OSHILESHWA 57
Ongiini ngele owa yono eyono lya kwata miiti?
Nonando owu hole Jehova noonkondo noho ningi oonkambadhala wu vulike kuye, omathimbo nomathimbo otashi vulika wu mu yemateke. Ihe nando ongawo, omayono gamwe oga kwata miiti unene. (1 Aakorinto 6:9, 10) Ngele owa yono eyono lya kwata miiti, dhimbulukwa kutya Jehova oku ku hole natango, oku na ehalo lyoku ku dhimina po noku ku kwathela.
1. Oshike tu na okuninga, opo Jehova e tu dhimine po?
Mboka ye hole Jehova ohaya kala ya yemata uuna ya mono kutya oya yona eyono lya kwata miiti. Ihe Jehova ohe ya hekeleke neuvaneko ndyoka a uvanekela oshigwana she, tali ti: “Oondjo dheni nando nadhi kale dha tiligana mbyumbyumbyumbyu, otadhi ka toka dha fa oompawe.” (Jesaja 1:18) Jehova ote ke tu dhimina po thiluthilu ngele otwi iyele ombedhi shili. Ohatu ulike ngiini kutya otwi iyela ombedhi? Omokukala tu uvite nayi omolwomayono getu, e tatu etha po okulonga shoka oshiwinayi nokupula Jehova e tu dhimine po. Opo ihe ohatu ningi oonkambadhala tu lundulule okudhiladhila kwetu nenge tu ethe po omikalondjigilile ndhoka dhe tu yonitha. Otu na wo okuninga ngaashi tatu vulu, tu vulike komithikampango dhe dhi li pauyuuki. — Lesha Jesaja 55:6, 7.
2. Jehova oha longitha ngiini aakuluntugongalo ye tu kwathele uuna twa yona?
Ngele otwa yono eyono lya kwata miiti, Jehova okwe tu lombwela tu “ithane aakuluntu yegongalo.” (Lesha Jakob 5:14, 15.) Aalumentu mboka ya langekwa po oye hole Jehova nosho wo oonzi dhe. Oya dheulwa nkene ye na oku tu kwathela, opo tu kale ishewe tu na ekwatathano ewanawa naJehova. — Aagalati 6:1.
Aakuluntugongalo ohaye tu kwathele ngiini ngele otwa yono eyono lya kwata miiti? Aakuluntugongalo yaali nenge yatatu otaye ke tu pukulula, taya longitha Ombiimbeli. Otaye ke tu pa wo omaetopo nomayele ge tu kwathele kaatu endulule we eyono ndyoka. Otashi vulika ye ke tu lombwele kaatu kuthe we manga ombinga miinima yontumba megongalo, sigo oosho tatu ka kala ishewe tu na ekwatathano lya kola naJehova. Aakuluntugongalo ohaya kondo mo megongalo omuntu ngoka a yona eyono lya kwata miiti, ihe ini iyela ombedhi, opo kaa nwethe mo yalwe.
ILONGA OSHINDJI
Ilonga nkene to vulu okukala wu na olupandu, sho Jehova he tu kwathele uuna twa yona eyono lya kwata miiti.
3. Okuhempulula omayono getu ohaku tu kwathele tu kale ishewe ookuume kaJehova
Epuko kehe tatu ningi ohali yemateke Jehova, onkene otu na okwiihokolola kuye. Lesha Episalomi 32:1-5, e tamu kundathana epulo tali landula:
-
Omolwashike sha simana okuhempulula omayono getu kuJehova, pehala lyokukambadhala oku ga holeka?
Kakele kokuhempululila Jehova omayono getu, ohatu kala twa pepelelwa uuna twa kongo ekwatho kaakuluntugongalo. Dhana OKAVIDIO, e tamu kundathana epulo tali landula.
-
Ngaashi twa mono mokavidio, aakuluntugongalo oya li ya kwathele ngiini Canon a galukile kuJehova?
