1-2. (a) Kpale mɛndó ka Yuda na ngoi mɛ Toma Polo su mbeti to hɛ̃ awakristo ti Ebre nɛ? (b) Nda mɛ elengbi ti tɛnɛngɔ ya, mbeti mɛndó Polo su na lége ti nyingɔ vurú asindó na ngoi mɛ alengbi nɛ?

 AWAKRISTO ti Ebre mɛndó na dungɔ lɛ ngɛ̃́ ka Yeruzalɛmɛ nga ka Yuda tengbindó na kpengba kpale abulu gba na pɛ kwá tɛ Yezo. Na pɛ zingɔ bombi tɛ awakristo ala tengbindó na botemeli ndoni ndoni. (Aw. 8:1) Abulu 20 na pɛni ava Yezo tengbindó na kpale mɛ aba zangangɔ falanga, ni lengbi ti dungɔ gwɛ̃ mɛndó amu ndo ka lɛ gigi zu (Aw. 11:27-30) Kanda, na bulu ti 61 ti N.E., ngama se ti uzu ala luandó mbeti mɛ Toma Polo su na lége ti nyingɔ vurú hɛ̃ la, mbeti niko gandó na ngoi mɛ alengbi.

² Mbeti ti Ebre gandó na ngoi mɛ lengbi na lo mɛ ya, ta siriri tɛ awakristo na ngbãngɔ bwai ma. Polo hɛ̃ wangɔ ti yangondo mɛ lengbi ti zangɔ awakristo ya, ala gbe bɛ la na ya kota pɛnɔ mɛ angbã dã ala tengbi na ni. Prɔfesi mɛndó Yezo kambisa na lo ti gbɛ̃ngɔ ti kɔdɔrɔ ti Yuda angbã yakere ati na seni. (Luka 21:20) Biani abɛse Polo ná awakristo ti Yuda ko, ta ala hĩngandó ngoi mɛ prɔfesi mɛ aba gbɛ̃ngɔ ti Babilɔnɛ na tingɔ na seni ma. Kanda awakristo lengbi ti salelangɔ ngoi mɛndó ala ngbã na ni ti nɛngɔ ya, ala lɛkɛ tɛrɛ la wa ala ti na seliye ti gbengɔ bɛ na ya loyengɔ.​—Aeb. 10:25; 12:1, 2.

3. Nda mɛ awakristo ti ndɛ alengbi ti kpãngɔ lɛ la gba na ndo mbeti mɛndó asu to hɛ̃ awakristo ti Ebre nɛ?

³ Angbã dã etengbi na kota pɛnɔ mɛ aɔ pɛnɔ mɛndó awakristo ti Ebre atengbi na ni. (Mat. 24:21; Suma 16:14, 16) Zia e ba awangɔ mɛndó Yehova hɛ̃ awakristo mɛ ni lengbi nga ti zangɔ e ndɛ.

“E NGBÃ LÁ KWƐ MAINGƆ”

4. Kpengba lo mɛndó awakristo ti Yuda tengbi na ni nɛ? (Ba nga limɔ.)

⁴ Awakristo ti Yuda atengbindó na kpengba kpale. Na ya ngoi kɔi Ayuda adundó azi mɛ Yehova pɔna ala. Yeruzalɛmɛ adundó kɔdɔrɔ ti Lo-lengɔ Gbia tɛ Nzapa ge lɛ sese wa tepelo adu ndo mɛ ndo li na sambela ti mbilimbili. Ayuda ti mbilimbili zu ndo landandó andia tɛ Moizɛ na se mɛndó agbia ti sambela ndo kambisa na ni. Ando fandó na ala kpale mɛ aba tɛ ti tɛngɔ, fangɔ ganza, nga na mangbi tɛ la ná azi mɛ ta ala du Ayuda ma. Kanda na pɛ kwa tɛ Yezo ko, Yehova banda kɛ̃ngɔ mbeka mɛndó ando hɛ̃ ka tepelo. Ni tindó kpengba kpale na lo tɛ awakristo ti Yuda mɛndó ala mɛsɛnɛ na tɔndɔngɔ ndia niko. (Aeb. 10:1, 4, 10) Abɛse awakristo mɛndó kpengbani na ya nyingɔ ngama Toma Petro ko, ta ala mɛsɛnɛndó na gbinyangbi niko ti fãnani iɔ ma. (Aw. 10:9-14; Gal. 2:11-14) Awakristo tengbindó na botemeli tɛ agbia ti sambela na ngoi mɛndó azi bombi fãnani.

