Mɔ ndo da bɛ mɔ ya, kpale na dɛ̃ngɔ na bi mɛ na gangɔ? Azi gba ndo da bɛ la ya, kpale na dɛ̃ngɔ abɛse akpengba kpale mɛ ala ndo tengbi na ni ndɛ. Kanda elengbi ti yengɔ nvɛ̃ni ya, kpale na dɛ̃ngɔ na bi mɛ na gangɔ? Ĩi! Ngbangɔ hɛ̃ e aye mɛ alengbi ti tongɔ e ya, e du na loyengɔ ya, kpale na dɛ̃ngɔ na bi mɛ na gangɔ.

•  Nzɔ̃ dangɔ bɛ mɛ Ngbangɔ hɛ̃ e nɛ?

•  Akapa mɛ kaya Ngbangɔ na tingɔ na seni biani?

•  Ngasia la kapa mɛ Ngbangɔ ko, na tingɔ na seni nɛ?

•  Kapa mɛ Ngbangɔ ko na tingɔ na seni la wa?

•  Ngasia la nzɔ̃ dangɔ bɛ ni alengbi ti zangɔ mɔ bandangɔ ndɛ nɛ?

 Ngbangɔ tɛnɛ ya, azi ti lɛ sese zu ndo tengbi na pɛnɔ gbã nvɛ̃ni. Kanda ni tɛnɛ nga ya, ta pɛnɔ tɛ e na ngbãngɔ bwai na bwai ma. E ba ambanga se lɛlo mɛndɛ̃.

•   Pɛnɔ ti zangangɔ da

   Tɛnɛ mɛ Ngbagɔ tɛnɛ: “Ala na kĩngɔ da, wa ala na dungɔ kai.”—Yisaya 65:21.

   Afa nɛ na lo ti bi mɛ na gangɔ nɛ? Zo na zo na dungɔ kaya da tɛ lo.

•   Pɛnɔ ti zangangɔ kwa ná yɛlɛ.

   Tɛnɛ mɛ Ngbagɔ tɛnɛ: “Azi mɛ mbi pɔna ala ko, ala na luangɔ nzɔ̃ kpale na lo ti kwa tɛ la.”—Yisaya 65:22.

   Afa nɛ na lo ti bi mɛ na gangɔ nɛ? Azi zu na dungɔ na kwa ti nzɔ̃ni ti lingɔ, ala na sepelangɔ na ni, wa ala nga na luangɔ anzɔ̃ kpale na lo ti kwa tɛ la.

•   Pɛnɔ na lo ti zangangɔ mbilimbili

   Tɛnɛ mɛ Ngbagɔ tɛnɛ: “Agbia ti kɔdɔrɔ na lengɔ gbia na mbilimbili.”—Yisaya 32:1.

   Afa nɛ na lo ti bi mɛ na gangɔ nɛ? Zangangɔ mbililimbili mɛ aba pɔnangɔ pɔrɔ tɛrɛ, awa ngɛnza ná awa yelɛ ta na dungɔ da ma. Na lingɔ ye tɛrɛ azi zu kwɛ kɔi.

•   Pɛnɔ na lo ti zangangɔ tɛ ná gwɛ̃.

   Tɛnɛ mɛ Ngbagɔ tɛnɛ: “Tɛ ti tɛngɔ na dungɔ gɛ lesɛsɛ mawoma, tee ka ndo ngomba; tɛ ti tɛngɔ na dungɔ gba.”—Nzembo 72:16.

   Afa nɛ na lo ti bi mɛ na gangɔ nɛ? Azi zu na dungɔ na tɛ ti nzɔ̃ni ti tɛngɔ nga mawoma. Ta zo kɔi na hũngɔ pɛnɔ na lo ti gwɛ̃ bere zangangɔ tɛngɔ ye ti nzɔ̃ni ma.

•   Pɛnɔ na lo ti mobulu ná kpɔngɔ azi.

