Sho Isak a li e na omimvo 40 okwa hokana Rebekka. Isak okwa li e hole unene omukulukadhi gwe, Rebekka. Konima yethimbo oya mono aakwanambwiyu, aamati ayehe.

Omukuluntu okwa li Esau nomushona oJakob. Esau okwa li e hole okuya kuukongo. Jakob okwa li e hole okukala megumbo.

Pethimbo lyonale, omwanamati gwosheeli oye a li ha thigulula po oshitopolwa shevi oshinene nosho wo iimaliwa oyindji, uuna he a hulitha. Isak okwa li omwanamati gwaAbraham, onkee ano, uuthiga waEsau owa li wa kwatela mo shoka Jehova u uvanekele Abraham. Esau ka li e na ko nasha nomauvaneko ngoka, ihe Jakob okwa li e shi kutya oga simana noonkondo.

Esiku limwe, Esau okwa zi kuukongo a vulwa noonkondo, ye okwa sa ondjala. Esiku ndyoka okwa adha Jakob ta teleke iikulya tayi nika nawa. Esau okwa lombwele Jakob a ti: “Onde etwa mo kondjala, pe ndje wo moshigali shoye oshitiligane.” Jakob okwa ti: “Otandi shi ku pe ashike, ngele oto pe ndje uuthemba woye wuusheeli.” Esau okwa ti: “Eewa! Ngame ote si; uuthemba wuusheeli otau kwatha ndje shike?” Mbela sho to dhiladhila Esau okwa li ngaa a ningi etokolo li li pandunge? Hasho, olya li lya nika uusama. Esau okwa li a gandja po oshinima shi na ondilo, molwowala okayaha koshigali.

Isak okwa li a kulupilila, ihe okwa li e na okulaleka nuuyamba omwanamati gwosheeli. Rebekka okwa li a kwathele Jakob, omwanamati omushona, oye a lalekwe  nuuyamba. Sho Esau e shi dhimbulula, okwa li a thita po kondjahi. Okwa ningi ompangela a dhipage omumwayina, Jakob. Isak naRebekka oya li ye na okugamena Jakob. Rebekka okwe mu lombwele a ti: “Inda ontuku kaandjamumwameme Laban . . . sigo ondjahi yomumwanyoko tayi loto.” Jakob okwa ningi naanaa ngaashi a lombwelwa kaavali ye. Okwa fadhuka po a ka hupithe omwenyo gwe.