Okuza sho Samuel a li okanona natango, okwa li ha kala noha longo petsalihangano mpoka aantu ya li haya longelele Jehova. Mbela owu shi kutya osha li she ende ngiini opo Samuel a kale petsalihangano? Tango natu popye kombinga yayina yaSamuel, Hanna.

Hanna okwa kala ethimbo ele a hala okumona okanona, ihe ka li ta vulu. Onkee ano, okwa galikana kuJehova te mu indile e mu kwathele a mone okanona. Okwa li u uvaneke kutya ngele okwa mono okanona kokamati, ote ke ka gandja kuJehova ka kale petsalihangano onkalamwenyo yako ayihe. Jehova okwa li u uvu egalikano lye nokwe mu pe okanona kokamati. Okwe ka luku Samuel. Naasho Samuel a li e na oomvula ndatu nenge ne, Hanna okwe mu fala ketsalihangano a ka longele Kalunga, ngaashi naanaa u uvaneka.

Eli oye a li omuyambi omukuluntu. Oyanamati yaali nayo oya li haya longo petsalihangano. Dhimbulukwa kutya etsalihangano olya li ehala moka hamu longelwa Kalunga, naantu oya li ya tegelelwa ya kale haya longo shoka oshiwanawa pulyo. Ihe oyanamati yaEli oya li haya longo uuwinayi. Samuel okwa li e wete shoka taya ningi. Mbela Samuel naye okwa li ha longo uuwinayi ngaashi oyanamati yaEli?—  Aawe, ye okwa li ha longo shoka shu uka, ngaashi naanaa aavali ye ye mu longa.

Mbela oto dhiladhila kutya Eli okwa li e na okuninga po shike?—  Okwa li e na okugeela oyanamati mboka yaali. Ka li e na oku ye etha ya longe we megumbo lyaKalunga. Ihe Eli ine shi ninga, onkee ano, shika osha geyitha Jehova, E ta tokola a geele Eli noyanamati yaali.

Ongulohi yimwe manga Samuel a li a lala, oku uvu omuntu te mu ithana ta ti: ‘Samuel!’ Okwa matuka u uka kuEli, ihe Eli okwe mu lombwele a ti: “Inandi ku ithana.” Shika osha li sha ningwa lwiikando yi vulithe pu iyali. Konima yoshikando oshititatu, Eli okwa lombwele Samuel kutya ngele oku uvu ishewe ewi tali mu ithana, oku na okutya: ‘Popya Tate Jehova, onda pulakena.’ Samuel osho a ningi. Opo nduno Jehova okwe  mu lombwele a ti: ‘Lombwela Eli kutya otandi ka geela egumbo lye sho ya dhini ndje.’ Mbela oto dhiladhila kutya osha li oshipu kuSamuel okugandja etumwalaka ndika kuEli?—  Aawe, kasha li oshipu. Ihe nonando Samuel okwa li a tila, okwa ningi ngaashi Jehova e mu lombwele. Shoka sha popiwa kuJehova osha gwanithwa. Oyanamati yaali yaEli oya dhipagwa naEli wo okwa si.

Samuel oku li oshiholelwa oshiwanawa kutse. Okwa ningi shoka shu uka nokuli nando okwa li a mono aantu yalwe taya ningi iinima iiwinayi. Ongiini kombinga yoye? Mbela oto ka kala wa fa Samuel e to kala ho ningi iinima mbyoka yu uka? Ngele owe shi ningi, oto ka nyanyudha Jehova nosho wo aavali yoye.