1. Eitaalo olya simana shi thike peni? (Tala kethano lyopetameko.)

OWU na esiku wi ipulile to ti: ‘Mbela Jehova ota ka kala ngaa a hala okuhupitha ndje puudhigu uunene?’ Omuyapostoli Paulus okwa ti kutya uukwatya wa simana mboka twa pumbwa, opo tu ka hupe owo eitaalo. Okwa ti: “Kape na ngoka ta hokiwa kuKalunga, ngele ke na eitaalo.” (Aahebeli 11:6) Otashi vulika shi monike sha fa oshipu okuninga, ihe uushili owo kutya “haantu ayehe yi itaala.” (2 Aatessalonika 3:2) Omanyolo ngaka gaali otage tu kwathele tu uve ko kutya osha simana tu koleke eitaalo lyetu.

2, 3. (a) Okukala tu na eitaalo, osha simana shi thike peni? (b) Otatu ka kundathaneni iinima yini?

² Omuyapostoli Petrus okwa popi kutya eitaalo lyetu oli na ‘okutalika’ ngele olya kola. (Lesha 1 Petrus 1:7.) Uudhigu uunene owu li lela popepi, onkene otwa hala tu “itaale e tatu hupithwa.” (Aahebeli 10:39) Otu na ano okulonga twa mana mo tu koleke eitaalo lyetu. Otwa hala natse tu ka pewe ondjambi, sho Omukwaniilwa gwetu, Jesus Kristus, ta ka hololwa. Natse natu indile tu gwedhelwe eitaalo ngaashi omulumentu ngwiyaka i indilile Jesus, ta ti: ‘Kwatha ndje uuna ndaa na eitaalo.’ (Markus 9:24) Nenge tu indile ngaashi aayapostoli mbeyaka  ya tile: “Tu gwedhela eitaalo.” —  Lukas 17:5.   

³ Moshileshwa shika otatu ka kundathaneni iinima tayi landula: nkene tatu vulu okutunga eitaalo lyetu, nkene tatu vulu okuulika kutya eitaalo lyetu olya kola nonokutya omolwashike tu na okukala neinekelo kutya Kalunga ote ke tu yamukula, uuna tatu mu pula e tu gwedhele eitaalo.

4. Iiholelwa yoolye tayi vulu oku tu kwathela tu koleke eitaalo lyetu?

⁴ Molwaashoka eitaalo olya simana, Tate Jehova okwe tu pa iiholelwa oyindji mOmbiimbeli yaamboka ya li ye na eitaalo. Oshiholelwa kehe “osha nyolwa, shi tu longe.” (Aaroma 15:4) Iiholelwa yaantu ngaashi Abraham, Sara, Isak, Jakob, Moses, Rahab, Gideon, Barak nayalwe oyendji, otayi vulu oku tu inyengitha tu koleke eitaalo lyetu. (Aahebeli 11:32-35) Kakele kiiholelwa yaamboka ya li ko nale, otu na wo iiholelwa iiwanawa yankene ooitaali ooyakwetu yu ulike eitaalo lyawo momasiku getu. *

5. Elia oku ulike ngiini kutya oku na eitaalo lya kola muJehova, notu na okwiipula epulo lini?

⁵ MOmbiimbeli omu na oshiholelwa shomupolofeti Elia. Sho to tedhatedha koshiholelwa she, ndhindhilika oonkalo ntano moka u ulike kutya okwi inekela Jehova thiluthilu. (1) Sho omupolofeti Elia a lombwele omukwaniilwa Ahab kutya Jehova ote ke eta oshikukuta, okwe shi popi nomukumo a ti: “Medhina lyOmuwa, Kalunga kaIsrael omunamwenyo, ngoka tandi mu longele, otandi ku lombwele kutya omume nenge omvula itayi ka loka momimvo ndhika tadhi ya.” (1 Aakwaniilwa 17:1) (2) Elia okwa li i itaala kutya Jehova ote ke ya pa shoka ya pumbwa pethimbo lyoshikukuta. (1 Aakwaniilwa 17:4, 5, 13, 14) (3) Elia okwa li wo i itaala kutya Jehova ota vulu okuyumudha okamwanamati komuselekadhi. (1 Aakwaniilwa 17:21) (4) Ka li e na omalimbililo gasha kutya Jehova ota ka tuma omulilo gu lungunithe po omafikiloyambo kondundu Karmel. (1 Aakwaniilwa 18:24, 37) (5) Nokuli nomanga omvula inaayi tameka okuloka, Elia okwa lombwele Ahab nomukumo a ti: “Ngashingeyi inda, u ka lye. Ondu uvite oshihomo shomvula tayi ya.” (1 Aakwaniilwa 18:41) Ngashingeyi sho twa kundathana ehokololo lyaElia, otatu vulu okwiipula tatu ti: ‘Mbela eitaalo lyandje olya kola ngaa ngaashi lyaElia?’