5. Kpale mɛndó awakristo alengbi ti batangɔ tɛrɛ la na lo ni nɛ?

⁵ Awakristo ti Ebre atengbindó na botemeli na ya lége sɛ. Ti (1) agbia ti sambela ndo hũndó ala mabere aaposta. Ti (2) Ambanga awakristo tɛnɛndó ya, ale awakristo ngbã bo lá kwɛ tɔndɔngɔ ndia tɛ Moizɛ, ngoi mɛndɛ̃ ala yendó kpɛngɔ botemeli. (Gal. 6:12) Ye mɛndó aza awakristo niko ya, ala ngbã mbilimbili ka tɛ Yehova nɛ?

6. Ye mɛndó Polo sa ngunu bɛ ayata lo ya, ala li nɛ? (Aeb. 5:14–6:1)

⁶ Na ya mbeti mɛndó lo su to hɛ̃ awakristo ti Ebre ko, Polo sandó ngunu bɛ awakristo  ya, ala li kpengbani ti gbɔ̃ngɔ nda tɛnɛ tɛ Nzapa na seni. (Di Aebreo 5:14–6:1.) Kaya mbeti ti Aebreo, Polo kambisa hɛ̃ ayata ya, se ti vɔrɔngɔ na Yehova tɛ awakristo ti ndɛ aɔ madãma na se mɛndó Ayuda ndo li nani. a Polo hĩngandó ya se awakristo ti na hĩngangɔ ndo wa ala gbɔ̃ nga nda mbilimbili ti ya Ngbangɔ na seni ko, na tongɔ ala ya, ala kɛ̃ siɔ dangɔ bɛ wa ta ala ti na ya yungɔ ndo ma.

7. Kpengba kpale mɛ e ndo tengbi na ni ndɛ nɛ?

⁷ Ngama awakristo ti Ebre, e ndo tengbi na akpale nga na bingangɔ li mɛ akɛsɛnɛ na ndia ti mbilimbili tɛ Yehova. Ngoi gba ambanga azi ndo tɛnɛ ya Atɛmwɛ tɛ Yehova na kpengba lo na lo mɛ ya ala ndo tɔndɔ andia ti ya Ngbangɔ mɛ aba bombingɔ tɛrɛ tɛ kɔli ná wali. Dangɔ bɛ tɛ azi ti gigi ndo kɛsɛnɛ ngoi zu na dangɔ bɛ tɛ Nzapa. (Mas. 17:15) Ni du ngbondoni ya e hĩnga siɔ dangɔ bɛ ni wa e kɛ̃ nga ni, ni la ta elengbi ti zingɔ lége hɛ̃ abatemeli ya ala nzɛ̃ na e, wa e zia lengɔ kwa hɛ̃ Yehova ma.​—Aeb. 13:9.

8. Ye mɛ lengbi ti zangɔ e ya e ti azi mɛ amai na ya Nyingɔ nɛ?

⁸ E ndo li nzɔ̃ni ti landangɔ wangɔ mɛndó Polo hɛ̃ awakristo ti Ebre, wa e li nga kpengbani ya, e ti azi mɛ amai na ya nyingɔ. Ni lengbi na hĩngangɔ mbilimbili na seni nga na kpãngɔ na kwa dangɔ bɛ tɛ Yehova. Elengbi ti ngbãngɔ lá kwɛ lingɔ kpale niko abɛse na pɛ mungɔ batisimɔ tɛ e. Abɛse du ya, e mu batisimɔ ali ndɛ abulu kɛ̃ ko, elengbi ti dingɔ nga mandangɔ ngoi zu tɛnɛ tɛ Nzapa. (Nz. 1:2) Mandangɔ Ngbangɔ tɛ e nvɛ̃ni ngoi zu na zangɔ e ya, e ti na loyengɔ mɛ kpengbani, seliye mɛndó Polo su kaya mbeti ti Aebreo.​—Aeb. 11:1, 6.

