OWA tseya kutya aalumentu mbano oolye notaa ningi shike? Yo otaa yi ya ka kondje, naalumentu komehoelela otayi imbi. Ngiika ngoye oto pula: ‘Omolwashike aaimbi kaaye na omagongamwele nomagonga gokukondjitha?’ Natu tale.

Josafat oye omukwaniilwa guukwaniilwa waIsrael womazimo gaali. Ye okwa kala nomwenyo pethimbo lyOmukwaniilwa Ahab naIsebel yuukwaniilwa womazimo 10 gokuumbangalantu. Ihe Josafat oye omukwaniilwa omwaanawa, nahe Asa okwa li wo omukwaniilwa omwaanawa. Ano uule woomvula odhindji aantu yuukwaniilwa womazimo gaali gokuumbugantu otaa nyanyukilwa onkalamwenyo ombwanawa.

Ihe ngashingeyi otapu ningwa sha shoka tashi mbandameke aantu. Aatumwa otaa ti kuJosafat: ‘Etanga lyaakwiita enene lyokiilongo yaMoab, yaAmoni naamboka yokOndundu yaSeir otaye ya oku ku ponokela.’ Aaisrael oyendji otaa gongala kuJerusalem okupula ekwatho kuJehova. Yo otaa yi kotempeli, naahoka Josafat ota galikana: ‘Akutu, Jehova Kalunga ketu, tse katu shi wo shoka tu na okuninga. Tse katu na ekwatho lyasha komeho yetanga lyaakwiita ndika enene. Tse otatu kongo ekwatho kungoye.’

Jehova ota pulakene note etha gumwe gwomaapiya ye a tye koshigwana: ‘Olugodhi kalu shi lweni, ihe olwaKalunga. Ne itamu ka pumbwa okukondja. Taleni owala, nomu mone nkene Jehova te mu hupitha.’

Ongula ya landula Josafat ota ti koshigwana: ‘Inekeleni Jehova!’ Opo nduno ote etha aaimbi ye ende komeho yaakwiita ye, nomanga taye ende, yo otayi imbile Jehova omaimbilo gehambelelo. Owa tseya kutya oshike tashi ningwa po uuna taye ya popepi nelondo? Jehova ote etha aakwiita aatondi ya kondjithathane. Nuuna Aaisrael taa thiki po, aakwiita ayehe aatondi otaya adhika ya sa!

Josafat okwa li noondunge okwiinekela Jehova, hasho mbela? Tse otatu ka kala wo aanandunge ngele tatu Mu inekele.