6. Oshike twa pumbwa kuJehova, opo tu tunge eitaalo lyetu?

⁶ Otu na okupula Kalunga e tu pe ombepo ondjapuki, oshoka itatu vulu okutunga eitaalo lyetu kutse yene. Omolwashike? Omolwaashoka eitaalo oshiimati shombepo ondjapuki. (Aagalati 5:22) Uuna tatu pula  ombepo ondjapuki megalikano, ngaashi Jesus a ti natu ninge, oshinima shopandunge. Jesus oku uvaneke kutya Jehova ‘ota gandja ombepo ondjapuki kumboka taye mu indile.’ —  Lukas 11:13.

7. Yelitha nkene tatu vulu okukaleka eitaalo lyetu lya kola.

⁷ Otwa pumbwa okukaleka eitaalo lyetu lya kola. Eitaalo olya fa omulilo. Omulilo ngele opo gwa temwa, otashi vulika gu kale gwa hanya lela. Ihe ngele inatu kala tatu tula po iikuni, otagu dhimi, e tapu thigala owala omutoko omutalala. Ngele otwa kala tatu tula po iikuni, otagu kala gwa tema nawa. Neitaalo osho li li ngaaka. Ngele otwa kala hatu lesha nokukonakona Oohapu dhaKalunga esiku kehe, ohole yetu yoku dhi hola noyokuhola Jehova otayi koko. Shika otashi ke tu kwathela tu kaleke po eitaalo lyetu noku li koleka.

8. Oshike tashi vulu oku ku kwathela wu tunge eitaalo lyoye nowu li kaleke lya kola?

⁸ Ino kala owala wa gwanenwa kontseyo ndjoka wi ilongele manga inoo ninginithwa. (Aahebeli 6:1, 2) Kala to ilongo kombinga yomahunganeko ngoka ga gwanithwa nale. Shika otashi ku kwathele wu tunge eitaalo lyoye nowu li kaleke lya kola. Oto vulu wo okulongitha Oohapu dhaKalunga wu tale ngele eitaalo lyoye olya kola ngaa shili. —  Lesha Jakob 1:25; 2:24, 26.

9, 10. Eitaalo lyetu oha li kolekwa ngiini (a) kookuume aawanawa? (b) pokugongala? (c) mokuuvitha?

⁹ Omuyapostoli Paulus okwa ti kutya Aakriste otaya vulu ‘okutsaathana omukumo kombinga yeitaalo lyawo ayehe.’ (Aaroma 1:12) Okokutya ngiini? Otashi ti otatu vulu okutsaathana omukumo, ngele ohatu kala nooitaali ooyakwetu. Ohatu tsuwa omukumo unene tuu ngele hatu kala naamboka eitaalo lyawo lya pita “momayeleko.” (Jakob 1:3) Ookuume aawinayi otaya yono po eitaalo lyetu, omanga ookuume aawanawa taye li tungu. (1 Aakorinto 15:33) Nomolwaashono hatu ladhipikwa tu kale hatu yi aluhe kokugongala hoka hatu ‘kumagidhathana.’ (Lesha Aahebeli 10:24, 25.) Oshikwawo, omayele ngoka hatu pewa pokugongala ohaga koleke eitaalo lyetu. Ombiimbeli otayi ti kutya “eitaalo ohali zi mokuuva.” (Aaroma 10:17) Onkene owu na okwiipula to ti: ‘Mbela okugongala kwopaKriste oku li ngaa oshitopolwa sha simana shonkalamwenyo yandje?’