“E DU NA LOYENGƆ SO BATANGƆ DUNGƆ LƐ NGƐ̃́ TƐ E”

9. Nda mɛndó ayɔ ya awakristo ti Ebre du na loyengɔ nɛ?

⁹ Awakristo ti Ebre ndó na gwɛ̃ ti loyengɔ ti nɛngɔ ya, ala so na ya pɛnɔ mɛndó adɛ dã asi ka Yuda. (Aeb. 10:37-39) Yezo pandó hɛ̃ ava lo ya, na ngoi mɛ gbanda ala hũ asoda gini Yeruzalɛmɛ kɛrɛrɛ ko, ala lengbindó ti kpɛngɔ gwengɔ ka ndo lɛ ngomba. Wangɔ tɛ lo ndó ngbondoni na lo tɛ awakristo zu abɛse du ya, ala ndo du ka gbata bere ala ndo du ka ndo kɔdɔrɔ. (Luka 21:20-24) Na ngoi ti gã, azi mɛndó to ndo tiri ka kɔdɔrɔ tɛ la ndo kpɛlɛndó gwe ka gbata ti Yeruzalɛmɛ ti batangɔ tɛrɛ la. Na lo tɛ awakristo ko, ta kpɛngɔ gwengɔ ka ndo lɛ ngomba dundó ekateli ti nzɔ̃ni ma, ayɔndó ya ala du na loyengɔ.

10. Ye mɛ loyengɔ ti kpengbani na tongɔ awakristo ya, ala li ni nɛ? Aebreo 13:17)

¹⁰ Awakristo ti Ebre alengbindó ti kpãngɔ bɛ la na ndo azi mɛ Yezo kpã la ti tambwisangɔ bombi. Azi ko la ndo tambwisa kpale ndo hɛ̃ malako mɛ alengbi ti zangɔ ayata zu ti ya bombi ya, ala landa andia tɛ Yezo na ngoi mɛ alengbi nga na seni. (Di Aebreo 13:17.) Tɛnɛ ti Grɛkɛ mɛ “tɔndɔngɔ” mɛ akambisa ni kaya Aebreo 13:17 ti fangɔ zo mɛ ndo tɔndɔ kpale na lo mɛ ya, lo ndo kpã bɛ lo na ndo zo mɛ ndo hɛ̃ malako ni. Ta elengbi bo ti tɔndɔngɔ malako ni na lo mɛ ya, zo ko la lo hɛ̃ ni la lo dɛ̃ bo ti hɛ̃ngɔ ni ma. Awakristo ti Ebre alengbindó ti tɔndɔngɔ azi ko la ndo tambwisa ala uzu ti nɛngɔ ya pɛnɔ banda. Se du ya awakristo ndo tɔndɔ na seni  malako mɛ awa tambwisangɔ la ndo hɛ̃ la ko, ni na dungɔ woni ya, ala tɔndɔ ala na ngoi ti pɛnɔ.

11. Nda mɛ loyengɔ adu ngbondoni na lo tɛ awakristo ti ndɛ nɛ?

¹¹ Ndɛ lo mɛ ko, ngama awakristo ti Ebre e nga na gwɛ̃ ti loyengɔ. E na olo na dungɔ lɛ ngɛ̃́ na ngoi mɛ azi gba ndo kɛ̃ awangɔ ti ya Ngbangɔ mɛ aba ndangba bi. (2 Pet. 3:3, 4) Hãngɔ ni zingɔ abɛse Ngbangɔ kambisa akpale gba mɛ na lingɔ tɛrɛ lo na ngoi ti kota pɛnɔ ko, ni na akpale gba mɛ ta e hĩnga ma. Ni la ayɔ ya e du na loyengɔ ya, ndangba bi na gangɔ na ngoi mɛ alengbi wa Yehova nga na batangɔ e.​—Hab. 2:3.