   Tɛnɛ mɛ Ngbagɔ tɛnɛ: “Zo na zo na dungɔ ka gbɛ kɛkɛ tɛ lo ti vinyɔ nga na gbɛ kɛkɛ tɛ lo ti figi, ta zo kɔi na hɛ̃ngɔ ala mbɛtɔ ma.”—Mika 4:4.

   Afa nɛ na lo ti bi mɛ na gangɔ nɛ? Zo zu na hũngɔ ya, lo ka ndo ti siriri na lo mɛ ya, ta asiɔ azi na dungɔ da ma wa “azi ti mbilimbili na mungɔ lɛ sese.”—Nzembo 37:10, 29.

•   Pɛnɔ na lo ti To

   Tɛnɛ mɛ Ngbagɔ tɛnɛ: “Ta kɔdɔrɔ kɔi na yangɔ zabe na ndo fɔ̃lo ma, ta ala na mandangɔ to fãni mɛndɛ̃ ma.”—Yisaya 2:4.

   Afa nɛ na lo ti bi mɛ na gangɔ nɛ? Siriri na dungɔ ge lesese zu. (Nzambo 72:7) Ta azi na hũngɔ pɛnɔ na lo mɛ ya, zo tɛ la kpi na lo ti to ma. Ta ala nga na kpɛlɛngɔ kɔdɔrɔ tɛ la na lo ti to ma.

•   Pɛnɔ mɛ aba gã

   Tɛnɛ mɛ Ngbagɔ tɛnɛ: “Ta zo kɔi mɛ na dungɔ kai na pangɔ ya: ‘tɛrɛ mbi ndo sɔ ma.’”—Yisaya 33:24.

   Afa nɛ na lo ti bi mɛ na gangɔ nɛ? Ta azi na hũngɔ pɛnɔ fãni mɛndɛ̃ na lo ti gã bere na lo mɛ ya, ala du awa zɛ̃ bere awa ziba ma. (Yisaya 35:5, 6) Ngbangɔ ko nga kapa ya, “ta azi ti kpili gbanda ma.”—Suma 21:4.

•   Pɛnɔ na lo ti gbɛ̃ngɔ ti ngu, yá ná ngɔngɔ

   Tɛnɛ mɛ Ngbagɔ tɛnɛ: “Bɛ nyama ná ndo mɛ ngu hulɛ da na dungɔ na dengɔ bɛ. Wa ndo mɛ kpangbala na dungɔ na dengɔ, ni na sĩngɔ na fololo ti nzɔ̃ni mɛ nga ma safra.”—Yisaya 35:1.

   Afa nɛ na lo ti bi mɛ na gangɔ nɛ? Lɛ sese zu na tingɔ paradiso wa azi na dungɔ kai nga ma se mɛndó Nzapa tɛnɛ na lo ni uzu.—Ebandeli 2:15; Yisaya 45:18.

 Azi gba ndo hũ ya, akapa mɛ Ngbangɔ ako adu nzɔ̃ni, kanda ta ni na lingɔ tɛrɛ lo ma. Ngoi mɛndɛ̃ mɔ nga na dangɔ bɛ ti ngaso. Kanda e sa ngunu bɛ mɔ ya, mɔ gi hĩngangɔ na seni tɛnɛ mɛ Ngbangɔ tɛnɛ na lo ti bi mɛ na gangɔ. Na lo nɛ? Na lo mɛ ya, kapa mɛ kaya Ngbangɔ akɛsɛnɛ na akapa mɛ azi ndo ko. Nzapa la kokapa mɛ kaya Ngbangɔ. Ba akpale mɛ ali ya, kapa tɛ Nzapa aɔngbi na tɛ azi:

•   Nzapa du zo mɛ elengbi ti kpãngɔ bɛ e na ndo lo. Ngbangɔ pa ya ‘Ta Nzapa lengbi ti pangɔ nvɛ̃nɛ ma.’ (Tito 1:2) Hãngɔ ni zingɔ, bo Nzapa kɔi la lengbi ti hĩngangɔ akpale mɛ na gangɔ. (Yisaya 46:10) Ngbangɔ sĩ na se lɛlo mɛ ndo fa ya, se Nzapa ko kapa kɔi ko, ni ndo li tɛrɛ lo. Ti nɛngɔ ya, mɔ hĩnga akpale mɛndɛ̃ ko, ba video mɛ: Nini ekoki kondimisa biso ete Biblia elobaka solo?