¹⁰ Eitaalo lyetu ohali kolo wo, uuna tatu uvithile aantu nenge tatu ya longo kombinga yonkundana ombwanawa ndjoka yi li mOmbiimbeli. Okuuvitha ohaku tu kwathele wo tu kale twi inekela Jehova notu popye nuulaadhi monkalo kehe, ngaashi Aakriste yopetameko. —  Iilonga 4:17-20; 13:46.

11. Omolwashike Kaleb naJosua ya li ye na eitaalo lya kola, nongiini tatu vulu okuya holela?

¹¹ Eitaalo lyetu muJehova ohali koko, uuna tatu mono nkene te tu kwathele nankene ta yamukula omagalikano getu. Shoka osho sha li sha ningilwa eitaalo lyaKaleb naJosua.  Sho ya li taya ndaadha Evi lyEuvaneko, oya li yu ulike eitaalo lyawo muJehova. Oshikando kehe ya mono nkene Jehova te ya kwatha momukokomoko gwoomvula, eitaalo lyawo olya kolo shi vulithe nale. Shika osho sha ningitha Josua a lombwele Aaisraeli nomukumo ta ti: “Omuwa Kalunga keni okwe mu pe iinima ayihe iiwanawa mbyoka e yi mu uvanekele.” Konima okwa ti: “Ngashingeyi nduno simanekeni Omuwa noku mu longela mevuliko nomuudhiginini.” Opo nduno okwa gwedha ko ta ti: “Ihe ngame negumbo lyandje, tse otatu longele Omuwa.” (Josua 23:14; 24:14, 15) Otu wete kutya ngele otwa kala twi inekela Jehova e tatu mono nkene he tu kwatha, eitaalo lyetu otali ka kola shi vulithe nale. —  Episalomi 34:8.

12. Ohatu ulike ngiini kutya otu na eitaalo lya kola?

¹² Ohatu ulike ngiini kutya otu na eitaalo lya kola? Omulongwa Jakob okwa ti: “Ngame otandi ku ulukile wo eitaalo lyandje tali holoka miilonga.” (Jakob 2:18) Iilonga yetu ohayi ulike kutya otu na eitaalo lya kola. Natu tale kutya omomukalo guni.

13. Omolwashike okuuvitha haku ulike kutya otu na eitaalo?

¹³ Ongiini tatu vulu okuulika sha yela kutya otu na eitaalo? Okupitila mokuuvitha. Uuna tatu uvitha, otatu ulike kutya otwi itaala kutya ehulilo oli li popepi ‘noitali dhikala.’ (Habakuk 2:3) Opo tu tale ngele eitaalo lyetu olya kola ngaa shili, otatu vulu okwiipula ngeyi: ‘Okuuvitha okwa simana shi thike peni kungame? Mbela ohandi kambadhala ngaa nda mana mo ndi uvithile aantu kombinga yaKalunga? Ohandi kongo ngaa oompito okuninga oshindji mokulongela Jehova?’ (2 Aakorinto 13:5) Natu ‘hempulule nokana ketu ehupitho,’ opo tu ulike mpoka eitaalo lyetu li thike. Shika otatu  shi ningi mokuuvitha onkundana ombwanawa. —  Lesha Aaroma 10:10.

14, 15. (a) Ongiini tatu vulu okuulika eitaalo lyetu monkalamwenyo yetu yakehe esiku? (b) Hokolola nkene omuntu ta vulu okuulika eitaalo lya kola.

¹⁴ Ohatu ulike wo kutya otu na eitaalo, sho hatu idhidhimikile omashongo monkalamwenyo. Ngele otu li moluhepo, tatu ehama, twa teka omukumo, twa polimana nenge tu na uupyakadhi wulwe, otwa pumbwa eitaalo kutya Jehova naJesus otaya vulu oku “tu kwatha pethimbo lyo opala.” (Aahebeli 4:16) Ngele ohatu pula Jehova ekwatho, otashi ulike kutya otu na eitaalo. Jesus okwa ti kutya otatu vulu okupula Jehova e tu pe “nena oshithima shetu twe shi pumbwa.” (Lukas 11:3) Omahokololo ngoka taga adhika mOmbiimbeli otaga holola kutya Jehova ota vulu oku tu pa kehe shoka twa pumbwa. Pashiholelwa, sho muIsraeli mwa li oshikukuta sha geya, Jehova okwa pe Elia iikulya nomeya. Ombiimbeli otayi ti: “Okwa nu omeya mokalonga, nomadhilakola oge mu etele oshikwiila nonyama ongula kehe nongulohi.” (1 Aakwaniilwa 17:3-6) Shika otashi tu pe einekelo kutya Jehova ota vulu oku tu pa shoka twa pumbwa.