12. Ye mɛ na zangɔ e ya, e so na ngoi ti kota pɛnɔ nɛ?

¹² Elengbi ti dungɔ na loyengɔ na ndo azi mɛ Yehova ndo salela ti tambwisangɔ e, azi ni du “mbɛ ti mbilimbili nga ti kɔdɛ.” (Mat. 24:45) Ngoi mɛ gbanda kota pɛnɔ banda ko, e na luangɔ ambanga amalako mɛ alengbi ti songɔ na dungɔ lɛ ngɛ̃́ tɛ e ngama se mɛndó awakristo ti Ebre alua na malako na ngoi mɛndó asoda ti Roma agini Yeruzalɛmɛ. Ni du ngbondoni ya e kpã bɛ e na ndo azi mɛ ndo tambwisa linɔ tɛ Yehova na olo. Se du ya ta e ndo tɔndɔ amalako mɛ ala ndo hɛ̃ e ndɛ ma ko, na dungɔ pɛnɔ ya e tɔndɔ ni na ngoi ti kota pɛnɔ.

13. Ngasia la wangɔ mɛ e lua kaya mbeti ti Aebreo 13:5 du ngbondoni nɛ?

¹³ Uzu ti nɛngɔ ya, awakristo ti Ebre ahũ aye mɛ alengbi ti tongɔ ala ya, ala kpɛlɛ ko, ale ala du na dungɔ lɛ ngɛ̃́ ti yapuni wa ala kɛ̃ nga dungɔ na “songo ti falanga.” (Di Aebreo 13:5.) Ambanganindó ka popo tɛ la ndo tengbi na kpale ti gwɛ̃ nga na yɛlɛ. (Aeb. 10:32-34) Abɛse du ya, na ya ngoi kɔi ala gbendó bɛ la na ya kpengba kpale na lo ti pangɔ nzɔ̃ pa ko, ngoi mɛndɛ̃ ambangani ka popo tɛrɛ ala bandandó gingɔ falanga gba ti nɛngɔ ya, ala bata na tɛrɛ la bere ta ni ti awa yɛlɛ ma. Kanda ta falanga tɛ la lengbi ti batangɔ ala na ngoi ti gbɛ̃ngɔ ti Yeruzalɛmɛ ma. (Zaki 5:3) Biani ando du pɛnɔ ka tɛ azi mɛ ndo ye dungɔ na aye ti mi gba ya, ala zia da tɛ la ná aye tɛ la ka pɛko la wa ala kpɛlɛ.

14. Ngasia la loyengɔ tɛ e lengbi ti tingɔ na ya tara na omɛ aba mungɔ ekateli ti dungɔ na aye ti gigi gba nɛ?

¹⁴ Ni du ngbondoni ya, e kɛ̃ dungɔ na songo ti aye ti mi ti gigi mɛ se e du na loyengɔ ya ndangba bi dɛ dã. Ngbangɔ pa ya, “azi na sangɔ falanga tɛ la so bɛ ta lége” ala na hũngɔ ya ta “falanga tɛ la bere wɔlɔ tɛ la na songɔ na la na ngoi ti ngɔnzɔ tɛ Yehova ma.” (Ezk. 7:19) Na se lɛ gingɔ falanga gba ko, elengbi ti mungɔ ekateli mɛ alengbi ti zangɔ e ya, e bata tɛrɛ e, ndasewa tɛ e, wa e lua nga lége ti lingɔ kwa hɛ̃ Yehova. Elengbi nga ti kɛ̃ngɔ mungɔ nyongo mɛ zanga tina bere kɛ̃ngɔ tɛnɛngɔ tɛnɛ gba na ndo ye ti gigi. Elengbi nga ti kɛ̃ngɔ yengɔ aye mɛ e na ni wɛ ɔngɔ nyɔ kpɔ̃ ni. (Mat. 6:19, 24) Na lo mɛ ya ndangba bi dɛ dã ko, loyengɔ tɛ e lengbi ti tingɔ na ya tara na omɛ aba aye ti gigi nga na aye mɛndɛ̃.

