PaLukas 4:1-44
4 Opo nduno Jesus okwa zi komulonga gwaJordan a udha ombepo ondjapuki, noye mu fala mombuga.
2 Okwa kala mo uule womasiku 40 ta makelwa kOndiyapoli. Momukokomoko gwomasiku ngoka, ka li a li sha, onkee sho ga pu ko, okwa li a sa ondjala.
3 Opo ihe Ondiyapoli oya ti kuye: “Ngele ngoye omuna gwaKalunga shili, lombwela omamanya ngaka ga shituke iikwiila.”
4 Ihe Jesus okwe mu yamukula a ti: “Okwa nyolwa, ‘Hakoshikwiila owala omuntu ta kala e na omwenyo.’”
5 Onkee ano Ondiyapoli oye mu fala kondundu, noye mu ulukile omaukwaniilwa agehe gokombanda yevi mepathimo lyeho.
6 Opo nduno Ondiyapoli oya ti kuye: “Otandi ku pe omaukwaniilwa agehe ngaka nesimano lyago, oshoka onde ga pewa, notandi vulu oku ga pa kehe ngoka nda hala.
7 Onkee ano ngele owa tsile ndje oongolo e to galikana ndje, otandi ge ku pe agehe.”
8 Jesus okwe mu yamukula a ti: “Okwa nyolwa, ‘Jehova Kalunga koye oye awike wu na okwiinyongamena noku mu galikana, noye awike wu na oku mu longela iilonga iiyapuki.’”
9 Opo nduno oye mu fala kuJerusalem e tayi mu londeke kondungu yekuma lyotempeli, noye mu lombwele tayi ti: “Ngele ngoye omuna gwaKalunga shili, iyumbila pevi,
10 oshoka okwa nyolwa: ‘Ote ku tumine aayengeli ye ye ku gamene,
11 notaye ke ku hakela, opo waa pume nando ompadhi yoye kemanya.’”
12 Jesus okwe mu yamukula a ti: “Okwa tiwa: ‘Ino makela* Jehova, Kalunga koye.’”
13 Onkee ano sho Ondiyapoli ya mana oku mu makela, oya zi po puye e tayi tegelele ishewe yi mone ompito yilwe tayi opalele.
14 Opo nduno Jesus okwa shuna kuGalilea a udhithwa ombepo ondjapuki, nehokololo li na ko nasha niilonga ye iiwanawa olya taandele momikunda adhihe dhopuushiinda.
15 Shimwe ishewe, okwa tameke okulonga aantu moosinagoga dhawo, nokwa li a simanekwa kaantu ayehe.
16 Okuza mpono, okwa yi kuNasaret, hoka a putukila, nokwa yi mosinagoga e ta thikama a leshe, ngaashi he shi ningi shito mEsabati.
17 Onkee ano okwa pewa ondhingambo yomuhunganeki Jesaja, nokwe yi gonyununa e ta yi mpoka pwa nyolwa oohapu tadhi ti:
18 “Ombepo yaJehova oyi li kombanda yandje, oshoka okwa gwayeka ndje ndi uvithile oohepele onkundana ombwanawa. Okwa tumu ndje ndi tseyithile oonkwatwa emangululo, ndi tsikulule aaposi, ndi mangulule oonakuhepekwa,
19 nondi uvithe kutya ethimbo lyaJehova lyokusila aantu ohenda* olya thika.”
20 Opo ihe okwa gonyo ondhingambo ndjoka, te yi shunitha kungoka e yi mu pe e ta kuutumba, naantu ayehe, mboka ya li mosinagoga oya li ye mu tala, taye mu tongolola.
21 Opo nduno okwa tameke oku ya lombwela ta ti: “Nena ndjika, enyolo, ndika mwa uvu, olya gwanithwa.”
22 Opo ihe aantu ayehe oya tameke oku mu popila muuwanawa, noya li ya kuminwa oohapu dhe oombwanawa e taya ti: “Nguka ke shi nani omuna gwaJosef?”
23 Opo nduno okwa ti kuyo: “Ondi shi kutya omwa hala okuula ndje oohapu ndhika, tadhi ti: ‘Mwaaludhi, iyaludha mwene. Longa wo moshitopolwa shaandjeni iilonga, mbyoka twa uvu wa longo muKapernaum.’”