•   Nzapa na ngunu ti hozingɔ apɛnɔ tɛ e. Ngbangɔ pa ya, Nzapa na ngunu ti lingɔ aye zu mɛ “lo ye lingɔ ni.” (Nzembo 135:5, 6) Ta ye kɔi mɛ alengbi ti gbazingɔ Nzapa ya, lo li aye mɛ lo kokapa ni da ma. Nzapa ye zangɔ e na lo mɛ ya, lo ndo ye e.—Yoanɛ 3:16.

 Mɔ lengbi ti hũndangɔ tɛrɛ mɔ na ndo mɛ, ‘Se du ya Nzapa na gwɛ̃ ti zangɔ e wa lo nga na ngunu ti lingɔ ni, nda mɛ e ndo tengbi na pɛnɔ nɛ?’ Ti nɛngɔ ya, mɔ lua gbinya na ndo hũnda ni ko, ba video mɛ: Mpo na nini Nzambe atiki nzela na bapasi?

 Yehova na salelangɔ Lo-lengɔ Gbia tɛ lo, mɛ adu guvɛrnɛma ti ndozu ti nɛngɔ ya, lo kokisa akapa tɛ lo. Lo kpã Yezo gbia ti Lo-lengɔ Gbia ni, wa lo hɛ̃ nga lo kumba ti lɛkɛngɔ lɛ sese. Na ngoi mɛndó Yezo ge lɛ sese ko, lo sarandó awa ngã, lo hɛ̃ndó azi tɛ ti tɛngɔ, lo gbɔ̃ndó kpengba yá, wa lo sondó azi mɛ akpili. (Marko 4:39; 6:41-44; Luka 4:40; Yoanɛ 11:43, 44) Lo fandó ye mɛ lo na lingɔ nga ma gbia ti Lo-lengɔ Gbia tɛ Nzapa.

 Ba video Bokonzi ya Nzambe ezali nini? ti nɛngɔ ya, mɔ hĩnga anzɔ̃ sulu mɛ angbã dã Lo-lengɔ Gbia tɛ Nzapa ahɛ̃ azi.

 Angbã yakere ni ti na seni! Ye mɛ ato e ya, e ye lo ni nɛ? Ngbangɔ piandó kambisa akpale mɛ na fangɔ ya, angbã yakere Lo-lengɔ Gbia tɛ Nzap abanda lengɔ gbia na ndo lɛ sese. (Luk 21:10, 11) Akpale mɛ ndo li tɛrɛ lo ndɛ amangbi na akpale mɛndó Ngbangɔ pia tɛnɛ tɛnɛ ni.

 Ti nɛngɔ ya, mɔ hĩnga akpale mɛndɛ̃ ko, di bɛli tɛnɛ mɛ: “Ntango nini Bokonzi ya Nzambe ekoyangela mabele?”

 Wa sungɔ mbeti kɔi ti ya Ngbangɔ ahaka nzɔ̃ dangɔ bɛ mɛ Ngbangɔ hɛ̃ e na ‘nwa mɛ ndo gbɔ̃ masuwa kpengbani.’ (Aebreo 6:19) Nga ma se ko la nwa mɛ ndo gbɔ̃ masuwa ndo za ni na ngoi ti kpengba yá ko, nzɔ̃ dangɔ bɛ tɛ e na ndo za e ya, e gbe bɛ e na ya akpale ti pɛnɔ. Nzɔ̃ dangɔ bɛ tɛ e alengbi ti zangɔ e ya, e du so kpɔ, e du na dengɔ bɛ, e du na bingangɔ li ti nzɔ̃ni, wa ni lengbi nga ti lingɔ ya, e du na sãte ti nzɔ̃ni.—1 Tɛsalonikɛ 5:8.