¹⁵ Otu na einekelo kutya ngele otwa landula omakotampango gOmbiimbeli, otatu vulu okugwanithila po aanegumbo lyetu oompumbwe dhawo. Rebecca, omumwameme ngoka ha kala muAsia. Ota hokolola nkene ye naanegumbo lye ya tula miilonga omakotampango ngoka ge li muMateus  6:33 nomOmayeletumbulo 10:4. Ota hokolola kutya omusamane gwe okwa li a mono kutya iilonga ye otayi tula ekwatathano lyawo naJehova moshiponga. Onkene okwe yi etha po. Oya tameke okuteleka iikulya yokulanditha, opo ya sile oshimpwiyu aanona yawo yane. Oya li haya mono aluhe oshimaliwa sha gwana oku ya sila oshimpwiyu, oshoka oya li haya longo nuudhiginini. Ota ti: “Otwa mono kutya Jehova ine tu etha po. Kapu na esiku lya pitile po inaatu lya.” Mbela nangoye owa pita monkalo ya faathana, ndjoka ya koleke eitaalo lyoye?

16. Otatu ka mona oshizemo shini, ngele otwa kala twi inekela muKalunga?

¹⁶ Katu na okukala twa limbililwa ngele Jehova ote tu kwatha ngaa, uuna tatu landula ewiliko lye. Paulus okwa totha moohapu dhaHabakuk ndhoka tadhi ti: “Omuntu ngoka a ningi omuyuuki koshipala shaKalunga, ota kala e na omwenyo molweitaalo.” (Aagalati 3:11; Habakuk 2:4) Onkee ano, otu na okukala tu na eitaalo lya kola muKalunga ngoka ta vulu oku tu kwatha. Paulus ote tu dhimbulukitha kutya Kalunga oye “ta longo noonkondo ndhoka dhi li mutse, ota vulu okulonga oshindji shi vulithe pushoka tatu shi indile nenge tatu shi dhiladhila.” (Aaefeso 3:20) Aapiya yaJehova ohaya kambadhala ya mana mo ya longe ehalo lye, ihe oye shi kutya oye na omangambeko. Otwa pandula Kalunga noonkondo, sho ha kala natse te tu yambeke sho tatu ningi oonkambadhala ndhoka.

17. (a) Jesus okwa yamukula ngiini eindilo lyaayapostoli? (b) Omolwashike tatu vulu okwiitaala kutya Jehova ote ke tu yamukula, ngele otwe mu indile e tu gwedhele eitaalo?

¹⁷ Otashi vulika oonkundathana ndhika tadhi tu ningitha tu kale tu uvite ngaashi aayapostoli ya li yu uvite, sho ya pula Jesus ya ti: “Tu gwedhela eitaalo.” (Lukas 17:5) Jesus okwa li e ya yamukula momukalo gwa sheywa poPentekoste yomo 33. Okwe ya tumine ombepo ondjapuki yi ya kwathele yu uve ko muule elalakano lyaKalunga. Shika osha koleke eitaalo lyawo. Oshizemo? Oya tameke okuuvitha momukalo inaagu monika nando onale sigo opethimbo mpoka. (Aakolossa 1:23) Mbela natse otatu ka yamukulwa ngaa, ngele otwi indile tu gwedhelwe eitaalo? Tate Jehova ote tu uvanekele kutya ote ke tu yamukula, ngele “tatu mu indile shaa shoka she mu opalela.” —  1 Johannes 5:14.

18. Tate Jehova oha yambeke ngiini mboka taya tungu eitaalo lyawo?

¹⁸ Tate Jehova ota ka kala e tu hokwa, ngele otwe mu inekela thiluthilu. Ote ke tu gwedhela ko keitaalo lyetu, ngele otwe mu indile. Eitaalo lyetu otali ka kola shi vulithe nale, ‘naKalunga ote ke tu ninga twoopalela Oshilongo she.’ —  2 Aatessalonika 1:3, 5.