24 Opo ihe Jesus okwa ti kuyo: “Otandi mu lombwele oshili kutya omuhunganeki iha taambiwa ko moshitopolwa shaandjawo.
25 Ihe oshili tandi mu lombwele: MuIsraeli omwa li aaselekadhi oyendji pethimbo lyaElia, sho omvula ya li inaayi loka uule womimvo ndatu noomwedhi hamano, nomoshilongo ashihe omwa li ondjala yekomba.
26 Ihe Elia ina tuminwa nando okugumwe gwomaakiintu mboka, ihe okomuselekadhi owala gwokuSarefat, muSidon.
27 Shimwe ishewe, pethimbo lyomuhunganeki Elisa, muIsraeli omwa li aanashilundu oyendji, ihe kapu na nando ogumwe gwomuyo a li a aludhwa,* kakele kaNaeman, Omusiria.”
28 Aantu ayehe, mboka ya li mosinagoga sho ya uvu oohapu ndhoka, oya geye noonkondo,
29 noya thikama e taye mu tidha mo moshilando shawo, ye mu ukitha kolungenge lwondundu, hoka sha li sha tungilwa, nelalakano lyoku mu undulila pevi.
30 Ihe okwa piti mokati kawo e ta yi.
31 Opo nduno okwa yi kuKapernaum, oshilando shomuGalilea, nokwa kala ta longo aantu mesiku lyEsabati,
32 naantu oya li ya kuminwa omukalo gwe gwokulonga, oshoka okwa li ta popi ongomuntu e na oonkondopangelo.
33 Mosinagoga omwa li mu na omulumentu e na ombepo ya nyata, ano e na ondemoni, nokwa igidha mokule ta ti:
34 “Ai! Jesus Omunasareti, owe tu halela shike? Owe ya wu tu hanagule po? Ondi shi shi lela kutya ongoye lye. Ongoye Omuyapuki gwaKalunga.”
35 Ihe Jesus okwe yi ganda ta ti: “Mwena e to zi mo muye!” Konima sho ondemoni ya umbile omulumentu ngoka pevi mokati kawo, oya zi mo muye kaapu na oku mu monitha oshiponga.
36 Opo ihe aantu ayehe oya li ya kumwa noya tameke okulombwelathana taya ti: “Oohapu dhe kadhi na tuu oonkondo? Okwa popi owala lumwe, oombepo dha nyata* dhi ze mo, nodha zi mo.”
37 Onkee ano ehokololo kombinga ye olya taandele apuhe momikunda dhopuushiinda.
38 Konima sho a zi mo mosinagoga, okwa yi kegumbo lyaSimon. Pethimbo mpoka, yinamweno yaSimon okwa li ta hepekwa koshivu, noya pula Jesus e mu kwathele.
39 Onkee ano okwa hedha puye e ta ganda uuvu, nowa zi mo muye. Nziya omukiintu ngoka okwa thikama nokwa tameke oku ya yakula.
40 Ihe etango sho lya ningine, aantu ayehe, mboka ya li ye na aantu ye na omikithi dhi ili nodhi ili, oye ya eta kuJesus. Sho ayehe e ya tenteke iikaha ye, oya aluka.
41 Okwa tidha mo wo oondemoni maantu oyendji, nodha li tadhi igidha tadhi ti: “Ongoye Omuna gwaKalunga!” Ihe okwe dhi ganda noina etha dhi popye, oshoka odha li dhi shi kutya oye Kristus.
42 Ongula sho kwa shi, okwa zi po puyo e ta yi kehala lya ikalela. Ihe ongundu yaantu oya tameke oku mu konga, naasho ye mu mono, oya kambadhala oku mu keelela kaa ze po puyo.
43 Ihe okwa ti kuyo: “Ondi na wo oku ka uvitha onkundana ombwanawa yUukwaniilwa waKalunga kiilando yilwe, oshoka shika osho nda tuminwa.”
44 Onkee ano okwa yi, nokwa uvithile moosinagoga dhomuJudea.
Omanyolo gopevi
^ Nenge “ino tala po.”
^ Nenge “omumvo gwaJehova gweyambeko.”
^ Nenge “a yelithwa.”
^ Nenge “oondemoni.”
