PaJohannes 6:1-71
6 Konima yaashika, Jesus okwa yi handiyaka yefuta lyaGalilea, ndyoka hali ithanwa wo Tiberias.
2 Opo nduno ongundu onene yaantu oya kala ye mu landula, molwaashoka oya li ya mono iikumithalonga mbyoka a longo, sho a aludha aavu.
3 Onkee ano Jesus okwa londo kondundu e ta kala a kuutumba hoka naalongwa ye.
4 Pethimbo mpoka, Opaasa, ano oshituthi shAajuda, osha li shi li popepi.
5 Sho Jesus a yelutha omeho ge e ta mono ongundu onene yaantu ya uka kuye, okwa ti kuFilippus: “Openi tatu ka landela aantu mbaka iikwiila ya lye?”
6 Molwaashoka Jesus okwa li e shi shoka a li poku ka ninga po, okwa pula Filippus ngawo, opo e mu tale po.
7 Filippus okwe mu yamukula ta ti: “Nonando otu lande iikwiila yoondenari 200, itayi gwana okukutitha aantu mbaka nandonando.”
8 Gumwe gwomaalongwa ye, Andreas, omumwayina gwaSimon Petrus, okwa ti kuye:
9 “Mpaka opu na okamati ke na iikwiila itano noohi mbali oonshona. Mbela otayi gwana ngaa aantu oyendji ye thike mpano?”
10 Jesus okwa ti: “Lombweleni aantu ya kuutumbe.” Molwaashoka pehala mpoka opwa li omwiidhi ogundji, aantu oya kuutumba mpoka, nomongundu ndjoka yaantu omwa li aalumentu 5 000 lwaampono.
11 Konima sho Jesus a galikana, okwa kutha iikwiila e te yi topolele aantu mboka ya li ya kuutumba mpoka, nokwa ningi wo sha faathana noohi, naantu ayehe oya li noya kuta.
12 Ihe sho aantu ya li e taya kuta, okwa ti kaalongwa ye: “Gongeleni iipambu mbyoka ya hupu po, opo pwaa hepe nando osha.”
13 Onkee ano oye yi gongele, noya udha iimbamba 12 niipambu mbyoka ya hupithwa po kwaamboka ya li iikwiila itano.
14 Sho aantu ya mono oshikumithalonga shoka, oya tameke taya ti: “Nguka oye shili omuhunganeki ngoka a li e na okuya muuyuni.”
15 Opo nduno sho Jesus a dhimbulula kutya aantu oye li pokuya ye mu ninge omukwaniilwa kethiminiko, okwa shuna kondundu oye awike.
16 Sho kwa toko, aalongwa ye oya yi kefuta,
17 noya yi mowato e taya taaguluka efuta ya uka kuKapernaum. Ihe okwa li kwa luudha, na Jesus ka li natango e ya kuyo.
18 Shimwe ishewe, efuta olya li tali ende tali pindjala, oshoka okwa li ombepo ondhigu tayi pepe.
19 Ihe sho ya dhugu owato yawo oshinano shookilometa ntano, nenge hamano lwaampono,* oya mono Jesus ta ende kombanda yomeya, ta hedha popepi nowato yawo, noya tameke okukala ya tila.
20 Ihe okwa ti kuyo: “Ongame; inamu tila!”
21 Opo ihe oya li ya hala Jesus a londe mowato yawo, ihe oya thiki nziya kehala hoka ya li ya uka.
22 Esiku lya landula ko, ongundu yaantu ndjoka ya li ya thigala handiyaka yefuta, oya mono kutya pomunkulofuta kapu na oowato nosho wo kutya aalongwa ye oya yi oyo ayeke nokawato hoka okashona, ihe Jesus ina ya pamwe nayo.
23 Ihe sho ye ya popepi nehala mpoka ya lile iikwiila konima sho Omuwa a galikana, opwe ya oowato dha zi kuTiberias.
24 Onkee ano sho ongundu yaantu ya mono kutya Jesus naalongwa ye kaye mo moowato ndhoka, oya yi moowato dhawo yene e taya yi kuKapernaum, ya ka konge Jesus.
25 Sho ye mu adha handiyaka yefuta, oya ti kuye: “Muhongi,* owe ya ko uunake huka?”
26 Jesus okwe ya yamukula ta ti: “Oshili tandi mu lombwele, ne itamu kongo ndje molwaashoka mwa mono iikumithalonga, ihe omolwaashoka mwa li iikwiila e tamu kuta.
