WANGƆ 3

Asindó ndó bɛta lo ti Ngbangɔ fani mɛ ndɛ ngasia?

Linɔ́ngi ya Mosɛnzɛli ti uzu, 1879

Linɔ́ngi ya Mosɛnzɛli ti na olo mɛ

Ngbangɔ pandó ya na pɛ kwá tɛ Kristo ko, awa fangɔ nyɔ̃ Nzapa na nvɛ̃nɛ na singɔ ka popo tɛ awa Kristo ti kɔzoni ala nga na gbɛ̃ngɔ bɛta lo ti Ngbangɔ. (Awa Pangɔ Kwa 20:29, 30) So pɛni ko, ye mɛ ndó asi biani nvɛ̃ni bo la. Ala kuluwandó bɛta lo mɛ ndó Yezo ha na awangɔ tɛ apaganɔ, ni la asi na linɔ tɛ awa Kristo ti ili gɛgɛrɛ. (2 Timɔte 4:3, 4) Na olo mɛ e hĩnga ngasia ya e ndo gbɔ̃ nda ye mɛ Ngbangɔ ndo ha biani nvɛ̃ni nɛ?

Ngoi tɛ Yehova lengbindó ti fangɔ bɛta lo. Lo tɛnɛndó ya na ngoi ti ndani gbanda ko “bɛta hĩngangɔ ndo na tingɔ ma wo ma.” (Danyele 12:4) Na buru ti 1870, bombi yakere tɛ azi mɛ ndo gi bɛta lo ahĩngandó ya ye mɛ asambela gba ndo ye ta ndo lo ka ya Ngbangɔ ma. Ni la, ala bandandó gigingɔ ya ani gbɔ̃ nda bɛta lo ti ya Ngbangɔ mɛ ndó a há uzu, ni la Yehova za nga ndó la ya ala gbɔ̃ nda tɛnɛ ti ya Ngbangɔ.

Abɛta abɔrɔ amandandó Ngbangɔ kpa kpa kpa. Awa mandangɔ Ngbangɔ ko ti gégégé, alandó la aga uzu tɛ e, alandó na se kɔdɛ ti mandangɔ Ngbangɔ mɛ e na ni ndɛ. Alando bingbindó tɛnɛ na ndo li tɛnɛ kɔi kɔi ti ya Ngbangɔ. Ngoi mɛ ndó ala ndo tengbi na vɛrsɛ kɔi mɛ ta ala gbɔ̃ ndani ma ko, ala ndo bandó avɛrsɛ mɛ ndɛ ti kambisangɔ nda vɛrsɛ ni ko. Se nyɔ̃ la se kɔi ya amangbi na atanga tɛnɛ ti ya Ngbangɔ ko, ala ndo sundó ni. Na ziangɔ ya Ngbangɔ nvɛ̃ni kambisa tɛnɛ mɛ ka ya lo ko, ala sindó ndo bɛta lo mɛ aba ili Nzapa nga na Lo-lengɔ Gbia tɛ lo, ye mɛ lo ye na lo tɛ azi nga na lo ti lɛ sese, se mɛ awa kwáni dazu, nga na nzɔ̃ dangɔ bɛ ti songɔ kwá. Ye mɛ ala lwa na gigingɔ ahã ala ka gbɛ mbɛ ti yengɔ alo nga na akwa ti wawa.—Yoanɛ 8:31, 32, NW.

Na buru ti 1879 Awa Kalasi ti Ngbangɔ ahĩngandó ya ngoi alengbi ti fangɔ bɛta lo na azi. Na buru ni ko la, ala bandandó singɔ na zuluna mɛ e ndo si na ni tee ndɛ, Linɔ́ngi ya Mosɛnzɛli eyebisaka Bokonzi ya Yehova. E ndo fa na olo mɛ bɛta lo ti ya Ngbangɔ na azi ti kɔdɔrɔ 239 nga na ayanga gé ndo 700. Ta bɛta hĩngangɔ ndo adɛndó asɛkpɛ ngaso ma!

Na pɛ kwá tɛ Kristo, ye mɛ ndó asi na bɛta lo ti Ngbangɔ nɛ?
Ye mɛ zi lége hɛ e ti singɔ ndo bɛta lo ti tɛnɛ tɛ Nzapa fani mɛ ndɛ nɛ?