Ohatu vulika thiluthilu kOmbiimbeli ngele tashi ya pokudhimbulukwa “Uulalelo wOmuwa,” ano edhimbuluko lyeso lyaJesus. (1 Aakorinto 11:20) Mepingathano naashono, iinima oyindji mbyoka yi itaalwa nohayi ningwa komalongelokalunga galwe yi nasha nedhimbuluko, inayi ikolelela kOmbiimbeli.

 Elalakano lyUulalelo wOmuwa olyo okudhimbulukwa Jesus, tatu ulike olupandu lwetu, sho e tu sila. (Mateus 20:28; 1 Aakorinto 11:24) Edhimbuluko kali shi oshituthi shopalongelokalunga (esakramendi) kombinga yokusilwa ohenda nenge okudhiminwa po oondjo. a Ombiimbeli otayi longo kutya oondjo dhetu otadhi vulu okudhimwa po, okupitila owala mokukala tu na eitaalo muJesus, ihe hamiituthi yopalongelokalunga. — Aaroma 3:25; 1 Johannes 2:1, 2.

 Jesus okwa lombwela aalongwa ye ya dhane Uulalelo wOmuwa, ihe ina popya kondandalunde kutya lungapi. (Lukas 22:19) Yamwe oye wete kutya owu na okudhanwa momwedhi kehe, omanga yalwe haye wu dhana kehe koshiwike, esiku kehe, iikando yontumba mesiku nenge kehe ngaa iikando omuntu e uvite kutya oshi li mondjila. b Nonando ongawo, mpoka otapu landula iinima yimwe mboka tu na okutala.

 Jesus okwa dhika po Uulalelo wOmuwa mesiku lyOpaasa yOshijuda, na lwanima mesiku omo tuu moka okwa si. (Mateus 26:1, 2) Shika itashi kumitha. Omanyolo oga yelekanitha eyambo lyaJesus nonzigona yOpaasa. (1 Aakorinto 5:7, 8) Opaasa oya li hayi dhanwa lumwe momumvo. (Eksodus 12:1-6; Levitikus 23:5) Sha faathana, Edhimbuluko lyeso lyaJesus olya li hali dhimbulukwa lumwe momumvo kAakriste yopetameko, c nOonzapo dhaJehova ohadhi landula omulandu ngoka gwa kankamena kOmbiimbeli.

 Oshiholelwa shoka Jesus a tula po, ihashi tu kwathele owala tu mone kutya olungapi Edhimbuluko li na okudhanwa, ihe ohashi tu kwathele wo tu tale kutya uunake nethimbo peni li na okuningwa. Okwa li a dhiki po Uulalelo konima yeningino lyetango mo 14 Nisan 33 E.N., payalulo lyokalindeli kOmbiimbeli. (Mateus 26:18-20, 26) Otwa tsikila okudhana Edhimbuluko mesiku ndika omumvo kehe, twa landula oshiholelwa shoka twa tulilwa po kAakriste yopetameko. d

 Nonando omasiku 14 Nisan 33 E.N. oga li Etitano, oshituthidhimbuluko shoka omumvo kehe ohashi vulika shi gwile mesiku lyokoshiwike lyi ili. Ohatu tala kutya omesiku lini omasiku 14 Nisan taga gwile omumvo kehe, hatu longitha omukalo gwa faathana ngoka gwa li hagu longithwa pethimbo lyaJesus, pehala lyokulongitha omukalo ngoka hagu longithwa pakalindeli kOshijuda kongashingeyi. e

 Pedhano epe lyUulalelo wOmuwa, Jesus okwa li a longitha oshikwiila inaashi tulwa efulika nosho wo omaviinu omatiligane ngoka ga li ga hupa po puulalelo wOpaasa. (Mateus 26:26-28) Ohatu landula oshiholelwa she, mokulongitha oshikwiila inaashi tulwa efulika nenge sha shilwe nosho wo omaviinu omatigiligane inaaga tulwa sha, ihe hashikunwa shomandjembele (grape juice) nenge omaviinu ngoka ga tulwa osuuka nosho wo tuu.

 Omalongelokalunga gamwe ohaga longitha oshikwiila sha tulwa efulika, ihe olundji efulika olya longithwa mOmbiimbeli tali thaneke uulunde neyonuuko. (Lukas 12:1; 1 Aakorinto 5:6-8; Aagalati 5:7-9) Onkee ano, oshikwiila inaashi tulwa efulika nosho wo sha shilwe, osho owala tashi vulu okwoopalela mokuthaneka olutu lwaKristus kaalu na uulunde. (1 Petrus 2:22) Oshinima shimwe shoka itaashi popilwa kOmbiimbeli osho okulongitha oshikunwa shomandjembele (grape juice), pehala lyomaviinu. Oongeleka dhimwe ohadhi longitha oshikunwa shoka, molwaashoka dhi wete aniwa sha puka okulongitha omalovu, nonando Ombiimbeli inayi ga indika. — 1 Timoteus 5:23.

