Iilonga yaayapostoli 6:1-15
6 Pethimbo ndyoka, sho omwaalu gwaalongwa gwa li tagu ende tagu indjipala, Aajuda mboka ya li haya popi Oshigreka, oya tameke okunyenyeta kombinga yAajuda, mboka ya li haya popi Oshihebeli, molwaashoka aaselekadhi yawo kaya li haya pewa iikulya, mbyoka ya li hayi gandjwa kehe esiku.
2 Onkee ano aayapostoli 12 oya ithana aalongwa ayehe pamwe, noya ti: “Kashi li mondjila* tu ethe po okulonga aantu oohapu dhaKalunga, tu ka topolele aantu iikulya.
3 Onkee ano, aamwatate, hogololeni mokati keni aalumentu yaheyali, ye shi okwiinekelwa,* ya udha ombepo ondjapuki nuunongo, opo tu ya langeke po, ya gwanithe po oshilonga shika;
4 ihe tse otatu tsikile okugalikana, nokulonga aantu oohapu dhaKalunga.”
5 Shoka ya popi, aalongwa ayehe, oya li ye shi hokwa, noya hogolola Stefanus, omulumentu e na eitaalo nombepo ondjapuki, nosho wo Filippus, Prokorus, Nikanor, Timon, Parmenas nosho wo Nikolaus gwokuAntiokia, ngoka a ningi gweitaalo lyOshijuda.
6 Aalumentu mboka oye ya eta kaayapostoli, nokonima sho aayapostoli ya galikana, oya tenteke aalumentu mboka iikaha yawo.
7 Onkee ano oohapu dhaKalunga odha tsikile okutaandela, nomwaalu gwaalongwa ogwa kala nokwiindjipala noonkondo muJerusalem; nongundu onene yaayambi oya ningi ooitaali.
8 Stefanus, ngoka a li a hokiwa unene kuKalunga, nokwe mu pe oonkondo oonene, okwa li ta longo iikumithalonga iinene niilongankondo mokati kaantu.
9 Ihe aalumentu yamwe haya ithanwa aniwa Aamangululwa, oye ya pamwe nayamwe yokuKireni, yokuAleksandria nayamwe ya za kuKilikia nokuAsia, ya ludhikathane naStefanus.
10 Ihe molwaashoka okwa li e na uunongo, nokwa li ta popi kekwatho lyombepo ondjapuki, inaya vula oku mu tompa.
11 Opo ihe oya lombwele aalumentu yamwe meholamo ya ka tye: “Tse otwe mu uvu ta sheke Moses naKalunga.”
12 Nena oya hwahwameke aantu, aakuluntu yoshigwana nosho wo aalongimpango, noye mu ponokele e taye mu kwata po kethiminiko, noye mu fala kOmpangu yoPombanda yAajuda.
13 Opo nduno oya eta po oombangi dhiifundja, ndhoka dha ti: “Omulumentu nguka ina hala okweetha po okupopila muuwinayi ehala ndika eyapuki nosho wo Ompango.
14 Pashiholelwa, otwe mu uvu ta ti kutya Jesus Omunasareti ota ka hanagula po ehala ndika, nota ka lundulula oonkuluhedhi ndhoka twa pewa kuMoses.”
15 Opo nduno ayehe, mboka ya li ya kuutumba mOmpangu yoPombanda yAajuda, oya kala ye mu tala, noya mono kutya oshipala she osha fa shomuyengeli.
