Ngaashi sha nyolwa mAakorinto yotango 6:1-8, omuyapostoli Paulus okwa li ta popi oontamanana ndhoka dha li pokati kAakriste. Okwa li a popi a yemata sho Aakriste yamwe muKorinto ya li haya ‘yi kaapanguli aapagani.’ (Ovelise 1) Paulus okwa li a gandja omatompelo ga kola kutya omolwashike Aakriste ye na okukandula po oontamanana dhawo megongalo, pehala lyoku dhi fala koompangu dhuuyuni. Natu tale omatompelo gamwe kutya omolwashike omayele ngaka ga nwethwa mo ga li ga gandjwa nokutala kutya openi omayele ngaka itaago opalele.

Ngele otu na oontamanana dhopangeshefa nOmukriste omukwetu, tango otu na okukandula po uupyakadhi ngaashi Jehova a hala, ihe hangaashi tse twa hala. (Omayel. 14:12) Jesus okwe shi popya kutya oshi li nawa tu pongolole po okwaahauvathana mbala, omanga oshinima inaashi kwata miiti. (Mat. 5:23-26) Ihe Aakriste yamwe oya li haya tamanana unene, nethimbo limwe oya li haya ka pangulwa koompangu dhuuyuni nokuli. Paulus okwa ti: “Itashi mú kwatha nando osha, sho mu na oontamanana mokati keni yene.” Omolwashike mbela? Etompelo lya simana olyo kutya oshinima shoka otashi shekitha edhina ewanawa lyegongalo nosho wo lyaKalunga ngoka hatu longele. Onkene ano, natu kaleke momadhiladhilo epulo lyaPaulus ndyoka tali ti: “Omolwashike itaamu pitika, mu ningwe nayi?” — Ovelise 7.

Paulus okwa li a yelitha kutya Kalunga okwa tula po elongekidho ewanawa nkene ye na okukandula po oontamanana. Aakuluntugongalo oye na oondunge omolwontseyo yawo yoshili yopamanyolo na Paulus okwa popi kutya otaya “vulu okutokola oohapu dhayakwawo” miinima “mbika yomokukalamwenyo kwongashingeyi.” (Ovelise 3-5) Jesus okwa ti kutya ngele omuntu okwa ningwa nayi ngaashi okulundilwa nokukengelelwa, iinima mbyoka oyi na okukandulwa po mokulandula omikalo dhi li ndatu. Gwotango, kambadhala wu kandule po uupyakadhi naamboka ya kwatelwa mo; omutiyali, ngele omukalo gwotango inagu pondola, ithana po onzapo yimwe nenge mbali ndhoka dhi na uuyelele moshinima shoka; nomutitatu, ngele omukalo omutiyali nago inagu pondola sha, uupyakadhi wu lombwela egongalo ndyoka li lilwe po kaakuluntugongalo. — Mat. 18:15-17.

 Odhoshili kutya aakuluntugongalo kaye shi aatseyimpango nenge aanangeshefa nokaye na okugandja omayele kombinga yiinima mbyoka. Ihaya tula po omisindalandu okukandula po oontamanana dhopangeshefa pokati kaamwatate. Pehala lyaashono, ohaya kambadhala okukwathela mboka ya kwatelwa moshinima shoka ya tule miilonga Omanyolo noye ye pehulithodhiladhilo lyopambili. Miipotha mbyoka ya kitakana, otaya vulu okupula omayele komutonateli gwoshikandjo nenge koshitayimbelewa shOonzapo dhaJehova. Ihe opu na oonkalo dhimwe ndhoka inaadhi kwatelwa momayele gaPaulus. Dhimwe dhomudho odhini?

Poompito dhimwe, omuntu otashi vulika a kale a pumbwa ekwatho lyopaveta opo u uthilwe pauyuki iinima mbyoka a hala okuninga nomainyengotompelo omawanawa nogopambili. Pashiholelwa, otashi vulika owala omuntu a kale a pumbwa okukatuka onkatu yopaveta opo a mone ombapila yokuteya ondjokana, ezimino lyopaveta okukala nokanona, okukwatela osapota, okumona iimaliwa komahangano omakwashilipaleki, okukala e na ombapila tayi ulike kutya ongeshefa yontumba ndjoka ya mbangolota oyi na oondjo dhe nosho wo okukwashilipaleka oombapila dhaashoka a hala shi ningwe uuna a si. Opu na wo iipotha yimwe moka omumwatate e wete sha pumbiwa opo i ipopile ye mwene sho a falwa komumwahe kompangu. *

Ngele iipotha yoludhi ndoka otayi ningwa nopwaahe na oontamanana, itayi yono ekotampango ndyoka li li momayele gaPaulus ga nwethwa mo. * Nonando ongaaka, Omukriste oku na okupititha komeho okusimanekitha edhina lyaJehova nokukaleka po ombili nuukumwe megongalo. Ohole oyo endhindhiliko enene ndyoka hali ndhindhilikitha aalanduli yaKristus, ‘nohole ihayi kongo shayo yene.’ — 1 Kor. 13:4, 5; Joh. 13:34, 35.