Othariha Mathowa a Opharihela Yoorepa
YOOHUSERYA 6
Othariha Mathowa a Opharihela Yoorepa
ECHU YAWEERA: Muheeremoona waalakhanya yoorepa ni opwaha muyaaka mwaha mukina. Muroromele wi oowiriyana anyu annoona mookwakwaleya wiiwanana orivovo variyari va yoorepa mwaalakhannyaanyu ni mwaha munapakaanyu.
MUKHALELO WA WEERANO:
● Muthanlele masu ookhweleya. Mmanle waalakhanya yoorepa, mvuwihe masu yaawo aniiwanana mooluluwanya ni mwaha wookhweleya. Munanwerya weerano moorweela wa wuuluulela masu yaawo naari moorweela wa opaka nikoho nenlo nnaweeriha oowiriyana anyu osuwela masu ookhweleya.
Wakhala wi moopharihela masu oohiyana wi muuluulele echu enalociwa va yoorepa, muroromele wi oowiriyana anyu nlelo annawerya woona mukhalelo masu a Mpiipiliyani aniiwananaaya ni mwahaanyu wookhweleya.
● Mucicimiherye mwaha wookhweleya. Wakhala wi munachuna opacerya waalakhanya yoorepa, mutharihe mukhalelo masu ookhweleya a yoorepa eyo anakhaviheryaaya mwaha anyu.
Elukuluku munatharihaanyu yoorepa, mukhaleno Piipiliya oohuleya ene. Eyo ennaakhaviherya oowiriyana anyu wiiwananiha masu anyu ni yoorepa mwaalakhannyaanyu.
● Mpharihele yoorepa mookhweya. Musepe oloca masu yaawo eni ehikhaviherye mwaha wookhweleya. Muthipeleyaka mwa yeeyo oowiriyana anyu asuwenlaaya vooloca sa mwaha, mulakelele ichu kavi siri soochuneya wi oowiriyana anyu ewerye wiiwexexa phaama mwaha.
