Aawe. Ombiimbeli otayi popi kutya otu na owala okugalikana kuKalunga, okupitila medhina lyaJesus. Jesus okwa lombwela aalongwa ye a ti: “One omu na okugalikana ngeyi: ‘Tate yetu, ngu u li megulu: Edhina lyoye nali yapulwe.’” (Mateus 6:9) Jesus ina longa nando aalongwa ye ya galikane kwaamboka ya talika ko aayapuki, kaayengeli nenge kugulwe kee shi Kalunga.

Jesus okwa lombwele wo aalanduli ye a ti: “Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame.” (Johannes 14:6) Jesus oye owala a tulwa po kuKalunga e li omupokati gwetu — Aahebeli 7:25.

Ongiini ngele ohandi galikana kuKalunga nokwaamboka ya talika ko aayapuki?

Kalunga okwa popya mIipango Omulongo a ti: “Ongame Omuwa, Kalunga koye, omulaadhi.” (Eksodus 20:5) Omomukalo guni Kalunga “omulaadhi”? Ombiimbeli yo-New American oya popya menyolo lyopevi kutya Kalunga okwa hala “okulongelwa oye awike.” Okwa hala tu shi ninge, naashoka osha kwatela mo oku mu galikana oye awike. — Jesaja 48:11.

Ohatu yemateke Kalunga, uuna tatu galikana kugumwe i ili kutya nduno okwaamboka ya talika ko aayapuki nenge okaayengeli aayapuki. Sho omuyapostoli Johannes a li a kambadhala okugalikana omuyengeli, omuyengeli okwe mu lombwele a ti: “Ino shi yelekela nando! Oshoka ngame omupiya mukweni nogwomooyakweni ayehe mboka haa dhiginine oshili ndjoka ya hololwa kuJesus. Galikana Kalunga.” — Ehololo 19:10.