OSHILESHWA 26
Omolwashike pu na uukolokoshi nokumona iihuna?
Uuna oshinima oshiwinayi sha ningwa, oshi li paunshitwe komuntu a pule ta ti: “Osha ningilwa shike?” Inatu nyanyukwa tuu sho Ombiimbeli ye tu pa omayamukulo ga yela kepulo ndyono!
1. Satana okwa ningi po shike, shono she etitha uukolokoshi muuyuni?
Satana Omuhindadhi okwa tsu ondumbo naKalunga. Okwa li a hala okuninga omupangeli, onkee okwa nwetha mo aantu yotango, Adam naEva, ye mu wayimine muunashipotha we. Shika okwe shi ningi sho a lombwele Eva iifundja. (Genesis 3:1-5) Okwa ningitha Eva a kale e wete kutya Jehova ine mu halela uuwanawa. Kungawo, okwa li ta ti kutya aantu otaya vulu okukala ya nyanyukwa ngele inaya vulika kuKalunga. Satana okwa li a popi iifundja yotango sho a lombwele Eva kutya ita si shili. Onkee Ombiimbeli otayi ti kutya Satana “omufundja nahe yiifundja ayihe.” — Johannes 8:44.
2. Adam naEva oya tokola okuninga shike?
Jehova okwa li a pe Adam naEva kehe shoka ya pumbwa. Okwa li e ya lombwele ya lye komiti adhihe dhomoshikunino shaEden, kakele komuti gumwe. (Genesis 2:15-17) Ihe oya tokola owala okulya komuti ngoka. Eva okwa “toonona ko iiyimati yimwe e ta li.” Konima Adam naye okwe yi li. (Genesis 3:6) Sho ya li, ayehe oya yono kuKalunga. Molwaashoka Adam naEva oya li ya gwanenena, osha li lela oshipu kuyo okuninga shoka shi li mondjila. Oya tokola kaaya vulike kuKalunga, naasho ye shi ningi oya yono noya tindi a kale omupangeli gwawo. Etokolo ndyoka ya ningi, olya li lye ya etele okumona iihuna noonkondo. — Genesis 3:16-19.
3. Etokolo lyaAdam naEva olye tu etela shike?
Sho Adam naEva ya yono, oya tameke okukala inaaya gwanenena noya taambekidha okwaagwanenena kwawo koluvalo lwawo aluhe. Ombiimbeli otayi popi kombinga yaAdam, tayi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe.” — Aaroma 5:12.
Ohatu mono wo iihuna omolwomatompelo gi ili nogi ili. Omathimbo gamwe ohatu mono iihuna, omolwomatokolo omawinayi ngoka hatu ningi. Omathimbo gamwe ohatu mono iihuna, omolwomatokolo omawinayi ngoka haga ningwa kuyalwe. Omathimbo gamwe ohatu adhika kiiponga yombaadhilila, molwaashoka tu li pehala lya puka nopethimbo lya puka. — Lesha Omuuvithi 9:12.
ILONGA OSHINDJI
Ilonga kutya omolwashike Kalunga haaye he etitha uukolokoshi nokumona iihuna hoka ku li muuyuni, nankene ha kala e tu uvitile uuna tatu mono iihuna.
4. Ngoka he eta okumona iihuna
Aantu oyendji ohaya ti kutya Kalunga oye ta pangele uuyuni. Shono oshoshili ngaa? Dhana OKAVIDIO.
Lesha Jakob 1:13 nosho wo 1 Johannes 5:19, e tamu kundathana epulo tali landula:
-
Mbela Kalunga oye he etitha okumona iihuna nosho wo iinima iiwinayi?
5. Tala kiinima mbyoka ye etithwa kepangelo lyaSatana
Lesha Genesis 3:1-6, e tamu kundathana omapulo taga landula:
-
Satana okwa popi iifundja yini? — Tala ovelise 4 nosho wo 5.
-
Satana oku ulike ngiini kutya Jehova okwa li ti indike anuwa aantu uuwanawa?
-
Shi ikolelela kwaashono sha popiwa kuSatana, aantu oya pumbwa ngaa Jehova oye a kale Omupangeli gwawo, opo ya kale ya nyanyukwa?
Lesha Omuuvithi 8:9, e tamu kundathana epulo tali landula:
-
Molwaashoka Jehova haye ta pangele uuyuni, onkalo oyi li ngiini?
-
Adam naEva oya li ya gwanenena noya li mOparadisa kombanda yevi, ihe oya pulakene kuSatana e taya tukululile Jehova oshipotha
-
Konima yuunashipotha mboka, uulunde, okumona iihuna neso, oye ya muuyuni
-
Jehova ota ka hulitha po uulunde, okumona iihuna nosho wo eso. Aantu otaya ka kala ishewe ya gwanenena, yo otaya ka kala mOparadisa kombanda yevi
6. Jehova oku na ko nasha natse sho tatu mono iihuna
Kalunga oku na ko ngaa nasha natse sho tatu mono iihuna? Tala kwaashoka Omukwaniilwa David nomuyapostoli Petrus ya nyola. Lesha Episalomi 31:7 nosho wo 1 Petrus 5:7, e tamu kundathana epulo tali landula:
-
Owu uvite ngiini sho wa tseya kutya Jehova oku tu wete sho tatu mono iihuna noha kala e na ko nasha natse?
7. Kalunga ota ka hulitha po okumona iihuna akuhe
Lesha Jesaja 65:17 nosho wo Ehololo 21:3, 4, e tamu kundathana epulo tali landula:
-
Omolwashike tashi hekeleke okutseya kutya Jehova ota ka hulitha po okumona iihuna?
Owe shi tseya ngaa?
Sho Satana a popi iifundja yotango, okwa lundile Jehova. Kungawo, okwa nyateke edhina lyaJehova sho a ti kutya ke shi omuyuuki, ye ke shi Omupangeli omunahole. Jehova ota ka hulitha po okumona iihuna masiku, opo a yapulithe edhina lye nenge ta ka ulika kutya epangelo lye olyo lya dhenga mbanda. Okuyapulitha edhina lyaJehova, okwo kwa simanenena meshito alihe. — Mateus 6:9, 10.
AANTU YAMWE OHAYA TI: “Okumona iihuna ehalo lyaKalunga.”
-
Oto ke ya yamukula ngiini?
OWI ILONGO SHIKE?
Satana Omuhindadhi nosho wo aantu yaali yotango, oyo ye etitha iinima iiwinayi mbyoka hayi ningwa muuyuni. Jehova oku na ko nasha natse lela, nonando otatu mono iihuna note ke yi hulitha po masiku.
Omapulo geendululo
-
Iifundja yini Satana Omuhindadhi a lombwele Eva?
-
Okwaavulika kwaAdam naEva okwe tu gumeni ngiini atuheni?
-
Otu shi shi ngiini kutya Jehova oku na ko nasha natse pauhandimwe sho tatu mono iihuna?
UUYELELE WA GWEDHWA PO
Ilonga shoka Ombiimbeli otayi ti kutya uulunde oshike.
“Uulunde oshike?” (Oshitopolwa shi li kepandja lyetu lyokointaneta)
Lesha kombinga yompata ndjoka ye etwa po kuSatana Omuhindadhi, moshikunino shaEden.
“Omolwashike Kalunga e ethele okumona iihuna ku kale po?” (Oshungolangelo, 1 Januali 2014)
Lesha wu mone omayamukulo taga hekeleke kepulo limwe edhigu.
Tala okavidio haka wu uve nkene omulumentu gumwe ta hokolola kombinga yokumona iihuna mbyoka a li muyo.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
