Oonzapo dhaJehova odhi itaala kutya omakotampango nosho wo omayele gOmbiimbeli, otaga vulu oku tu kwathela tu ninge omatokolo ngoka taga nyanyudha Kalunga notage tu etele uuwanawa. (Jesaja 48:17, 18) Hatse twa tota po omakotampango nomayele ngoka, ihe nonando ongawo, ohatu kala metsokumwe nago. Tala nkene gamwe ga kwatathana nokweendelathana. a

•   Ondjokana oshinima tashi kalelele. (Mateus 19:6) Oonzapo dhaJehova odha tala ko okweendelathana ku li onkatu ndjoka tayi fala mondjokana, nomolwaashono dhe ku tala ko ku li oshinima sha kwata miiti.

•   Aantu mboka ya koka noya gwana okuya mondjokana, oyo owala gwana okweendelathana. Aantu mboka ya ‘koka,’ ohaya kala ya pita mo momimvo ndhoka omuntu ha kala e na omahalo gopamilalo ge na oonkondo. — 1 Aakorinto 7:36.

•   Mboka taye endelathana, oya manguluka okuya mondjokana. Aantu yamwe mboka ya hengana paveta inaya talika ko kuKalunga ya gwana okuya ishewe mondjokana, molwaashoka omithikampango dhe otadhi ti kutya etompelo owala lyokuhengana, ongele kuume kopandjokana a yi moluhondelo. — Mateus 19:9.

•   Aakriste mboka ya hala okuya mondjokana, otaya ladhipikwa ya hokana owala mboka ye li nayo meitaalo limwe. (1 Aakorinto 7:39) Oonzapo dhaJehova odha tala ko oshipango shoka kutya oshu ukitha komuntu ngoka i itaala shoka yi itaala nohe shi tula miilonga e li Onzapo ya ninginithwa, ihe haangoka owala a simaneka eitaalo lyetu. (2 Aakorinto 6:14) Kalunga okwa kala aluhe nokulombwela oshigwana she shi hokana owala mboka ye li meitaalo lyawo. (Genesis 24:3; Maleaki 2:11) Aakonakoni yiinima kunena nayo oya mona kutya oshipango shoka otashi longo. b

•   Aanona oye na okuvulika kaavali yawo. (Omayeletumbulo 1:8; Aakolossa 3:20) Oshipango shoka osha kwatela mo aanona mboka ye li naavali yawo, ya vulike komatokolo gaavali yawo kombinga yokweendelathana. Shika otashi vulika shi kale sha kwatela mo kutya omwanamati nenge omwanakadhona oku na okweendelathana nagumwe e na omimvo ngapi noshike sha pitikwa okuningwa.

•   Shi ikolelela komanyolo, Oonzapo ohadhi hogolola dho dhene kutya uunake nonalye dha hala okweendelathana naye. Shika oshi li metsokumwe nekotampango ndika tali ti: “Kehe gumwe oku na okuhumbata ye mwene omutenge gwe.” (Aagalati 6:5) Nonando ongawo, uuna tashi ya pokweendelathana, oyendji ohaya katuka pandunge ya konge omayele kOonzapo ndhoka dha pyokoka nodhi na ko nasha nayo. — Omayeletumbulo 1:5.

•   Iinima oyindji mbyoka hayi ningwa kaantu mboka taye endelathana, oyi li eyono lya kwata miiti. Pashiholelwa, Ombiimbeli oye tu lombwela kutya natu yande omilalo dha nyata. Shika inashi kwatela mo owala omilalo, ihe niilonga yilwe ya nyata pokati kaantu inaaya hokana, ngaashi okukwatathana nokuthipathana kiilyo yoluvalo nosho wo uushenge. (1 Aakorinto 6:9-11) Nokuli nokugumathana momukalo ngoka tagu fala moluhondelo, oku li oshinima shoka inaashi ‘yogoka’ noshi tondike kuKalunga. (Aagalati 5:19-21) Oonkundathana ndhoka dha kwatela mo oohapu “oombwinayi” itadhi popilwa kOmbiimbeli. — Aakolossa 3:8.

•   Omutima omunamakoto. (Jeremia 17:9) Ohagu vulu okuningitha omuntu a ninge iinima mbyoka e shi kutya oya puka. Mboka taye endelathana oya pumbwa okuyanda okukala pehala oyo ayeke, opo omitima dhawo kaadhi ya pukithe. Otaya vulu okuyanda okupukithwa komitima dhawo, mokukala mpoka pu na aantu nenge ya kale po nomutitatu. (Omayeletumbulo 28:26) Aakriste mboka inaaya hokana taya kongo kuume kopandjokana, oye shi kutya osha nika oshiponga unene okweendelathana nomuntu ngoka kuu shi lela nawa, tashi vulika mwa tsakanene owala naye komakwatathano gopaintaneta ge na ko nasha nokweendelathana. — Episalomi 26:4.