OSHILESHWA 22
Ongiini to vulu okulombwela yalwe onkundana ombwanawa?
Sho to ilongo oshili mOmbiimbeli, otashi vulika wu tye: ‘Kehe gumwe okwa pumbwa okutseya kombinga yoshili ndjika!’ Kehe gumwe okwa pumbwa shili oku yi tseya! Ihe otashi vulika wu kale wa tila okulombwela yalwe shoka wi ilonga. Natu ka kundathane nkene to vulu okusinda uumbanda mboka, e to tameke okulombwela yalwe wa manguluka onkundana ombwanawa ndjoka yi li mOmbiimbeli.
1. Ongiini to vulu okulombwela yalwe mboka wu shi kombinga yaashoka wi ilonga?
Aalongwa yaJesus oya li ya popi ya ti: “Itatu vulu okumwena, tu kale ando itaatu hokolola shoka tse twe shi mono notwe shi uvu.” (Iilonga 4:20) Oya li ye hole noonkondo oshili ndjoka yi ilongo kuJesus noya li ya hala oku yi lombwela aantu oyendji ngaashi tashi vulika. Mbela nangoye osho ho kala wu uvite ngawo? Ngele osho, konga oompito wu lombwele aakwanezimo yoye nosho wo ookuume koye nesimaneko kombinga yaashoka wi ilonga. — Lesha Aakolossa 4:6.
Omikalo dhimwe moka to vulu oku shi ninga
-
Uuna to popi nomukwanezimo, ninga efalomo lyoshikundathanwa shomOmbiimbeli to ti: “Oshiwike sha zi ko ondi ilonga oshinima oshihokithi.”
-
Leshela kuume koye ngoka te ehama nenge ti ipula nasha, enyolo tali tsu omukumo.
-
Lombwela aaniilonga pamwe nangoye mbono haye ku pula kutya oshiwike oshe ende ngiini, kombinga yaashoka wi ilonga pekonakonombiimbeli lyoye nenge pokugongala kwegongalo.
-
Ulukila ookuume koye epandja lyetu lyokointaneta jw.org
-
Pula yalwe ya kale po pekonakonombiimbeli lyoye nenge wu ya ulukile nkene taya vulu okupula ekonakonombiimbeli kepandja jw.org.
2. Omolwashike sha simana wu itulile po elalakano lyokuuvitha pamwe negongalo?
Aalongwa yaJesus oya li ya ningi oshindji, kakele owala kokuuvithila yalwe mboka ye shi onkundana ombwanawa. Omathimbo gamwe, Jesus okwe ya ‘tetekelitha ooyaali nooyali koshilando kehe,’ ye ku uvithe. (Lukas 10:1, yelekanitha OB-1954.) Iilonga mbyoka yuunganekwa oya li ya pe aantu oyendji ompito yu uve onkundana ombwanawa. Aalongwa sho yu uvitha pamwe, osha li wo she ya etele enyanyu olindji. (Lukas 10:17) Mbela nangoye ito vulu okwiitulila po elalakano wu tameke okuuvitha pamwe negongalo
ILONGA OSHINDJI
Ilonga nkene to vulu okusinda uumbanda, wu mone enyanyu ndyoka hali zi mokulombwela yalwe onkundana ombwanawa.
3. Jehova ota ka kala pamwe nangoye
Aantu yamwe mboka ya hala okuuvitha, otashi vulika ya kale ya tila kutya aantu otaye ke ya tila ngiini nenge kutya otaye ke ya yamukula ngiini.
-
Mbela owa tila okulombwela yalwe shoka wi ilonga? Omolwashike mbela?
Dhana OKAVIDIO, e tamu kundathana epulo tali landula.
-
Aagundjuka mboka yOonzapo dhaJehova, oya sindi ngiini uumbanda mboka ya li ye na?
Lesha Jesaja 41:10, e tamu kundathana epulo tali landula:
-
Uuna wa tila okuuvitha, egalikano otali vulu oku ku kwathela ngiini?
Owe shi tseya ngaa?
Oonzapo dhaJehova odhindji, oshikando shimwe odha li dhu uvite kutya kadhi na siku dhi ka lombwele yalwe onkundana ombwanawa. Pashiholelwa, Sergey okwa li u uvite kee na oshilonga nokwa li he shi mono oshidhigu okupopya naantu, ihe okwa konakona Ombiimbeli. Ota ti: “Nonando onda li nda tila, onda tameke okulombwela yalwe shoka nda li tandi ilongo mOmbiimbeli. Onda li nda kumwa noonkondo, oshoka sho nda tameke oku shi ninga, onda kala ndi na omukumo. Osha koleke wo eitaalo lyandje.”
