Mulipa oohuserya mmoha awiichaniwa Alan S. Duthie oorepa mu liivuru awe Bible Translations and How to Choose Between Them (Otaphuleliwa wa Apiipiliya ni Mukhalelo wa Waathanla) ooloca: “Waakhanle wi munnaroromela wi Piipiliya masu a Muluku ntakhara achu, eyo enataphulela wi Muluku onnaloca ni hiyo. . . . Wakhala wi malapelo anyu annavolowela ekumi anyu yoothene, mwa yeeyo malocelo a [Piipiliya] anaphwanela okhala a nihiku ti nihiku.”

Achu anasivela Masu a Muluku ni murima woothene anneemererya. Awo anneemererya ni murima woothene wi “Soorempwa soothene iveereliwe ti Muluku nave ti samphurelo mu ohusiha, osamela, weereryanya ichu, olaka mwawookololowa.” (2 Timotiyu 3:16) Piipiliya tahi pahiru liivuru a khalai. Owo “tookumi ni oowerya,” onavaha nikhaviheryo neeparipari vooloca sa makacamiho a nihiku ti nihiku a okumi. (Ahepri 4:12) Wi liivuru yoola aweela iiwexexiwe ni ophariheliwa muteko ni alipa oomwaalakhanya, onaphwanela okhala mu elocelo ya nihiku ti nihiku wi aweryeke waalakhanyiwa ni wiiwexexiwa ni achu oothene.

Achu anasiveliwa ni Masu a Muluku aatepa ohakalala ni ovonyiwa wa Piipiliya a Elapo Evyaani a Soorempwa Seekriki Seekristu mu elocelo ya Elomwe. Anamoona a Yehova yaahilokoha ovonyiwa wa Piipiliya yoola onapharihela maloccelo a nihiku ti nihiku, Namurunku, 19 a Yunyu a 2022, va muthukumano wavameekhaaya moorweela wa TV Sucesso, mu araatiyu, ni mu JW Streaming. Munna Patrick Hecker, mmoha a Nikhuuru na Efiliyale yo Mosampiki aalokoha ovonyiwa wa Piipiliya yoola. Alaleeryi awaakhwana 2.453 analoca Elomwe yaatepa ohakalala omwaakhela Piipiliya a Soorempwa Seekriki Seekristu a malocelo a nihiku ti nihiku. Achu opwaha 16.959 yaaphwanyeya va muthukumano yoola. Piipiliya ola tookwakwaleya ni eeparipari, eerihaka wi ikhala sawiiwexexeya michaka sa Muluku seiho sahintonko ophwanyeya mu elocelo ya Elomwe. Akhweya munniikoha: Taani amutaphulenle Piipiliya ola awiiwexexeya phaama?

Naamwi Piipiliya a Elapo Evyaani a Soorempwa Seekriki Seekristu ari muvyaani wa achu a elocelo ya Elomwe, ola okhanle ovinyerya eyaakha ya 1950. Mu elukuluku yeeyo, aavonyiwa mu elocelo ya Enklesi ni Sociedade Bíblica Internacional (Watch Tower Bible and Tract Society), nikhuuru nenlo nipacenrye omvonya Piipiliya ovinyerya khalai. Mulipeleli a Enklesi 15 a Setempuru a 1950, aahiloca: “Alopwana yaawo yaapaka makupa a nikhuuru na omutaphulela Piipiliya yaahiloca yoochuna aya . . . wi ehisuweliwe masina aya, naari olaleiwa masina aya eri akumi naari emanle okhwa. Yoolakelela ya Piipiliya ola ori ovuwiha nsina na Muluku mukumi ni eeparipari.”

Piipiliya a Elapo Evyaani a Soorempwa Saweela anteero mu elocelo ya Enklesi aavonyiwe mu 1961. Nave nlelo masina a alipa oomutaphulela hasuweliwe ophiyerya olelo; moohikhwa minikwa, ela ennooniherya wi yoolakelela aya ori omucicimiha Muluku. Masu oohulela a Piipiliya a 2013 ani: “Nsuwelaka ochuneya waya muchaka wa Piipiliya, noorehererya wanaawiili nimucicimihaka vancipale Piipiliya. Ninnoona okhala murici ahu mutokweene ovuwiha muchaka yoola mmukhalelo weeparipari. . . . Yoolakelela ahu hiyaari pahiru ompaka Piipiliya oororomeleya mwawiiwanana ni soorepa sakhalai, nyenya tho ookwakwaleya ni ookhweya omwaalakhanya.”