27 Inamu longela iikulya mbyoka tayi hulu po, ihe longeleni iikulya mbyoka ihaayi hulu po, mbyoka tayi ke mu petha omwenyo gwaaluhe, mbyoka Omuna gwomuntu te yi mu pe. Oshoka He, Kalunga ye mwene, okwa tula Omwana oshihako, shoka tashi ulike kutya okwe mu hokwa.”
28 Onkee ano oya ti kuye: “Oshike tu na okuninga, tu longe ehalo lyaKalunga?”
29 Jesus okwe ya yamukula a ti: “Ehalo lyaKalunga olyo ndika, ano mu ulike kutya omu na eitaalo mwaangoka a tuma.”
30 Opo nduno oya ti kuye: “Oto tu ulukile endhindhiliko lini, opo tu li mone, notu ku itaale? Oto tu ulukile oshikumithalonga shini?
31 Ootatekulululwa oya lile omanna mombuga, ngaashi owala kwa nyolwa taku ti: ‘Okwe ya pe iikwiila okuza megulu, ya lye.’”
32 Opo nduno Jesus okwa ti kuyo: “Oshili tandi mu lombwele, Moses ine mu pa oshikwiila sha za megulu, ihe Tate oye te mu pe oshikwiila shashili sha za megulu.
33 Oshoka oshikwiila shaKalunga oye ngoka a za megulu, opo a gandje omwenyo kuuyuni.”*
34 Onkee ano oya ti kuye: “Omuwa, tu pa aluhe oshikwiila shoka.”
35 Jesus okwa ti kuyo: “Ongame oshikwiila shomwenyo. Kehe ngoka te ya kungame ita ka sa we ondjala nandonando, nakehe ngoka ta ulike kutya oku na eitaalo mungame ita ka sa we enota nandonando.
36 Ihe ngaashi owala nde mu lombwelele, nokuli nando omwa mona ndje, natango inamu itaala ndje.
37 Ayehe mboka Tate a pa ndje, otaye ya kungame, noitandi ka tidha po nando ogumwe ngoka te ya kungame.
38 Oshoka onda za megulu, ndi ye ndi longe ehalo lyaangoka a tuma ndje, ihe halyandje mwene.
39 Ngoka a tuma ndje ina hala ndi kanithe nando ogumwe gwomwaamboka a pa ndje, ihe okwa hala ndi ke ya yumudhe mesiku lyahugunina.
40 Oshoka Tate okwa hala kehe ngoka a taamba ko Omwana nota ulike kutya oku na eitaalo muye, a ka mone omwenyo gwaaluhe, notandi ke mu yumudha mesiku lyahugunina.”
41 Opo nduno Aajuda oya tameke okungungutula kombinga ye, molwaashoka okwa ti: “Ongame oshikwiila shoka sha za megulu.”
42 Opo ihe oya tameke taya ti: “Nguno haye ano Jesus, omuna gwaJosef, ngoka he nayina tu shi? Omolwashike nduno ta ti, ‘Onda za megulu’?”
43 Jesus okwe ya yamukula a ti: “Inamu ngungutula we.
44 Kapu na ngoka ta vulu okuya kungame, okuninga Tate, ngoka a tuma ndje, te mu nana,* notandi ke mu yumudha mesiku lyahugunina.
45 Aahunganeki oya nyola taya ti: ‘Ayehe otaya ka longwa kuJehova.’ Kehe ngoka ta pulakene nokutaamba ko oohapu dhaTate ote ya kungame.
46 Kapu na nando omuntu a mona Tate, kakele kungoka a zi kuKalunga; nguka oye a mona Tate.
47 Oshili tandi mu lombwele, kehe ngoka ta itaale, ota ka mona omwenyo gwaaluhe.
48 “Ongame oshikwiila shomwenyo.
