Mbela oshi li ngaa pandunge okwiitaala kutya aasi otaya ka yumuka? Omuyapostoli Paulus okwa li e shi kutya oku na eyumuko. Okwa wilikwa kuKalunga a nyole ta ti: “Ngele etegameno lyetu muKristus oshinima shokombanda yevi owala, inaaku tegelelwa we sha shilwe, nena tse aantu aakweyi tu vulike kaantu ayehe. Ihe oshili oyo ndjika: Kristus okwa yumudhwa kuusi. Shika otashi koleke kutya mboka ya kotha muusi ngashingeyi, otaa ka yumudhwa wo.” (1 Aakorinto 15:19, 20) Paulus okwa li e shi kutya eyumuko otali ka ningwa lela. Omolwashike mbela? Okwa li e shi kutya eyumuko lyaJesus olya ningwa shili. * (Iilonga 17:31) Onkee ano, Paulus okwa ti kutya Jesus ngoka a “yumudhwa kuusi,” oye omuntu gwotango a yumudhwa okukala nomwenyo sigo aluhe. Ngele Jesus oye omuntu gwotango a yumudhwa, nena opu na yalwe mboka taya ka yumudhwa wo.

Opu na wo etompelo lilwe ndyoka tali tu shilipaleke kutya aasi otaya ka yumuka. Jehova Kalunga omunashili. Oye “Kalunga ngoka ihaa fundju,” noke na siku e ke shi ninge nando. (Titus 1:2) Oku uvaneka kutya ota ka yumudha aasi. Oku ulika kutya ota vulu oku shi ninga. Onkee ano, ota ka gwanitha po shili euvaneko lye.

Omolwashike Jehova a ninga elongekidho lyokuyumudha aasi monakuyiwa? Okwe shi ninga omolwohole ye. Job okwa pula a ti: “Omuntu ngele okwa si, ota kala ishewe e na omwenyo?” Okwa ti ishewe: ‘Oto ka ithana ndje notandi ku itaale; oto ka yuulukwa omushitwa gwoye.’ (Job 14:14, 15) Job okwa li e na uushili kutya He gwomegulu, omunahole, ota ka yuulukwa omushitwa gwe e te mu yumudha. Mbela Kalunga okwa lundulula edhiladhilo lye? Aawe. Ombiimbeli otayi ti: “Ongame Omuwa, itandi lunduluka.” (Maleaki 3:6) Kalunga okwa hala natango okuyumudha aasi. Okwa hala ya kale ye na uukolele noye na ombili. Olundji uuna omuvali a silwa omwana, oha kala a hala a kale ishewe nomwenyo. Ihe ita vulu oku shi ninga, molwaashoka ina fa  Kalunga ngoka e na oonkondo okuninga shoka a hala. —  Episalomi 135:6.

Jehova ota ka pa Omwana oonkondo e etele mboka ya silwa enyanyu enenenene. Mbela Jesus oku uvitile ngiini eyumuko? Manga inaa yumudha Lasarus, okwa li a mono kutya aamwayinakadhona yaLasarus nookuume ke oya yemata noonkondo. Shika oshe mu ningitha ‘a lile.’ (Johannes 11:35) Oshikando shimwe, Jesus okwa li a tsakanene nomuselekadhi gwokuNain, ngoka a silwa omwanamati. Jesus “okwe mu uvile olukeno e ta ti kuye: ‘Ino lila we.’” Okwa yumudha omwanamati gwomuselekadhi ngoka nziyanziya. (Lukas 7:13) Osha yela kutya Jesus oha kala u uvitile ohenda mboka ya nika oluhodhi noya silwa. Ita ka kala tuu a nyanyukwa sho ta ka shitukitha oluhodhi muuyuni awuhe lu ninge enyanyu kaali shi okuyelekwa nasha!

Mbela owa silwa nale omuntu ngoka wu hole tagu pu mo? Otashi vulika wu wete kutya eso oli li uupyakadhi mboka itaawu vulu okukandulwa po. Ihe otali vulu okuhulithwa po okupitila meyumuko ndyoka Kalunga ta ka ninga okupitila mOmwana. Dhimbulukwa kutya Kalunga okwa hala wu mone sho eso tali hulithwa po. Okwa hala wu ka kale po nowu ka hambelele aasi sho taya yumudhwa. Dhiladhila owala wu li pamwe nayo sigo aluhe, kaapu na we siku mu topoke.

Lionel, ngoka a tumbulwa metetekelo ota ti: “Lwanima onde ke shi uva ko kutya eyumuko oko li li shili. Tango osha li oshidhigu kungame oku shi itaala, nokanda li ndi inekela omuntu ngoka e shi lombwele ndje. Ihe onda kala noku shi konakona mOmbiimbeli e tandi mono kutya oko li li shili. Onda halelela okumona ishewe tatekulu.”

Mbela owa hala okutseya oshindji kombinga yeyumuko? Oonzapo dhaJehova otadhi ka kala dha nyanyukwa oku ku ulukila mOmbiimbeli yoye kutya omolwashike dhi itaala kutya oku na eyumuko. *