MWAHA 16

Tiheeni Yesu Aapankeiye Vaavaa Aareiye Veelaponi ya Vathi?

ORUMIHA

Achu ancipale anamuupuwela Yesu ntoko nikwiya, mulipa a miririmo a miruku naari mulopwana onaya okhwa. Vano apwanne nnanwerya ohuserya sincipale vooloca sa yoowo orweela wa othokororya okumi awe ari veelaponi ya vathi? Mmwaha yoola, nnahaala othokororya ichu ikina sookhweleya seiyo Yesu aapankeiye ni mukhalelo iho sineeraaya sookhaviheryeeni.

1. Tuuvi waari muteko wookhweleyasa wa Yesu?

Muteko wookhweleyasa wa Yesu waari ‘olaleerya michaka yaphaama ya Omwene wa Muluku.’ (Mwaalakhanye Luka 4:43, NN.) Owo aalaleerya michaka saphaama sawi Muluku onahaala otikitherya omwene, naari olamulelo, yoowo onahaala omaliha makacamiho oothene aachu. a Mu iyaakha chaaru ni emeya, Yesu aahilapa moowetha wi aaleele achu muchaka yoola woolipiha.—Mateu 9:35.

2. Ntakhara heeni Yesu aanapaka sootikhiniha?

Piipiliya onnaloca “miteko mitokweene, sootikhiniha ni ineneeryo seiho Muluku eenreiye moorweela wa [Yesu].” (Saweriwa T’arummwa 2:22, TNM) Ni ikuru sa Muluku, Yesu aahiwerya ovareryela ikuru sa maphacuwelo, waavaha yoolya achu macikhweene, waapenuxa alipa awiiceliwa, ophiyerya tho waaviha alipa ookhwa. (Mateu 8:23-27; 14:15-21; Marko 6:56; Luka 7:11-17) Sootikhiniha sa Yesu saahooniherya vanlakani vene wi owo aarummwale ti Muluku. Ihotho saahooniherya wi Yehova ookhalano ikuru sa omaliha makacamiho ahu oothene.

3. Tiheeni nneeraahu nihuserye orweela wa okumi wa Yesu?

Yesu aahimwiiwelela Yehova mmikhalelo soothene. (Mwaalakhanye Yohani 8:29.) Moohipwacha wiiciwa, Yesu moororomeleya aaheerano yeeyo Atiithi awe yaamvenkaaya wi eereno ophiyerya okhwa wawe. Owo aahooniherya wi ti wooweryeya achu omurumeela Muluku, naamwi ehoolelaka makacamiho. Mwawiihiiha, Yesu oonihiyerya ‘yootakiherya, wi ntcharetchare manani awe.’—1 Pedro 2:21, NN.

OHUSERYA MWAWIISEELA

Muhuserye mukhalelo Yesu aalalenryeiye michaka saphaama ni opaka sootikhiniha.

4. Yesu aalaleerya michaka saphaama

Yesu aaheeca macikhwi macikhweene a ikiloometru mu iphiro seiho saasaren’ye nchupi, alaleeryaka michaka saphaama wa achu ancipale ntoko aawereleiye. Mwaalakhanye Luka 8:1, nave voocharela muthokororye makoho ala:

Apwanne Yesu aalaleerya pahiru achu yaaya wa yoowo?
Wiilipiserya taani Yesu aapankeiye wi aaphwanye achu?

Muluku aaloca mwa miririmu wi Mesiya aahaala olaleerya michaka saphaama. Mwaalakhanye Isaiya 61:1, 2, nave voocharela muthokororye makoho ala:

Yesu aakhwanihenrye hai masu yaala a miririmu?
Apwanne munoona wi olelo achu annachuna wiiwa michaka seiha saphaama?

5. Yesu aahusiha iparipari sasisapo

Ohiya pahiru olaleerya michaka saphaama vooloca sa Omwene wa Muluku, Yesu aanavaha mahusiheryo oophara muteko. Muthokororye sootakiherya sa vakhaani sinaphwanyeya Mmwaha awe wa Vamwaakoni otempe osuweliwa. Mwaalakhanye Mateu 6:14, 34 ni 7:12, nave voocharela muthokororye makoho ala:

Miruku taani soophara muteko Yesu ovanheiye mu iversikulu seiya?
Mano, munoona wi miruku seiya nlelo sinnaphara muteko?

6. Yesu aahipaka sootikhiniha

Yehova aamvaha Yesu owerya wi apake sootikhiniha sincipale. Wi moone yootakiherya emoha, mwaalakhanye Marko 5:25-34 naari moone EXILEMA. Voocharela muthokororye makoho anacharela.

EXILEMA: Yesu Onnanpenuxa Muthiyana Awiiceliwa (5:10)

Mu exilema, tiheeni muthiyana awiiceliwa eemereryeiye?
Tiheeni yoosivenleeni mu yootikhiniha yeela?

Mwaalakhanye Yohani 5:36, nave voocharela muthokororye nikoho nla:

Sootikhiniha sa Yesu “onamoona” taani seerelaaya, naari sooniherya eheeni vooloca sa yoowo?

Nyuwaano mwaanasuwela?

Ichu sincipale nsuwenlaahu vooloca sa Yesu inarweela mu Aliivuru a Michaka axexe a Mpiipiliyani: Mateu, Marko, Luka, ni Yohani. Namarepa ti namarepa a Aliivuru yaala oophitaanyerya echu yoohiyana vooloca sa Yesu. Ichu soothene sinniiwanana vamoha wi ivahererye moonelo wawaakhwanela vooloca sa okumi wa Yesu.

MATEU

topacenrye omurepa Liivuru Muchaka awe. Owo onnacicimiherya mahusiheryo a Yesu, xaxaxa yeeyo Yesu aahusinheiye vooloca sa Omwene wa Muluku.
MARKO

orempe Muchaka wookhuveya. Owo onnaloca saweereya sincipale soohakalaliha.
LUKA

onnaloca sa ochuneya waya ovekela ni mukhalelo Yesu aakhaliheiye athiyana.
YOHANI

onnuupulula sincipale vooloca sa omuchu wa Yesu moorweela wa oloca sa ochekulela wawaaca yoowo Yesu aareiyeno ni asinthamwene awe awaacameleya vamoha ni achu akina.