Ophiyerya olelo irivo ikoopiya sa Piipiliya a Elapo Evyaani opwaha amilyawu 240 nave tho oopakiwa anteero naari makupa awe mu ilocelo 220. Tiheeni alipa oomwaalakhanya ancipale aphwannyaaya?

Yesu aahaahusiha oohuserya awe ovekela: “Atiithihu muri wirimu, nsina nanyu neelihiwe.” (Mateyu 6:9) Piipiliya onnaloca nsina na Muluku, Yehova, ikwaha opwaha 7.000. (Mukwaha 3:15; Salumu 83:18) Emanle okhwa arummwa a Yesu, muloko Weekristu waahivoloweliwa ni moonelo woonanara wi Ayuta ancipale yaaphwanela osepa opharihela nsina na Muluku. (Saweriwa ti Arummwa 20:29, 30; 1 Timotiyu 4:1) Alipa ookopiyara makupa a Soorempwa Seekriki yaapacerya oraceeliha nsina na Muluku, Yehova, ni masu ntoko “Muluku” ni “Apwiya.”

Nikhuuru na Omutaphulela Piipiliya a Elapo Evyaani nookookiheryamo nsina na Muluku, Yehova, mu Soorempwa Seekriki Seekristu, * ikwaha sawaakhwana 241. Okookiheryiwa wa nsina nlo, tahi ochuna wa alipa ootaphulela, nyenya onathipeleya mu otholathola wawiiseela opakiwe. Ntoko yootakiherya, mu Luka 4:18 annaphwanyeyamo masu ari mu Isaiya 61:1. Mu soorepa sakhalai sa Ehepiri, nsina na Yehova ninnaphwanyeya mu eversikulu yeela ya liivuru a Isaiya. Mwawiihiiha, mu Piipiliya a Elapo Evyaani, Luka 4:18 oni ha: “Munepa wa Yehova ori mwa miyo, vawi ookithanla wi kilaleerye michaka saphaama wa oohaawa.”

Otaphuleliwa mmukhalelo yoola onnaakhaviherya alipa oomwaalakhanya omuhiyaniha Yehova Muluku ni Mwanawe ooyariwa meekheiye, Yesu Kristu. Ntoko yootakiherya, Apiipiliya ancipale amutaphulenle Mateyu 22:44 mmukhalelo ola: “Apwiya álocha wa Apwiyaka.” (Nlakano Nahihano) Vano taani aaloca naani? Mweeparipari, eversikulu yeela ekuxiwe mmakupa a Salumu 110:1, yeeyo mu soorepa sakhalai sa Ehepiri onaphwanyeyamo nsina na Muluku. Nyenya mu Piipiliya a Elapo Evyaani Mateyu 22:44 oni ha: “Yehova aaloca wa Pwiya aka.” Ohiyana orivovo variyari va Yehova Muluku ni Mwanawe tahi mwaha woohisuwanyeya. (Marku 13:32; Yohani 8:17, 18; 14:28) Nnaphwanela wiiwexexa ohiyana yoola wi niphwanye ovuluxiwa. Saweriwa ti Arummwa 2:21 oni: “Nave oothene yoole oni iichane nsina na Yehova onamvuluxiwa.”