Otu na okukala twa mangulukila aakuluntugongalo noku ya lombwela oshili, oshoka oye lile po oku tu kwathela. Lesha Jakob 5:16, e tamu kundathana epulo tali landula:
-
Omolwashike hashi kala oshipu kaakuluntugongalo oku tu kwathela, ngele otwe ya lombwele oshili?
Hempulula eyono lyoye, lombwela aakuluntugongalo oshili, e to taamba ko ekwatho lyaJehova lyopahole
4. Okukonda mo gumwe megongalo oku na uuwanawa washike?
Ngele omuntu ngoka a yona eyono lya kwata miiti, okwa tindi okuvulika komithikampango dhaJehova, ita vulu we okukala oshitopolwa shegongalo. Oha kondwa mo megongalo noihatu kala we tatu endathana naye nenge tu popye naye. Lesha 1 Aakorinto 5:6, 11 nosho wo 2 Johannes 9-11, e tamu kundathana epulo tali landula:
-
Ngaashi owala efulika hali tumbike ondombo yoomboloto, ongiini okweendathana nomuntu ngoka ini iyela ombedhi haku nwetha mo egongalo?
Oyendji mboka ya li ya kondwa, lwanima oya ka galukila kuJehova. Omolwashike mbela? Omolwaashoka nando osha li she ya yemateka, oshe ke ya kwathela ya mone kutya shoka ya ninga osha puka. (Episalomi 141:5) Dhana OKAVIDIO, e tamu kundathana epulo tali landula.
-
Ngaashi twa mono mokavidio, sho Sonja a li a kondwa, oshe mu kwathele ngiini?
Ngele gumwe okwa kondwa . . .
-
ohashi simanekitha ngiini edhina lyaJehova?
-
ohashi ulike ngiini kutya Jehova oku na ondjele nomunahole?
5. Jehova ohe tu dhimine po uuna twi iyela ombedhi
Jesus okwa li a longitha ethaneko ndyoka tali tu kwathele tu uve ko kutya Jehova oha kala e uvite ngiini, ngele omuntu okwi iyele ombedhi. Lesha Lukas 15:1-7, e tamu kundathana epulo tali landula:
-
Ethaneko ndyoka otali tu longo shike kombinga yaJehova?
Lesha Hesekiel 33:11, e tamu kundathana epulo tali landula:
-
Oshike twa pumbwa okuninga, opo tu ulike kutya otwi iyela ombedhi shili?
Ngaashi owala omusita gwoonzi, Jehova naye oku na ko nasha lela noonzi dhe
AANTU YAMWE OHAYA TI: “Ngele onda lombwele aakuluntugongalo kombinga yeyono lyandje, otandi kondwa mo megongalo.”
-
Ongiini to vulu okukwathela omuntu ngoka ta ti ngawo?
OWI ILONGO SHIKE?
Ngele otwa yono eyono lya kwata miiti e tatu iyele ombedhi shili nokutokola okweetha po shoka oshiwinayi, Jehova ote ke tu dhimina po.
Omapulo geendululo
-
Omolwashike sha simana okuhempululila Jehova omayono getu?
-
Oshike tu na okuninga, opo tu dhiminwe po omayono getu?
-
Ngele otwa yono eyono lya kwata miiti, omolwashike tu na okukonga ekwatho kaakuluntugongalo?
UUYELELE WA GWEDHWA PO
Tala nkene Jehova a ulukila omulumentu gumwe ohenda, ndjoka ya popiwa muJesaja 1:18.
Uuna gumwe a kondwa, ohashi etele ngiini yalwe uuwanawa?
“Omolwashike okukondwa ku li egeeloputudho lyopahole?” (Oshungolangelo, 15 Mei 2015)
Tala nkene to vulu okuyelithila omuntu ngoka kee shi Onzapo yaJehova kutya omolwashike omuntu ha kondwa megongalo.
Lesha ehokololo, “Onda li nda pumbwa okugalukila kuJehova,” wu mone kutya omolwashike omulumentu gumwe ngoka a li a thiga po oshili, a li e uvite kutya Jehova okwe mu hilila kuye.
“Ombiimbeli ohayi lundulula onkalamwenyo yaantu” (Oshungolangelo, 1 Apilili 2012)
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
