Mɔ na lingɔ se bɛ Yehova?

E hɛ mɔ kota sia kɔli na ngoi mɛ mɔ gere na ni so mandangɔ nyi buku mɛ nga so hĩngangɔ Atɛmwɛ tɛ Yehova nzɔ̃ni, mandangɔ akwa mɛ e ndo li nga na se mɛ linɔ tɛ e ndo dɔ na nɔ̃. E da bɛ e ya ye ko mɔ manda a za mɔ ti hĩngangɔ azi mɛ ndo li se bɛ Yehova ndɛ. E kpengba na bɛ mɔ ya mɔ ngbã lá kwɛ́ na hĩngangɔ Nzapa, mɔ pa hɛ azi ti nda sewa tɛ mɔ na akwa-mɔ aye mɛ mɔ ndo manda, mɔ ga nga abombi tɛ e lá kwɛ́.​—Aebreo 10:23-25.

Se mɔ ngbã lá kwɛ́ na mandangɔ alo gba mɛ aba Yehova ko, mɔ na hũngɔ ya lo ndo ye mɔ gba. Na tongɔ mɔ ya mɔ li ye mɛ alengbi ti fangɔ ya mɔ ndo ye lo. (1 Yoanɛ 4:8-10, 19) Kanda mɔ fa ka ngasia ka ya du tɛ mɔ ti lá kwɛ́ ya mɔ ndo ye Nzapa nɛ? Tɔndɔngɔ andia tɛ Nzapa adu na lo ti nzɔ̃ lo tɛ mɔ nvɛ̃ni lo nɛ? Ye mɛ na zangɔ mɔ ya mɔ li se bɛ Nzapa ndoni kɔi na e nɛ? Wa hangɔ mɔ na Ngbangɔ a sepala fangɔ na mɔ agbinya ti ahũnda oko wa mɔ na nda sewa tɛ mɔ “ĩ ngbã lá kwɛ́ ka ya songo tɛ Nzapa, . . . na dangɔ bɛ na du ti kaka.”​—Yudɛ 21, NW.