Ta e na agbia-nzapa mɛ ndo futa la na lo ti kwa tɛ la ge ya linɔ tɛ e ma. Ni la, nga ma se ko ndó bombi tɛ awa Kristo abanda na ni kpá ko, ando kpɔ ti ndo awa batangɔ bombi mɛ alengbi ya ala “bata azi ti [bombi] tɛ Nzapa.” (Awa Pangɔ Kwa 20:28) Abiazi niko adu akɔli mɛ na mangbi ti nzɔ̃ni na Yehova mɛ ndo gbɔ̃ li bombi ala ndo bata nga bombi, “ta ndo gbɔ̃ la gbɔ̃ngɔ ma, kanda ala ndo li na se bɛ la nvɛ̃ni ka gbɛ lɛ Nzapa; ta na gwɛ ti lwangɔ faranga ma, kanda na hɛngɔ tɛrɛ zu ka ya kwa ni.” (1 Petrɔ 5:1-3, NW) Kwa mɛ ala ndo li na lo tɛ e nɛ?

Ala ndo bata e, ala ndo ba nga ndó e. Abiazi ndo fa e na wangɔ mɛ alo ka ya Ngbangɔ ala ndo za nga ayata ya, ala ngbã ngoi zu dã na Yehova. Abiazi ahĩnga nzɔ̃ni wangɔ mɛ Yehova wa na ala na lo ti kwa tɛ la, ni la ta ala ndo sɔ gbia na ndo azi tɛ Nzapa ma, kanda ala ndo li kpengbani ya e du nzɔ̃ni ko e ndo sepala nga. (2 Kɔrinto 1:24) Ma se ko la wa batangɔ angasã ngbaga ndo li kpengbani ti batangɔ ngasã ngbaga kɔi kɔi ti ya gbagba tɛ lo na seni ko, abiazi ndoli nga kpengbani ti hĩngangɔ nyita kɔi kɔi ti ya bombi na seni.​—Masese 27:23.

Ala ndo wa e na seti lingɔ se bɛ Nzapa. Pɔsɔ kɔi kɔi, abiazi ndo ha tɛnɛ mɛ alengbi ti kpengbangɔ na loyengɔ tɛ e ka bombi. (Awa Pangɔ Kwa 15:32) Akɔli niko ti gégégé ando gbɔ̃ lini ka lɛ kwa ti fangɔ tɛnɛ, ala ndo li kwa ndoni kɔi na e, ala ndo fanga na e se kɔdɛ ndɛ ndɛ ndɛ ti fangɔ na tɛnɛ.

Ala ndo kpengba na bɛ zo kɔi na kɔi ka popo tɛrɛ e. Abiazi ndo za e ti lɛkɛngɔ mangbi tɛ e na Yehova, na loni la, ala ndo ba e ngoi mɛ ndɛ ka ya da tɛ e bere ka Da Lo-lengɔ Gbia ti zangɔ e bere vɔrɔngɔ bɛ e na awangɔ ti ya Ngbangɔ.​—Zaki 5:14, 15.

Se e bɛ akwa mɛ abiazi ndo li ka bombi katɛ ko, ala nga na akwa mɛ ndɛ ka lɛ kwa bere ka nda sewa mɛ ndo gere na ngoi tɛ la gba. Ahũnda ya etɔndɔ akɔli niko mɛ ndo li kwa Kpengbani.​—1 Tesalonikɛ 5:12, 13.

• Akwa mɛ abiazi na ni ka bombi nɛ?

• Ala ndo da bɛ la na zo kɔi kɔi ka popo tɛrɛ e ngasia?