Ombiimbeli otayi shi ulike kutya oshi li nawa, nokuli nosha pumbiwa okukala wi ihole ngoye mwene pandjele. Okwiihola hoka okwa kwatela mo okwiisila oshimpwiyu, okwiisimaneka nokukala wu uvite wu na oshilonga. (Mateus 10:31) Pehala lyokukala wa pititha komeho okwiihola mwene, Ombiimbeli oya popya kutya owu okukala wu ihole ngiini.

Olye tu na okukala tu hole tango?

1. Otu na okukala tu hole Kalunga tango momitima dhetu. Ombiimbeli otayi ti kutya oshipango oshinene osho: “Hola Omuwa Kalunga koye komutima gwoye aguhe.” — Markus 12:28-30; Deuteronomium 6:5.

2. Oshipango oshitiyali oshinene osho: “Hola mukweni, ngaashi ngoye wi ihole mwene.” — Markus 12:31; Levitikus 19:18.

3. Nonando Ombiimbeli kayi na oshipango kondandalunde tashi ti kala wu ihole mwene, oshipango “hola mukweni, ngaashi ngoye wi ihole mwene” otashi ulike kutya omuntu okukala i ihole pandjele nokwi isimaneka, oshinima shi li mondjila notashi mu etele uuwanawa.

Jesus okwa li e hole lye tango?

Jesus okwa li ulike pandjele ohole yokuhola Kalunga, aantu, nokwiihola mwene nokwa lombwele aalongwa ye ya landule oshiholelwa she. — Johannes 13:34, 35.

1. Okwa li e hole Jehova Kalunga tango nokwa li a pititha komeho okugwanitha po oshilonga shoka E mu pa. Okwa ti: “Uuyuni ou na okutseya kutya ngame ondi hole Tate. Onkee otandi longo ayihe, ngaashi a lombwele ndje.” — Johannes 14:31.

2. Jesus okwa li e hole aantu, nokwe shi ulike okupitila moku ya sila oshimpwiyu painiwe nokuli sigo oponkatu yoku ya sila. — Mateus 20:28.

3. Okwa li a ulike kutya okwi ihole pandjele mokukutha ethimbo a vululukwe, a lye sha nokukala pamwe naalanduli ye naalongwa ye. — Markus 6:31, 32; Lukas 5:29; Johannes 2:1, 2; 12:2.

Mbela okukala wu hole yalwe tango otashi ku ningitha wu kale inoo nyanyukwa we nenge wi isimaneka?

Aawe, molwaashoka otwa shitwa oshifetha shaKalunga, ngoka uukwatya we wa tongomana ohole yokwaaihola mwene. (Genesis 1:27; 1 Johannes 4:8) Shika otashi ulike kutya otwa shitwa tu ulukile yalwe ohole. Otu na wo okukala tu ihole tse yene, ihe otatu ka kala twa nyanyukwa unene ngele otu hole Kalunga komeho gaayihe notwa gandja eitulomo kokulongela yalwe iilonga iiwanawa. Ngaashi Ombiimbeli tayi ti kutya “okugandja oku na elago ku vule okutaamba.” — Iilonga 20:35.

Kunene aantu oyendji ohaya ti kutya enyanyu ohali zi mokwiihola ngoye mwene. Kuyo, ‘okwiihola yo yoyene’ okwa pingena po ‘okuhola aantu ooyakwawo.’ Ihe, iimoniwa yopethimbo lyetu otayi shi ulike kutya uukolele wa hwepopala nenyanyu ohayi monika kwaamboka haya landula omayele ngaka gomOmbiimbeli gopandunge: “Inaku kala nando omuntu ta longo owala shoka she mu opalela, ihe na tale wo shoka tashi opalele mukwawo.” — 1 Aakorinto 10:24.