“AYƆ YA E GBE BƐ E”

15. Nda mɛndó ayɔ ya awakristo ti Ebre agbe bɛ la nɛ?

¹⁵ Awakristo ti Yuda ndó na gwɛ̃ ti gbengɔ bɛ la na lo mɛ ya angbã yakere kɔdɔrɔ ti Yuda agbɛ̃. (Aeb. 10:36) Abɛse du ya awakristo ti Ebre atengbindó na botemeli ndɛ̃ ndɛ̃ ndɛ̃ ko, gba ni ka popo tɛ la tindó awakristo na ngoi ti siriri. Polo kambisandó hɛ̃ la ya ala gbe bɛ la na ya pɛnɔ mɛndó ala ndo tengbi na ni na lo ti loyengɔ tɛ ala, wa ta pɛnɔ tɛ ala adu ngama tɛ Yezo mɛndó lo gbe bɛ lo tee ka lo kpi na ni ma. (Aeb. 12:4) Kanda gba tɛ azi ti Yuda atindó na kakulu lo nga na ngɔnzɔ na lo mɛ ya, azi gba atindó awakristo. Abulu yakere so pɛni uzu ti nɛngɔ ya Polo su mbeti to hɛ̃ awakristo ti Ebre ko, agbɔ̃ndó lo ka Yeruzalɛmɛ na ngoi mɛndó lo ndo pa nzɔ̃ pa. Azi ti Yuda ɔngɔ 40 “anyɔ ngɛ ya, ta ani tɛ ye kɔi ma, ta ani nyɔ nga ye ma, nga ka ani ho Polo hĩ wadila.” (Aw. 22:22; 23:12-14) Abɛse du ya, atemelandó ala bere akɛ̃ndó ala ko, awakristo alengbi bondó ti bombingɔ tɛrɛ la ti nɛngɔ ya, ala sambela Yehova wa ala pa nga nzɔ̃ pa ti Lo-lengɔ Gbia, ala lengbi ngandó ti lingɔ zu ya loyengɔ tɛ la ngbã lá kwɛ kpengbani.

16. Ngasia la mbeti ti Ebre aza e ya e ngbã mbilimbili abɛse e tengbi na botemeli nɛ? (Aebreo 12:7)

¹⁶ Ye mɛndó aza awakristo ti Ebre ya, ala gbe bɛ la na ya botemeli mɛndó ala tengbi na ni nɛ? Polo yendó zangɔ awakristo ya, ala hũ nzɔ̃ kpale mɛ azi ndo lua se du ya ala gbe bɛ ala na ya pɛnɔ. Lo kambisandó hɛ̃ awakristo ya Nzapa lengbi ti zingɔ lége ti nɛngɔ ya, loyengɔ tɛ la ati na ya tara ti nɛngɔ ya ala lua fɔrmasiɔ̃. (Di Aebreo 12:7.) Fɔrmasiɔ̃ niko lengbindó ti zangɔ ala ya, ala ti na seliye ti nzɔ̃ni tɛ awakristo. Se ala kpãndó kaya bingangɔ li tɛ ala nzɔ̃ kpale mɛ zo lengbi ti luangɔ na pɛ gbengɔ bɛ lo na ya tara ko, na dungɔ woni ti nɛngɔ ya, awakristo ti Ebre gbe bɛ la.​—Aeb. 12:11.

