaramwaseya. (Marko 1:39) Masu vooloca sa saweera sawe annaphiya elapo weiwo oriwo mulopwana a mareca. Mulipa a murece Luka onnamuthariha owo ntoko oosareya “mareca.” (Luka 5:12) Mmukhalelo wootepasa, ereca ela yoothanyeya, vakhaani vakhaani ennunciha makupa oohiyana hiyana a mwiili.

Mwawiihiiha, namareca ola ori mmukhalelo woohooxa nave onalamuleliwa okhala ocai wa akina. Opwaha yeeyo, vaavaa achu anaacamelaaya onnalamuleliwa okhuwela “Kòthanyeya! Kòthanyeya!” nave eyo ennaakhapelela ohirava ereca. (Onamukutxho 13:45, 46) Nyenya tiheeni namareca ola onapakeiye hiihaano? Owo onnamwaacamela Yesu nave onnakokhora vamiithoni vawe, amvekaka: “Pwiya, wakhwelà, onan’werya okipenusa.”—Mateu 8:2.

Chiryene mulopwana ola ookhalano nroromelo ntokweene mwa Yesu! Ophiyerya mweeryo taani ereca eyo enanarinhaaya mwiili awe? Yesu oni aakhule hai? Tiheeni mwaahaala opaka mwaari weiwo? Ni ikharari, Yesu onnookola nwono awe nave onnamutannya mulopwana. Yesu onnaloca wa yoowo: “Kinnakhwela, penuwá.” (Mateu 8:3) Eyo akhweya ennakhala yoovila wa akina weemererya, mwawaakuveya mareca annammala mulopwana.

Apwanne himwaahaala ochuna okhalano mwene ori aikharari ni oophwanelela ntoko Yesu? Mukhalelo aamukhalinheiye namareca ennaniroromeliha wi vaavaa Yesu oneereiye akhale Mwene a elapo yoothene, yooloherya ela ya Piipiliya enahaala okhwaanela: “Onamwamorela ikharari òtxetxheya ni òhàwa, nave onanvulusa ekumi ya atxhu òthoiwasa.” (Salumu 72:13) Chiryene, Yesu onahaala okhwaaniherya yookhwela awe yavamurimani wi aakhaviherye oothene anahooseya.

Muupuwele wi naamwi ahaakumve ompenusa namareca, muteko wa Yesu onnakumiherya ohakalala otokweene variyari va achu. Vano achu anahaala owiriyana vooloca sa echu yeela yootikhiniha omanleiye opaka. Nyenya Yesu, hanachuna wi achu ehelele nroromelo mwa yoowo pahiru orweela wa ichu sawiimulociwa. Owo oosuwela yooloherya yeeyo enaloca wi owo “hakalotxa itxhu sintxipale muramphani,” eyo ti wi, mmukhalelo wawiivuwiha. (Isaiya 42:1, 2) Mwa yeeyo, Yesu onnamvaha nlamulo mulipa a mareca yoowo ompenunseiye: “Oná, ohimulèle mutxhu etxhu yela. Nto hawé wisonihe wa alipa a mukutxho, ni operekhe yovaha elamuleliwe ti Mose.”—Mateu 8:4.

Ntoko munaweryaanyu waanyiherya, mulopwana ori oohakalala amanle openusiwa ophiyerya wi hanawerya omaala oloca yeeyo yeeren’ye. Owo onnakhuma nave onnamwaramwasa michaka mmapuro vyakala. Eyo ennatannya nchuno variyari va achu. Ennamwaramwaseya ophiyerya wi Yesu ahinawerya weeca vanlakani ayaaka vapooma, mwawiihiiha veelukuluku onnakhala mmapuro awiipitheya mwemmo ohinakhaliwamo. Nlelo, achu annarwa mapuro oothene wi ehusihiwe ni yoowo ni epenusiwe.