Hasho nando. Omalongelokalunga agehe inaga faathana. MOmbiimbeli omwa popiwa iiholelwa oyindji yomalongelokalunga ngoka inaaga hokiwa kuKalunga. Ohaga ningi iinima iyali yi iwetikile.

Oshinima 1: Ohaga longele iikalunga

Ombiimbeli oya popya okulongela iikalunga ku li ‘oshinima showala.’ (Jeremia 10:3-5; 16:19, 20) Jehova * Kalunga okwa li a lombwele oshigwana shonale shaIsraeli, a ti: “Ino kala u na ookalunga yalwe koshipala shandje.” (Eksodus 20:3, 23; 23:24) Sho Aaisraeli ya li ya longele iikalunga, “Omuwa okwe ya geele.” — Numeri 25:3; Levitikus 20:2; Aatokolihapu 2:13, 14.

Nokunena, Kalunga iha kala a hokwa mboka taya longele iikalunga nenge nokuli “haku tiwa ookalunga.” (1 Aakorinto 8:5, 6; Aagalati 4:8) Okwa lombwela mboka ya hala oku mu longela, ye ethe po okweendathana naamboka yomelongelokalunga lyiifundja, a ti: “Zii mo mokati kawo, ne mu iyoolole mo muyo.” (2 Aakorinto 6:14-17) Ngele omalongelokalunga agehe oga faathana notaga kwathele aantu ya tseye Kalunga, omolwashike nduno Kalunga a gandja elombwelo ndyoka?

Oshinima 2: Ohaga longele Kalunga kashili momukalo moka inaa hokwa

Omathimbo gamwe, Aaisraeli oya li ya longele Kalunga taya longitha shoka shi itaalwa nohashi ningwa kwaamboka haya longele iikalunga. Nonando ongawo, Jehova ka li i idhidhimikile oku mu longela kwa tya ngawo, opo elongelokalunga lyashili kaa li vundakanithwe mumwe naandyoka lyiifundja. (Eksodus 32:8; Deuteronomium 12:2-4) Jesus okwa li a aneke pomutenya aawiliki yomalongelokalunga yopethimbo lye, omolwomukalo gwawo gwokulongela Kalunga; oya li ya fa haya simaneke Kalunga, ihe oya li aafudhime nohaya “etha iinenenima yomompango; uuyuuki, esilohenda nokwiinekelwa.” — Mateus 23:23.

Sha faathana, kunena elongelokalunga owala ndyoka lya kankamena koshili, hali kwathele aantu ya tseye Kalunga. Oshili ndjika otayi adhika mOmbiimbeli. (Johannes 4:24; 17:17; 2 Timoteus 3:16, 17) Omalongelokalunga ngoka haga longo iinima mbyoka tayi kondjithathana naashoka Ombiimbeli tayi ti, paushili wo wene ohaga hedhitha aantu kokule naKalunga. Omalongo ogendji ngoka aantu haya dhiladhila kutya oga za mOmbiimbeli, mwa kwatelwa Uukwatatu, omwenyo ihaagu si nosho wo okupya momulilo sigo aluhe, oga ziilila kwaamboka ya li haya longele iikalunga. Omalongelokalunga ngoka haga humitha komeho omalongo ngoka, oge li “osima yowala,” oshoka kungawo oga pingena po iitegelelwa yaKalunga nomithigululwakalo dhopalongelokalunga. — Markus 7:7, 8.

Kalunga oku tonde uufudhime womalongelokalunga. (Titus 1:16) Opo elongelokalunga li vule okukwathela aantu ya hedhe popepi naKalunga, aluhe oli na okukala hali ningi shoka shi li mondjila opo shi ya gume, ihe haku kakatela omikalondjigilile ndhoka kaadhi li metsokumwe naKalunga. Pashiholelwa, Ombiimbeli otayi ti: “Ngele oku na ngoka ta dhiladhila kutya ota longele Kalunga, ndele ita pangele okupopya kwe, nena elongelokalunga lye itali tompola sha, oti ifundjaleke owala. Elongelokalunga lya yela nolya yogoka koshipala shaKalunga Tate olyo okusila oshimpwiyu oothigwa naaselekadhi muudhigu wawo nokwiikotokela waa nyatekwe kuuyuni.” (Jakob 1:26, 27) Uutumbulilo “elongelokalunga lya yela” otawu ulike kutya ohali longele Kalunga moshili.