PaMateus 15:1-39
15 Opo nduno Aafarisayi naalongimpango ya za kuJerusalem, oye ya kuJesus, taya ti:
2 “Omolwashike aalongwa yoye ihaaya dhiginine oonkuluhedhi dhaakulu yonale? Pashiholelwa, ihaya iyogo kiikaha, uuna taya li.”
3 Jesus okwe ya yamukula ta ti: “Ne omolwashike hamu yono ompango yaKalunga omolwoonkuluhedhi dheni?
4 Pashiholelwa, Kalunga okwa ti: ‘Simaneka ho nanyoko, naangoka ta tuku* he, nenge yina, na dhipagwe.’
5 Ihe ne ohamu ti, ‘Kehe ngoka ta ti kuhe, nenge kuyina: “Shoka nda li ndi na oku ku pa onde shi yambela Kalunga,”
6 ina pumbwa nando okusimaneka he.’ Onkee ano oohapu dhaKalunga omwe dhi kutha oonkondo omolwoonkuluhedhi dheni.
7 Aafudhime ne, Jesaja okwa hunganeke oshili kombinga yeni, sho a ti:
8 ‘Aantu mbaka ohaya simaneke ndje owala mokana, ihe omitima dhawo odhi li kokule nangame.
9 Okulongela ndje kwawo osima yowala, oshoka shoka haya longo oshi ikolelela komalongo gopantu.’”
10 Nziya konima yaashono, okwa lombwele ongundu yaantu yi hedhe popepi e ta ti kuyo: “Pulakeneni e tamu uvu ko oohapu ndhika:
11 Shoka hashi yi mokana komuntu hasho hashi mu nyateke, ihe oha nyatekwa kwaashoka hashi zi mokana ke.”
12 Opo nduno aalongwa ye oye ya kuye e taya ti: “Owa ndhindhilika ngaa kutya Aafarisayi oya uvithwa nayi kwaashoka wa popi?”
13 Okwe ya yamukula a ti: “Kehe omuti ngoka inaagu tsikwa kuTate gwomegulu, otagu ka vudhwa mo.
14 Ya etheni, ya kale ngaaka. Oyo aakwatiketi aaposi. Ngele omuposi ta kwata keti omuposi omukwawo, nena ayehe yaali otaya gwile melambo.”
15 Petrus okwa ti kuye: “Tu fatululila ethaneko ndyoka.”
16 Opo ihe Jesus okwe mu yamukula a ti: “Nani nane kamu uvite ko natango?
17 Kamu shi nani kutya kehe shoka tashi yi mokana otashi yi mela e tashi piti mo?
18 Ihe kehe shoka tashi zi mokana ohashi zi momutima, sho osho hashi nyateke omuntu.
19 Pashiholelwa, momutima omo hamu zi omadhiladhilo omawinayi, omadhipago, oluhondelo, omilalo dha nyata, uufuthi, iifundja nomasheko.
20 Iinima mbika oyo hayi nyateke omuntu; ihe okulya inoo iyoga kiikaha hako haku nyateke omuntu.”
21 Sho Jesus a zi po mpoka, okwa yi koshitopolwa shaTiro naSidon.
22 Opo nduno omukiintu Omufoinikia gwomoshitopolwa shoka, okwe ya kuye e te mu lilile ta ti: “Omuwa, Omuna gwaDavid, sila ndje ohenda. Omumwandjekadhona oku na ondemoni tayi mu monitha iihuna noonkondo.”
23 Ihe Jesus ina tya sha nando kuye. Onkee ano aalongwa oye ya kuye e taye mu indile taya ti: “Mu laleka a ye, oshoka okwe tu landula owala te tu lilile.”
24 Jesus okwa yamukula a ti: “Inandi tuminwa kaantu yalwe, ihe okoonzi ndhoka dha kana, dhomegumbo lyaIsraeli.”
25 Ihe omukiintu okwe ya kuye, nokwe mu tsile oongolo, ta ti: “Omuwa, kwathela ndje!”
26 Jesus okwe mu yamukula a ti: “Kashi li mondjila okukutha oshikwiila shuunona noku shi umbila uumbwena.”
27 Okwa ti kuye: “Eeno, Omuwa, ihe uumbwena ohawu li uundjagumuke mboka tawu gu poshitaafula shooyene yawo.”
28 Opo nduno Jesus okwe mu yamukula ta ti: “Eitaalo lyoye enene; ningilwa shoka to pula.” Pethimbo olyo tuu ndyoka, omwanakadhona okwa aluka.
29 Sho Jesus a zi po mpoka, okwe ya popepi nefuta lyaGalilea, naasho a londo kondundu, okwa kala a kuutumba hoka.
30 Opo ihe ongundu onene yaantu oye ya kuye, ya eta iitiningili, iilema, aaposi, aathitawi nosho wo yalwe oyendji, noye ya tula poompadhi dhe e te ya aludha.
31 Onkee ano ongundu yaantu oya li ya kumwa e tayi hambelele Kalunga kaIsraeli, sho ya mono aathitawi taya popi, iilema tayi aluka, iitiningili tayi ende naaposi ye wete ko.
32 Ihe Jesus okwa ithana aalongwa ye e ta ti kuyo: “Onda etela ohenda ongundu ndjika yaantu, oshoka pungame oya kala po nale omasiku gatatu, nokaye na iikulya. Inandi hala oku ya laleka inaaya lya sha, oshoka otashi vulika ya kambukile mondjila.”
33 Ashike aalongwa oya ti kuye: “Sho tu li kehala lyokokule ngeyi, openi tatu adha iikwiila ya gwana okupalutha ongundu onene yaantu yi thike mpaka?”
34 Jesus okwa ti kuyo: “Omu na po iikwiila ingapi?” Oya ti: “Iheyali, nuuhi uushona.”
35 Onkee ano konima sho a lombwele ongundu yaantu yi kuutumbe pevi,
36 okwa kutha iikwiila iheyali noohi, nokonima sho a galikana, okwe yi pambula e ta tameke oku yi pa aalongwa ye, naalongwa oye yi gandja kongundu yaantu.
37 Ayehe oya li noya kuta, naalongwa oya gongele iipambu mbyoka ya hupu po ya udha iimbamba iinene iheyali.
38 Mboka ya li, oya li aalumentu 4 000 nosho wo aakiintu naanona.
39 Hugunina, sho a laleke ongundu yaantu, okwa londo mowato e ta yi koshitopolwa shaMagadan.
Omanyolo gopevi
^ Nenge “ta ula nayi.”
