Peter ka li e shi kutya na ninge po shike
Peter okwa li a simaneka noonkondo omulongi gwongundu yawo. Ihe esiku limwe manga ye li mongulu yosikola omulongi gwawo okwa tameke oku ya longa kombinga yomunongononi gwedhina Charles Darwin nankene elongo lye, lyoevolusi, aniwa lya kwathele aantu ya uve ko iinima yopaunongononi noku ya mangulula komalongo giifundja. Opo nduno omulongisikola okwa pula aalongwa ya popye shoka yi itaala kombinga yoevolusi. Peter okwa li ta hala okufumvama mevi.
Peter ka li e shi kutya na ninge po shike. Aavali ye oye mu longa kutya Kalunga oye a shita evi niinima ayihe yi na omwenyo. Oye mu lombwela wo kutya shoka Ombiimbeli tayi ti kombinga yeshito oshoshili, ihe elongo lyoevolusi iifundja yo yeneyene. Aavali yaPeter nosho wo omulongisikola gwe, ayehe oya hala e shi enditha nawa. Mbela pompito ndjino, Peter ota ka gama kombinga yalye?
Omumvo kehe, aanasikola ohayi iyadha monkalo ya fa yaPeter. Mbela Peter nosho wo aanasikola yalwe oye na okuninga po shike? Mbela oye na owala okwiitaala shaashoka taya longwa? Aawe, oya pumbwa okukonakona uumbangi mboka wu li po, tawu popile elongo lyoevolusi nosho wo mboka tawu popile eshito. Opo ihe taya tokola nawa kutya elongo lini li li mondjila.
Ombiimbeli otayi tu londodha kaatu itaale shaashoka yalwe taya popi, omanga inaatu konakona uumbangi tu tale ngele oshoshili. Ombiimbeli otayi ti: “Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.” (Omayeletumbulo 14:15) Ombiimbeli otayi ladhipike Aakriste ya longithe oondunge ‘dhokuyoolola’ noya tale ngele shoka taya longwa oshoshili tuu. — Aahebeli 5:14.
Okambo haka inaka nyanyangidhwa nelalakano lyokuyambidhidha oongundu dhomalongekalunga ndhoka dha hala aantu ya longwa kombinga yeshito mosikola. Oka nyanyangidhwa nelalakano lyoku tu kwathela tu konakone shoka hashi longwa kaantu mboka haya ti kutya iinima yi na omwenyo oye ya po ohaluka, nohaya ti kutya shoka Ombiimbeli ya popya kombinga yeshito iifundja.
Otatu ka tala unene kosele, oshoka oyo oshitopolwa shimwe shoka sha thikameka po omwenyo. Oto ka mona uuyelele tawu hokitha, nkene oosele hadhi tungwa po. Oto ka pulwa wo wu konakone uuyelele mboka tawu yambidhidha elongo lyoevolusi.
Atuheni otwa pumbwa okuyamukula epulo ndika: Mbela iinima yi na omwenyo oya shitwa nenge oye ya po ohaluka? Otashi vulika wi ipula nale kombinga yoshinima shoka. Okambo haka otake ke tu pa owala uumbangi wumwe po, mboka wa kwathela aantu oyendji yi itaale kutya iinima yi na omwenyo oya shitwa.