4. Kala wu na esimaneko
Uuna to lombwele yalwe onkundana ombwanawa, ino dhiladhila owala kwaashoka to popi, ihe dhiladhila wo kutya oto shi popi ngiini. Lesha 2 Timoteus 2:24 nosho wo 1 Petrus 3:15, 16, e tamu kundathana omapulo taga landula:
-
Ongiini to vulu okutula miilonga oovelise ndhika, uuna to lombwele yalwe kombinga yOmbiimbeli?
-
Aantu yaandjeni yamwe nenge ookuume koye otashi vulika kaaya tse kumwe nangoye. Oto ka ninga po shike? Oshike kuu na okuninga?
-
Omolwashike shi li nawa wu pule omapulo ga dhindwa nawa, pehala lyokulombwela yalwe shoka ye na okwiitaala?
5. Okulombwela yalwe onkundana ombwanawa ohaku etele omuntu enyanyu
Jehova okwa li a pe Jesus iilonga yokuuvithila aantu onkundana ombwanawa. Jesus okwa li a tala ko ngiini iilonga mbyoka? Lesha Johannes 4:34, e tamu kundathana omapulo taga landula:
-
Okulya iikulya yi na iitungithi ohaku tu ningitha tu kale tu na uukolele nokukala twa nyanyukwa. Omolwashike Jesus a yelekanitha okulonga ehalo lyaKalunga, mwa kwatelwa okulombwela yalwe onkundana ombwanawa, nokulya iikulya?
-
Sho to tala, uuwanawa wuni tatu ka mona, ngele ohatu lombwele yalwe onkundana ombwanawa?
Shoka to vulu okuninga
-
Pokugongala kwomokati koshiwike, tala nkene to vulu okutameka oonkundathana nagumwe.
-
Pula ngoka ha konakona Ombiimbeli nangoye, nkene to vulu okwiinyolitha mosikola ndjoka hayi ningwa pokugongala kwomokati koshiwike. Iipopiwa mbyoka hayi pewa aanasikola, otayi vulu oku ku kwathela wu kale wi ilongekidha okulombwela yalwe shoka to ilongo.
-
Longitha iitopolwa: “Aantu yamwe ohaya ti” nenge “Gumwe otashi vulika a pule ta ti,” mbyoka yi li membo ndika, wu iyendithe po nkene to vulu oku ka yamukula gumwe ngoka e ku pula omapulo nenge inaa hala oku ku pulakena.
GUMWE OTASHI VULIKA A PULE TA TI: “Onde ku etha nale, opo ngaa wu li?”
-
Ongiini to vulu okulongitha ompito ndjika wu lombwele omuntu ngoka shoka wi ilonga mekonakonombiimbeli lyoye?
OWI ILONGO SHIKE?
Okulombwela yalwe onkundana ombwanawa ohashi etele aantu enyanyu, ihe nonando otashi vulika wu kale wu wete oshidhigu, oshinima oshipu lela okuninga.
Omapulo geendululo
-
Omolwashike wu na okulombwela yalwe onkundana ombwanawa?
-
Ongiini to vulu oku shi ninga momukalo gwesimaneko?
-
Ngele owa tila okuuvitha, ongiini to vulu okusinda uumbanda mbono?
UUYELELE WA GWEDHWA PO
Tala komikalo ne ndhoka to vulu okulongitha wu lombwele yalwe onkundana ombwanawa, to longitha okakalata kokufala aantu kepandja lyokointaneta jw.org.
Iiholelwa yomafalomo gokakalata kokuya kepandja JW.ORG (1:43)
Ilonga kombinga yomaukwatya gane ngoka tage ku kwathele wu lombwele yalwe onkundana ombwanawa.
“Mbela owi ilongekidha ngaa okuninga omuyuli gwaantu?” (Oshungolangelo, Septemba 2020)
Natu tale koshiholelwa shomOmbiimbeli tashi tu kwathele tu kale tu na uulaadhi wokulombwela yalwe onkundana ombwanawa, nonando tse aanona.
Tala nkene to vulu okulombwela aakwanezimo yoye kombinga yOmbiimbeli, mboka inaayi ilonga natango kombinga yaJehova.
“Adha omitima dhaakwanezimo yoye mboka kaaye shi ooitaali” (Oshungolangelo, 15 Maalitsa 2014)
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
