MWAHA 01
Piipiliya Oni Ookhaviheryeeni Hai?
Oothene ahu nookhalano makoho vooloca sa okumi, makacamiho, okhwa, ni omwaahiyu. Hiyaano tho ninnuukhuwa ni ichu sa nihiku ti nihiku, ntoko mukhalelo wa okhalano ikhorowa naari okhalano echoko yoohakalaliha. Achu ancipale ahoona wi Piipiliya tahi wi pahiru onavaha maakhulo a makoho matokotoko a mookumini nyenya tho onnavaha miruku soophara muteko ntakhara okumi wa nihiku ti nihiku. Muchu ti muchu onanwerya ophuravo orweela wa Piipiliya.
1. Makoho taani makina Piipiliya onaakhuleiye?
Piipiliya onnaakhula makoho oochuneyaxa ntoko ala: Ekumi yaapacenrye hai? Teevi eri yoolakelela ya okumi? Ntakhara heeni achu aphaama annahooxeya? Tiheeni eneereya vaavaa muchu onakhweiye? Waakhanle wi oothene ahu ninnachuna murecele, ntakhara heeni sookhalavo ikhoco sincipale? Tiheeni enahaala weereya ni elapo omwaahiyu? Piipiliya onnanceenyerya ophwanya maakhulo a makoho yaala, nave macikhwi a achu aaphwanya maakhulo oohakalalihaxa.
2. Piipiliya oni anikhaviherye hai opuha okumi wa nihiku ti nihiku?
Piipiliya onnanivaha miruku saphaama. Ntoko yootakiherya, Piipiliya onnahusiha imusi mukhalelo wa okhalano ohakalala weeparipari. Owo onnavahererya miruku vooloca sa mukhalelo wa ovilela ni wuukhuwa ni mukhalo wa ohakalala ni muteko ahu. Nyuwaano munahaala ohuserya yeeyo Piipiliya onahusiheiye vooloca sa miyaha seiha ni ikina sincipale vaavaa nnahaalaahu othokororya mwaha yoola vamoha. Nyuwaano munahaala weemererya wi “soorempwa sothene [echu eri yoothene eri Mpiipiliyani] . . . sinnaphwanyerya etchu.”—2 Timóteo 3:16, NN.
Yoolaleeryiwa ela henamuraceela Piipiliya. Moohiyana, ela ennooceenyeryaani omwaalikhela Piipiliya mukhatiinyu. Mwawiihiiha, ninnooceenyeryaani waalakhanya soorepa soothene iromoliwe mu miyaha seiha nave mulikanyihe ni yeeyo munahuseryaanyu.
OHUSERYA MWAWIISEELA
Muthokororye mukhalelo Piipiliya onaakhaviheryeiye achu, mukhalelo muneeraanyu musiveliwe omwaalakhanya, ni ntakhara heeni ti waphaama waavya nikhaviheryo wi mmwiiwexexe.
3. Piipiliya onanwerya onihoolela
Piipiliya ori ntoko omwaleela wawaaryaxa. Nnanwerya ompharihela Piipiliya wi anooniherye mukhalelo wa opaka soolakelela saphaama ni onikhaviherya osuwela yeeyo enahaala weereya muhoolo.
Mwaalakhanye Salumu 119:105, nave voocharela muthokororye makoho ala:
-
Moonelo taani aareiyeno mulipa oomurepa salmu yoola vooloca sa Piipiliya?
-
Tuuvi ori moonelo anyu vooloca sa Piipiliya?
4. Piipiliya onanwerya waakhula makoho ahu
Muthiyana mmoha aahoona wi Piipiliya aahaakhula makoho oochuneya yaawo owo aareiyeno mu iyaakha sincipale. Moone EXILEMA, nave voocharela muthokororye makoho anacharela.
-
Mu exilema yeela, makoho taani avakhaani muthiyana yoola aareiyeno?
-
Ti mwawiihai omuhuserya Piipiliya omukhavihenryaaya?
Piipiliya onnanceenyerya opaka makoho. Mwaalakhanye Mateu 7:7, nave voocharela muthokororye:
-
Makoho taani muryaanyuno yaawo Piipiliya onahaaleiye owerya waakhula?
5. Munanwerya osiveliwa mu omwaalakhanya Piipiliya
Achu ancipale annasiveliwa omwaalakhanya Piipiliya nave annaphuravo mu weerano yeeyo. Moone EXILEMA, nave voocharela muthokororye makoho anacharela.
-
Mu exilema yeela, ti mwawiihai amiravo oothene yoonaaya vooloca sa waalakhanya?
-
Ntakhara heeni vano annoona moohiyana vooloca sa omwaalakhanya Piipiliya?
Piipiliya onnanivaha sooleeliherya seiho inanlipiha nave inanivaha ewehereryo. Mwaalakhanye Aroma 15:4, nave voocharela muthokororye nikoho nla:
-
Apwanne munnasiveliwa ni yoororomeliha ya Piipiliya ya ohakararya ni ewehereryo?
6. Akina ananwerya onikhaviherya omwiiwexexa Piipiliya
Mu waaceererya mu omwaalakhanya Piipiliya mukhataaya, ancipale ahoona wi othokororya yeeyo yaalakhannyaaya ni akina ti yamphurelo. Mwaalakhanye Saweriwa T’arummwa 8:26-31, nave voocharela muthokororye nikoho nna:
-
Nni niwerye hai omwiiwexexa Piipiliya?—Moone iversikulu 30 ni 31.
Mutiyope aanachuna nikhaviheryo wi iiwexexe Soorepa. Achu ancipale olelo annoona okhala yookhaviherya omuthokororya Piipiliya ni akina
ACHU AKINA ANI: “Omuhuserya Piipiliya ori oyeleela elukuluku.”
-
Tiheeni mwaahaalaanyu oloca? Nave ntakhara heeni?
MUKWASU
Piipiliya onnavaha miruku vooloca sa okumi wa nihiku ti nihiku, onnaakhula makoho ookhweleya, nave onnaahakararya achu ni waavaha ewehereryo.
Makoho awuuluulela
-
Miruku taani saphaama nneeraahu niphwanye Mpiipiliyani?
-
Makoho taani makina Piipiliya onaakhuleiye?
-
Tiheeni munachunaanyu ohuserya orweela Mpiipiliyani?
OTHOLATHOLA
Muthokororye mukhalelo miruku sa Mpiipiliyani sinapharaaya muteko olelo.
“Ikano sa Mpiipiliyani Ilukuluku Soothene ti Samphurelo” (Mulipeleli N.º 1 a 2018, a Ekunya)
Moone mukhalelo Piipiliya omukhavihenryeiye mulopwana yoowo aawaniha ni muupuwelo woohiphwanelela ovinyerya ari mwaana.
Muthokororye miruku soophara muteko sa Mpiipiliyani ntakhara echoko.
Muhuserye mukhalelo Piipiliya onavaanyeiye muupuwelo watheru yoowo achu ancipale aryaayano vooloca sa yoowo onalamulela elapo.
Ntakhara Heeni Omuhuserya Piipiliya?—Exilema Yanteero (3:34)
