Ngbangɔ na yanga ti Grɛkɛ ndo di fani sĩni ili Barnabasi na apɔstrɔ Polo. Akɔli niko adundó awa batangɔ bombi mɛ ndo fɔ̃nɔ̃ fɔ̃nɔ̃, alengbi ya ala ndo dɔ nɔ̃ ndó ti bangɔ abombi ti kɔzoni. Lo nɛ? Na lo mɛ ya bɛ la ndo sɔ ndó ma ya ma na lo tɛ ayata la awa Kristo. Polo pandó ya ni ye “diringɔ bangɔ ayata” ti hĩngangɔ semɛ ala da. Lo ndó na gwɛ̃ ti dɔngɔ nɔ̃ akilomɛtrɛ ngbangbo ti kpengbangɔ na bɛ la. (Awa Pangɔ Kwa 15:36) Ye mɛ awa bangɔ ndó bombi mɛ ndo fɔ̃nɔ̃ fɔ̃nɔ̃ ti ngoi tɛ e ndo li la.

Ala ndo ga so kpengbangɔ na bɛ e. Wa bangɔ ndó kɛlɛ kɛlɛ ndo gini ti bangɔ abombi ma bere 20, ala ndo ba bombi kɔi na ya pɔsɔ fani sɛ na ya buru kɔi. E lengbi ti lwangɔ mbana gɛrɛ na ndo lɛlo tɛ la na awe la, se ala du na awe. Ala ndo ye hĩngangɔ nyita kɔi kɔi apalanga nga na akangba, ala ndo sepala nga gwengɔ ndo ni kɔi na e ka kwa ti fangɔ tɛnɛ nga na mandangɔ azi na Ngbangɔ. Awa bangɔ ndó bombi niko na abiazi ndo kpengba na bɛ e, ala ndo li nga adiskur mɛ ndo za ma ya ma ka bombi nga na ka kota bombi.​—Awa Pangɔ Kwa 15:35.

Ala ndo kpã bɛ la ndo azi zu. Awa bangɔ ndó kɛlɛ kɛlɛ ndo gi hĩngangɔ bere mangbi tɛ ayata ti bombi kɔi kɔi nzɔ̃ni na Nzapa. Ka bombi tɛ la ná abiazi na awa zangɔ na kwa ko, ala ndo ba semɛ bombi amai, ala ndo hɛ nga la wangɔ mɛ alengbi na kwa tɛ la. Ala ndo za awa sungɔ lége ya ala li kwa tɛ la na seni, ala ndo sepala nga hĩngangbingɔ na azi ti fanani nga na hĩngangɔ semɛ loyengɔ tɛ la ndo mai na ni. Kɔi na kɔi ka popo tɛ awa bangɔ ndó bombi ndo hɛ tɛrɛ lo nvɛ̃ni ti ‘lingɔ kwa ndoni kɔi na [e] so zangɔ [e].’ (2 Kɔrinto 8:23) E lengbi ti mandangɔ loyengɔ nga na gégégé tɛ la ka lɛ kwa tɛ Nzapa.​—Aebreo 13:7.

• Awa bangɔ ndó kɛlɛ kɛlɛ ndo gwe ti bangɔ abombi ndɛ lo nɛ?

• Mɔ lwa mbana gɛrɛ ti gangɔ tɛ la ka bombi tɛ ĩ ngasia?