17. Wangɔ mɛ Polo hɛ̃ na omɛ aba gbengɔ bɛ na ya botemeli nɛ?

¹⁷ Polo kambisandó hɛ̃ awakristo ti Ebre ya ala du na ge ge ge wa ta ala zia ya pɛnɔ nzɛ̃ na la ma. Lo dundó zo mɛ lengbi ti hɛ̃ngɔ ala wangɔ na ndo kpale niko. Na lo mɛ ya, lo temɛlandó awakristo gã ko, lo hĩngandó akpengba kpale mɛ ala ndo tengbi na ni. Kanda lo nvɛ̃ni gbe ngandó bɛ lo na ndo botemeli. Biani na pɛ tingɔ wakristo ko lo tengbindó na botemeli. (2 Kɔr. 11:23-25) Polo hĩngandó na seni ye mɛndó ala lengbi ti lingɔ ti nɛngɔ ya, ala gbe bɛ la. Lo dandó na bɛ awakristo ti Ebre ya, se ala tengbi na pɛnɔ ko, ta ala lengbi ti kpãngɔ bɛ la na ndo ngunu tɛ ala  nvɛ̃ni ma, kanda na ndo Yehova. Polo tɛnɛndó na ge ge ge ya: “Yehova du wa zangɔ mbi ta mbi na dungɔ na mbɛtɔ ma.”​—Aeb. 13:6.

18. Hĩngangɔ ye mɛ na gangɔ alengbi ti zangɔ e ya, e gbe bɛ e na ya botemeli ngasia?

¹⁸ Ambanga ayata gba ndo gbe bɛ la na ya botemeli ndɛ. Lége kɔi mɛ elengbi ti fangɔ ala na songo adu kpãngɔ ala na ya sambela nga zangɔ ala na ye mɛ ala na gwɛ̃ ni. (Aeb. 10:33) Kanda Ngbangɔ tɛnɛ yangondo ya, azi zu ko la ndo ye “tingɔ bo kɔi na Yezo kristo ko, azi na giangɔ ala.” (2 Tim. 3:12) Na lo ni la e zu elengbi ti lɛkɛngɔ tɛrɛ e na lo ti kpale mɛ ndo kũ e. Zia ya e ngbã lá kwɛ kpãngɔ bɛ e na ndo Yehova ti nɛngɔ ya lo za e na ya apɛnɔ zu mɛ e na tengbingɔ na ni. Na ngoi mɛ alengbi lo na lingɔ ya, azi ko ndo sambela lo na mbilimbili du na siriri.​—2 Tɛs. 1:7, 8.

19. Wangɔ mɛ elengbi ti kpãngɔ na kwa ti nɛngɔ ya aza e, e lɛkɛ tɛrɛ e na ngoi ti kota pɛnɔ nɛ? (Ba nga limɔ.)

¹⁹ Mbeti mɛndó Polo su to hɛ̃ awakristo ti Ebre azandó awakristo ti siɛklɛ ti uzu ya, ala lɛkɛ tɛrɛ la na pɛnɔ mɛ ala na tengbingɔ na ni. Polo wambandó bɛ ayata mɛ awakristo ya, hĩngangɔ nga na gbɔ̃ngɔ nda tɛnɛ ti ya Ngbangɔ na zangɔ ala ya, ala ti na makoki ti hĩngangɔ nga na kɛ̃ngɔ hangɔ lo mɛ lengbi ti gbɛ̃ngɔ loyengɔ tɛ la. Lo sa nga ngunu bɛ la ya, ala du dã ti landangɔ malako tɛ Yezo nga na azi ko la ndo tambwisa akpale kaya bombi. Wa lo zandó awakristo ya, ala gbe bɛ la, wa ala hũ ya, apɛnɔ ko ala ndo tengbi na ni adu ngama lége kɔi mɛ To la ti songo ndo salela ti hɛ̃ngɔ ala fɔrmasiɔ̃. Ni du awangɔ ti ya Ngbangɔ mɛ elengbi ti kpãngɔ ni na kwa ndɛ. Ni na zangɔ e ya, e gbe bɛ e wa e ngbã nga mbilimbili tee ka ndani.​—Aeb. 3:14.