Pethimbo lyOmbiimbeli, okwiidhilika iikulya okwa li kwa taambiwa ko kuKalunga, uuna taku ningwa neinyengotompelo ewanawa. Ihe ka li he ku hokwa, uuna kwa ningwa neinyengotompelo lya puka. Nonando ongawo, Ombiimbeli itayi lombwele aantu kunena yi idhilike iikulya.

• Uuna taya kongo ekwatho newiliko kuKalunga. Uuna aantu taya yi kuJerusalem, oya li hayi idhilike iikulya, opo ya ulike kutya oyi ifupipika sho taya pula Kalunga ekwatho. (Esra 8:21-23) Omathimbo nomathimbo, Paulus naBarnabas oya kala hayi idhilike iikulya, uuna taya hogolola aamwatate ya ninge aakuluntugongalo. — Iilonga 14:23.

• Uuna ya gandja eitulomo kelalakano lyaKalunga. Konima sho Jesus a ninginithwa, okwi idhilike iikulya uule womasiku 40, opo i ilongekidhile okulonga ehalo lyaKalunga pethimbo a li ta ka uvitha. — Lukas 4:1, 2.

• Uuna taya ulike kutya oyi iyela ombedhi, omolwomayono gawo gomonakuziwa. Kalunga okwa li a lombwele Aaisraeli mboka kaaye shi aadhiginini, okupitila momuhunganeki Joel, a ti: “Itedhululeni shili ngashingeyi, mu galukile kungame nokwiidhilika iikulya, nokulila nonokunika uuthigwa.” — Joel 2:12-15.

• Uuna ye li mEsiku lyEkwatakanitho. Ompango ndjoka Kalunga a li a pe oshigwana shaIsraeli, oya li ya kwatela mo elombwelo lyokwiidhilika iikulya mEsiku lyEkwatakanitho ndyoka lya li hali ningwa lumwe momumvo. * (Levitikus 16:29-31) Okwiidhilika iikulya okwa li kwo opalelela pompito ndjoka, molwaashoka okwa li haku dhimbulukitha Aaisraeli kutya inaya gwanenena noya pumbwa okudhiminwa po kuKalunga.

• Okufuula yalwe. Jesus okwa longa aantu kutya okwiidhilika iikulya kwopalongelokalunga, oku na okukala etokolo lyopaumwene noku na okukala pokati komuntu ye mwene naKalunga. — Mateus 6:16-18.

• Okuulika kutya ngoye omuyuuki. Okwiidhilika ihaku ningitha omuntu a kale i iwete a yogoka pamikalo nenge e na ekwatathano lya kola naJehova e vule yakwawo. — Lukas 18:9-14.

• Okukambadhala okufutila po eyono. (Jesaja 58:3, 4) Kalunga okwa li owala ha hokwa okwiidhilika kwaamboka haya vulika nohayi iyele ombedhi tashi zi komutima, omolwomayono gawo.

• Okudhiginina shoka tashi pulwa melongelokalunga. (Jesaja 58:5-7) Pompito ndjika, Kalunga okwa fa omuvali ngoka ha kala a yemata, uuna oyana taye mu ulukile ohole molwaashoka owala ye na oku shi ninga, ihe itashi zi komutima.

Aawe. Kalunga okwa li a tegelela Aaisraeli ya kale hayi idhilike iikulya mEsiku lyEkwatakanitho, ihe ompango ndjoka oya hulu po konima sho Jesus a sile aantu. (Aahebeli 9:24-26; 1 Petrus 3:18) Onkene Aakriste kaye li kohi yOmpango yaMoses, ndjoka ya li ya kwatela mo okudhimbulukwa Esiku lyEkwatakanitho. (Aaroma 10:4; Aakolossa 2:13, 14) Onkee ano, Omukriste kehe ota vulu okutokola ngele oti idhilike iikulya nenge hasho. — Aaroma 14:1-4.

Aakriste oye shi shi kutya okwiidhilika iikulya kaku shi oshinima shoka ye na okukala ya pititha komeho. Ombiimbeli inayi popya nando kutya okwiidhilika iikulya ohaku eta enyanyu. Mepingathano naashono, Aakriste mboka ye li melongelokalunga lyashili, ohaya kala ye na enyanyu, molwaashoka ohaya longele Jehova ngoka e li “Kalunga omunyanyukwi” — 1 Timoteus 1:11, NW; Omuuvithi 3:12, 13; Aagalati 5:22.

Euvoko lya puka: Aakriste oye na okwiidhilika iikulya sho taya dhimbulukwa omasiku 40, ngoka Jesus a kala i idhilika pethimbo a li mombuga konima yeninginitho lye.

Uushili: Jesus ina lombwela nando aalongwa ye yi idhilike iikulya, sho taya dhimbulukwa eso lye. (Lukas 22:14-18) Nonando okwa li a popi kutya aalongwa ye oya li taye ki idhilika ngele a si, ka li e ya tulile po ompango ya kale haye shi ningi, ihe okwa li owala ta popi shoka tashi ka ningwa konima yeso lye. (Mateus 9:15) Ombiimbeli oya lombwele Aakriste mboka ya li ya sa ondjala ya lye, manga inaaya ka gongala ya dhimbulukwe eso lyaJesus. — 1 Aakorinto 11:33, 34.