 Oshikwiila inaashi tulwa efulika nosho wo omaviinu omatiligane mbyoka hayi longithwa pEdhimbuluko oyi li omandhindhiliko ngoka taga thaneke olutu nombinzi yaKristus. Shika itashi ti nduno kutya omandhindhiliko ngaka oga li ga lunduluka pashikumithalonga e taga ningi olutu nombinzi ye yo yene, ngaashi yamwe taya ti. Tala shoka Omanyolo taga ti kombinga yaashika.

•   Ngele Jesus okwa li a lombwele aalongwa ye ya nwe ombinzi ye, ando kungawo okwe ya lombwele ya taaguluke ompango yaKalunga kombinga yelongitho lyombinzi. (Genesis 9:4; Iilonga 15:28, 29) Onkee shoka itashi vulika, molwaashoka Jesus ke na esiku a lombwele yalwe ya yone ompango yaKalunga yi na ko nasha nuuyapuki wombinzi. — Johannes 8:28, 29.

•   Ngele aayapostoli oya li ya nu ombinzi yaJesus yo yene, ando ina tya kutya ombinzi ye “tayi tilwahi,” shoka tashi ulike kutya eyambo lye olya li opo tali ka ningwa. — Mateus 26:28.

•   Ekuliloyambo lyaJesus olya holoka “lumwe aluke.” (Aahebeli 9:25, 26) Nonando ongawo, ngele oshikwiila nomaviinu oga li ga lundulukile molutu nomombinzi ye pethimbo lyUulalelo wOmuwa, ando mboka ya li ya kutha ombinga moku ga lya oye endulula eyambo ndyoka.

•   Jesus okwa ti: “Shi ningeni nokudhimbulukwa ndje,” ihe “hanokuyambela ndje.” — 1 Aakorinto 11:24.

 Mboka yi itaala kutya oshikwiila nomaviinu ohayi shituka ombinzi nolutu lwaJesus, edhiladhilo ndyoka olya kankamena kiitya yimwe mbyoka ya longithwa moovelise dhontumba dhOmbiimbeli. Pashiholelwa, momatoloko ogendji gOmbiimbeli Jesus okwa popiwa mo a ti kombinga yomaviinu: “Shika osho ombinzi yandje.” (Mateus 26:28) Nonando ongawo, oohapu dhaJesus ndhoka otadhi vulu wo okutolokwa: “Shika otashi ti ombinzi yandje,” “Shika otashi thaneke ombinzi yandje” nenge “Shika otashi ulike ombinzi yandje.” f Jesus okwa li ta longo aantu ta longitha omufethelamo, ngaashi a kala noku shi ninga poompito odhindji. — Mateus 13:34, 35.

 Uuna Oonzapo dhaJehova tadhi dhana Uulalelo wOmuwa, aantu owala yomwaalu omushona haya kutha ombinga mokulya oshikwiila nokunwa omaviinu. Omolwashike mbela?

 Omolwombinzi yaJesus ndjoka ya tika opwa li pwa totwa “ehangano epe,” ndyoka lya pingena po ehangano ndyoka lya li pokati kaJehova Kalunga noshigwana shaIsraeli shonale. (Aahebeli 8:10-13) Mboka yomehangano epe ohaya kutha ombinga mokulya nomokunwa omandhindhiliko ngoka haga longithwa pEdhimbuluko. Shika inashi kwatela mo Aakriste ayehe, ihe oomboka owala “mboka yi ithanwa kuKalunga” momukalo gwi ikalekelwa. (Aahebeli 9:15; Lukas 22:20) Mbaka otaya ka pangela pamwe naKristus megulu, nOmbiimbeli oya ti kutya aantu owala 144 000 ye na uuthembahenda mboka. — Lukas 22:28-30; Ehololo 5:9, 10; 14:1, 3.

 Mepingathano ‘noshigunda oshishona,’ ano mboka taya ka pangela pamwe naKristus, oyendji yomutse otu li oshitopolwa ‘shengathithi lyaantu’ nenge tu tye shongundu onene, ndjoka yi na etegameno lyoku ka kala nomwenyo sigo aluhe kombanda yevi. (Lukas 12:32; Ehololo 7:9, 10) Manga tse mboka tu na etegameno lyoku ka kala nomwenyo kombanda yevi ihaatu kutha ombinga mokulya nomokunwa omandhindhiliko ngoka haga longithwa pEdhimbuluko, opo hatu kala tu ulike olupandu lwetu, omolwekuliloyambo lyaJesus ndyoka e tu ningila. — 1 Johannes 2:2.