Omapangelo ogendji muuyuni oga tula po omilandu, opo pokati komuntu nomuntu pu kale pu na oshinano shontumba. Oga tula po wo omangambeko aantu kaaya gongale ya pitilila pomwaalu ngoka gwu uthwa. Oonzapo dhaJehova ohadhi vulika komilandu nomangambeko ngoka notadhi tsikile okugongala tadhi longitha omakwatathano gopaintaneta, ngaashi okulongitha opolohalama ndjoka hayi ithanwa Zoom.

 Olutuwiliki olwa gandja epitikilo, opo iimaliwa yomayambidhidho yi longithwe okulanda oolisinisa dhopolohalama Zoom, ndjoka ya gamenwa notayi vulu okulongithwa kaantu oyendji poshikando uuna ya gongala. Shika osha kwathela lela omagongalo gamwe ngoka ga li itaaga vulu okulanda olisinisa yokulongitha opolohalama Zoom, ndjoka yi na N$ 255.15 sigo 340.20, nenge oshimaliwa shi vulithe po ga tsikile okuninga okugongala. Omagongalo gamwe oga li haga longitha opolohalama yoshali ndjoka hayi pitike owala omwaalu gwaantu yontumba ye yi longithe poshikando, yo kayi shi okwiinekelwa. Omagongalo agehe ngoka taga longitha olisinisa yehangano yopolohalama Zoom ohaga mono mo lela uuwanawa, oshoka oya gamenwa naantu oyendji otaya vulu oku yi longitha poshikando shimwe. Sho tatu popi ngeyi, omagongalo ga konda 65 000, miilongo yi vulithe 170, ohaga longitha opolohalama Zoom.

 Egongalo lyaKairagi ndyoka li li moIndonesia, olya hulitha po okulongitha opolohalama Zoom yoshali nolya tameke okulongitha ndjoka ya landwa kehangano. Omumwatate Hadi Santoso, okwa ti: “Aamwatate naamwameme mboka kaaye shi naanaa okulongitha iikwaelektronika, nayo ohaya tyapula okugongala ngashingeyi, oshoka ihaya kala we taya gu mo mombepo pethimbo lyokugongala.”

 Omukuluntugongalo gwokoEcuador gwedhina Lester Jijón, Jr., okwa ti: “Omolwonkalo yuuhupilo miitopolwa yimwe moshilongo, omagongalo gamwe andola inaga vula okufuta olisinisa yopolohalama Zoom ndjoka tayi ke ya pitika ayehe ya gongale. Ngashingeyi, ohatu vulu okuhiya aantu twa mangulula ya gongale pamwe natse, oshoka katu na we uumbanda washa kutya pamwe otaya ka kala ya pitilila pomwaalu ngoka gwu uthwa okulongitha opolohalama Zoom.”

 Omukuluntugongalo gwedhina Johnson Mwanza, megongalo lyaNgwerere, moLusaka, moZambia, okwa ti: “Aamwatate naamwameme oyendji oya popya kutya ‘elongekidho ndyoka lya ningwa po kehangano opo ku longithwe opolohalama Zoom inali tu hedhitha owala popepi naamwatate naamwameme, ihe olye tu ningitha wo tu kale tu uvite kutya Jehova oku tu hole noku na ko nasha natse.’”

 Ehangano olya landa oolisinisa ndhoka tali longitha oshimaliwa okuza moshiketha shokukwathela mboka ya dhengwa kiiponga yopaunshitwe. Iimaliwa mbyoka ohayi zi momayambidhidho gehalo ewanawa ngoka haga gandjwa okupitila kepandja lyetu lyokointaneta, ko-donate.isa4310.com. Otwa pandula noonkondo komayambidhidho geni gehalo ewanawa, ngoka haga longithwa wo mokugandja iikwatha yi ili noyi ili muuyuni auhe.—2 Aakorinto 8:14.