Alipa ootaphulela aapaka wiilipiserya wi etaphulele soorepa sakhalai Seekriki mmukhalelo weeparipari ni woororomeleya, nave aapaka owetha waya wi etaphulele mookhweya, epharihelaka malocelo a nihiku ti nihiku. Ntoko yootakiherya, alipa oomutaphulela Piipiliya a Elapo Evyaani ahiilipixerya otaphulela mookhweya masu a Ekriki. Malocelo mancipale a nihiku ti nihiku annapharihela masu wi yooniherye elukuluku echu eyo yeeren’yaaya, ela tiwi, khalai, olelo, ni muhoolo. Elocelo ya Ekriki annapharihela tho masu wi yooniherya weereya wa mukhalelo wa echu enavolowelaaya, moohipwacha yaari echu ya elukuluku vakhaani, emanle naari yootitelela. Muthokororye masu a Yesu anaphwanyeya mu Mateyu 6:33. Masu a Ekriki anataphulela “waavya” anooniherya echu yootitelela weera. Wi yooniherye phaama yoolakelela ya masu a Yesu, eversikulu ela etaphuleliwe ha: “Mwawiihiiha, mutitelele waavya woopaceryani Omwene ni ekhaikhai ya Muluku, nave ichu soothene iha sinarwa saaceereryiwa wa nyuwo.” Moolikana, Mateyu 7:7 otaphuleliwe ha: “Titelelani oveka, nave munarwa mvahiwa; titelelani waavya, nave munarwa mphwanya; titelelani omana nsele, nave munarwa muhuleliwa.”—Aroma 1:32; 6:2; Akalatiya 5:15.

Ovonyiwa wa Piipiliya a Soorempwa Seekriki Seekristu mu Elomwe pahiru mapacereryo. Marehereryo aapakiwa wi ataphuleliwe Piipiliya anteero mu elukuluku elakeleliwe. Apwanne alipa awaalakhanya anaphwanela ororomela wi Piipiliya a Elomwe onahaala okhala eeparipari ni ookwakwaleya ntoko a Enklesi?

Aa, chiryene. Woona wi muteko wootaphulela onahooleliwa ni Nikhuuru Noolamulela na Anamoona a Yehova. Mwa miruku, yaalakeleliwa wi otaphuleliwa wa Piipiliya waahaala weereyaka ni wiilipiserya wa nikhuuru. (Masiposipo 11:14) Makhuuru a otaphulela aatikitheriwa elapo yoothene. Etepartamentu eniichaniwa Serviços de Tradução etikitheryiwe o Nipuro Ntokweene na Anamoona a Yehova wi ekhaviheryeke soothowa sa makhuuru, waakhula makoho aalipa ootaphulela ni omwiiwananiha Piipiliya a Elapo Evyaani mu ilocelo soohiyanahiyana. Mwawaaceererya, prokrama awiichaniwa Watchtower Translation System (WTS) oopakiwa wi aakhaviheryeke alipa oomutaphulela Piipiliya. Mwa ichu ikina, prokrama yoola onnooniherya mukhalelo masu a Ehepiri ni Ekriki ataphuleliwaaya mu Piipiliya a Enklesi. Ekaruma yeela ennaakhaviherya alipa ootaphulela othanlela masu a nihiku ti nihiku. Oloca eparipari, muteko wootaphulela onachuneya wiilipixerya otokweene. Nyenya prokrama yoola a mukomputatore, onnaakhaviherya vancipale makhuuru a omutaphulela Piipiliya, omutaphulela Piipiliya a Elapo Evyaani mmukhalelo weeparipari ni wookwakwaleya moolikana ni Piipiliya a Enklesi.

Ninnooceenyeryaani omuhuserya phaama Piipiliya a Elapo Evyaani a Soorempwa Seekriki Seekristu. Nyuwaano munanwerya omwaalakhanya mu interneti naari mu aplikativo JW Library, naari munanwerya okhalano a wimprimiriwa moorweela wa muloko wa vanipuroni wa Anamoona a Yehova. Nyuwo tho munahaala osiveliwa ni makupa a vameekhaaya Piipiliya ola oreiyeno: wiiwexexeya, marepeliwo a mutano, miyaha sa mpuwa seiyo anapaka mukwasu wa liivuru ti liivuru a Mpiipiliyani, ni wookhaviherya ophwanya mwawaakuveya iversikulu seiyo musuwenlaanyu. Echu yoochuneya, nyuwo munahaala omwaalakhanyaka Piipiliya yoola mulekecheyaka wi onaloca masu a Muluku moororomeleya apharihelaka elocelo ya nihiku ti nihiku.

Masu atharihiwe: Annathariha mwawaakuveya masu mancipale anaphwanyeya Mpiipiliyani.