49 Oohokulululwa oya lile omanna mombuga, ihe nonando ongawo, oya si.
50 Shika osho oshikwiila, shoka sha za megulu, nakehe ngoka te shi li, ita si.
51 Ongame oshikwiila shomwenyo, shoka sha zi megulu. Kehe ngoka ta li oshikwiila shoka ota kala sigo aluhe. Nokuli oshikwiila, shoka tandi gandja, osho olutu lwandje, ndwoka talu gandjwa omolwoomwenyo dhaantu.”*
52 Opo nduno shika osha eta oontamanana mokati kAajuda, noya pulathana taya ti: “Omulumentu nguno ota vulu ngiini oku tu pa olutu* lwe, tu lu lye?”
53 Onkee ano Jesus okwa ti kuyo: “Oshili tandi mu lombwele, ngele itamu li olutu* lwOmuna gwomuntu nokunwa ombinzi ye, itamu ka mona omwenyo.*
54 Kehe ngoka ta li olutu* lwandje nokunwa ombinzi yandje ota ka mona omwenyo gwaaluhe, notandi ke mu yumudha mesiku lyahugunina.
55 Oshoka olutu* lwandje iikulya yashili, nombinzi yandje oshikunwa shashili.
56 Kehe ngoka ta li olutu* lwandje nokunwa ombinzi yandje, ota kala a hangana* nangame, notandi kala nda hangana naye.
57 Ngaashi owala Tate omunamwenyo a tuma ndje, nondi li po omolwe, kehe ngoka wo ta li olutu* lwandje ota kala nomwenyo omolwandje.
58 Shika osho oshikwiila, shoka sha za megulu. Kashi shi shoka oohokulululwa ya lile, ihe oya si. Kehe ngoka ta li oshikwiila shika ota kala nomwenyo sigo aluhe.”
59 Jesus oohapu ndhoka okwe dhi popi sho a li ta longo aantu mosinagoga* muKapernaum.
60 Sho oyendji yomaalongwa ye ye shi uvu, oya ti: “Oohapu ndhika oonene, itatu vulu oku dhi pulakena!”
61 Ihe sho Jesus a dhimbulula kutya aalongwa ye oya li taya ngungutula kombinga yoshinima shoka, okwa ti kuyo: “Mbela shoka nda popi oshe mu pundukitha?*
62 Ongiini nduno ngele omwa mono Omuna gwomuntu ta londo ta shuna hoka a zile?
63 Ombepo oyo tayi gandja omwenyo; olutu* kalu na oshilonga shasha. Oohapu ndhoka nde mu lombwele, odha za mombepo ondjapuki, notadhi gandja omwenyo.
64 Ihe opu na yamwe yomune kaamu na eitaalo.” Okuza petameko Jesus okwa kala nale e shi mboka kaaye na eitaalo nosho wo kutya olye te ke mu gwaaleka.
65 Okwa tsikile ko ta ti: “Nomolwaashono nde mu lombwele kutya kapu na ngoka ta vulu okuya kungame, okuninga Tate te shi pitike.”
66 Omolwoshinima shoka, oyendji yomaalongwa ye oya etha po oku mu landula e taya shuna kiinima mbyoka ya li ya thiga po.
67 Onkee ano Jesus okwa ti kaayapostoli ye 12: “Ne inamu hala okuya?”
68 Simon Petrus okwe mu yamukula ta ti: “Omuwa, otatu yi kulye? Ongoye wu na oohapu dhomwenyo gwaaluhe.
69 Otwa itaala, notu shi kutya ongoye Omuyapuki gwaKalunga.”
70 Jesus okwa ti kuyo: “Inandi mu hogolola nani mu li 12? Ihe gumwe gwomune omulundili.”*
71 Jesus okwa li ta popi kombinga yaJudas, omuna gwaSimon Iskariot, molwaashoka oye a li te ke mu gwaaleka, nonando okwa li gumwe gwomaayapostoli 12.
Omanyolo gopevi
^ Eln., “shi thike puupale 25 nenge 30 lwaampono.“
^ Nenge “Rabbi.”
^ Nenge “kaantu.”
^ Nenge “eta.”
^ Eln., “dhuuyuni.”
^ Nenge “onyama.”
^ Nenge “onyama.”
^ Eln., “kamu na omwenyo mune yene.”
^ Nenge “onyama.”
^ Nenge “onyama.”
^ Nenge “onyama.”
^ Nenge “muukumwe.”
^ Nenge “onyama.”
^ Nenge “mehala lyaayehe lyokugongalela.”
^ Nenge “uvitha nayi.”
^ Nenge “onyama.”
^ Nenge “ondiyapoli.”
