OMBIIMBELI oya ti: “Aanona oyo omagano ga za kOMUWA; oluvalo olwo eyambeko lyo lyene.” (Eps. 127:3) Onkee ano, itashi kumitha sho aavali Aakriste haya hambelele nenyanyu okanona hoka opo ka valwa.

Nonando okuvalwa kokanona ohaku eta enyanyu, ohaku etelele wo iinakugwanithwa ya kwata miiti. Opo okanona ka ka kale ke na uukolele ngele ka ningi omukuluntu, oka pumbwa ka kale taka li aluhe iikulya yi na iitungithi. Opo okanona ka dhiginine elongelokalunga lyashili, oka pumbwa okukala ta ka pewa iikulya yopambepo newiliko kaavali yako mboka haya kambadhala okuthindila muko omakotampango gopakalunga. (Omayel. 1:8) Edheulo ndyoka oli na okutameka uunake, noli na okukala lya kwatela mo shike?

Tala koshiholelwa shaManoak gwomezimo lyaDan, ngoka a li a kala moshilando Zora muIsraeli shonale. Omuyengeli gwaJehova okwa li a lombwele Manoak kutya omukulukadhi gwe ngoka ontimbe okwa li ta ka mona okanona okamati. (Aatok. 13:2, 3) Nopwaahe na omalimbililo, omulumentu omudhiginini Manoak nomukulukadhi gwe oye na okukala ya li ya nyanyukwa noonkondo omolwetegameno ndyoka. Ihe, oya li wo ye na omaipulo gomuule. Onkee ano Manoak okwa li a galikana a ti: “OMUWA, tumununa omuntu gwaKalunga kutse, opo e tu lombwele kutya okamati otatu ka ningi ngiini, nge ka valwa.” (Aatok. 13:8) Manoak nomukulukadhi gwe oya li tayi ipula neputudho lyokanona kawo. Nopwaahe na omalimbililo, oya li ya longo omwanamati gwawo Simson, oompango dhaKalunga, noonkambadhala dhawo odha li dha pondola. Ombiimbeli oya ti kutya ‘oonkondo dhOMUWA odha tameke okukoleka [Simson].’ Omolwoonkondo ndhoka a li a pewa, Simson okwa li a longo iilongankondo oyindji e li gumwe gwomaatokolihapu yaIsraeli. — Aatok. 13:25; 14:5, 6; 15:14, 15.

Mbela okanona oke na okudheulwa kuyele sho ke thike peni? “Okuza kuunona” we, Timoteus okwa li a longwa “Omanyolo omayapuki” kuyina Eunike nokuyinakulu Loide. (2 Tim. 1:5; 3:15) Eeno, Timoteus okwa li a tameke okulongwa Omanyolo sho omushona lela.

Oshi li pandunge kaavali Aakriste ya galikane ya pewe ewiliko ya ninge oompangela komeho yethimbo opo ya tameke okudheula okanona kawo “okuza kuunona.” Omayeletumbulo 21:5 otaga ti: “Oompangela dhomunandjungu otadhi mu etele eliko.” Manga okanona kawo inaaka valwa, aavali oye na okukala yi ilongekidha nawa. Otashi vulika nokuli ya kale ye na omusholondondo gwiinima mbyoka okanona taka ka pumbwa. Osha simana wo kuyo ya ninge omalongekidho ge na ko nasha nomaipyakidhilo gopambepo. Elalakano lyawo oli na okukala okutameka edheulo ndyoka kuyele manga okanona okashona lela.

Embo lyedhina Early Childhood Counts — A Programming Guide on Early Childhood Care for Development olya ti: “Oomwedhi dhopetameko uuna okanona ka valwa ohadhi kala dha simanenena molwaashoka pethimbo mpoka opo uuluyi wokanona hawu koko. Pethimbo ndika omwaalu gwoonyapi, ndhoka dhi li omatsakaneno ngoka hage shi ningi tashi wapa opo okanona ka kale taki ilongo iinima, ohadhi indjipala lwiikando omilongo mbali.” Kashi li tuu pandunge kaavali ya longithe ethimbo ndika efupi lyokukoka kwokanona pamadhiladhilo ya tameke okukuna momadhiladhilo gako iinima yopambepo!

Omuvalakadhi gumwe omukokolindjila gwondjigilile okwa popi kombinga yokamwanakadhona okagundjuka a ti: “Onda kala handi yi naye muukalele okuza owala sho a li e na omwedhi gumwe. Nonando ka li u uvite shoka tashi ningwa po, ondi wete kutya okukala kwe muukalele manga omushona lela okwa li kwe mu etele uuwanawa. Sho a ka gwanitha oomvula mbali, okwa kala ha gandja nomukumo uutraktate kwaamboka tatu mono muukalele.”

Okudheula okanona manga kuyele ohaku imike iiyimati iiwanawa. Ihe, aavali ohaya mono kutya okulonga okanona iinima yopambepo ihaku kala kaaku na omashongo.

Okwaagundjila nenge okugandja eitulomo ethimbo efupi kwokanona ohaku vulu okukala eshongo enene kaavali. Eitulomo lyaanona aashona ohali vulu okulundulukila nziya koshinima shilwe. Nokuli, oye na okatalekonawa nohaya kambadhala okutseya kehe shimwe shi li momudhingoloko gwawo. Aavali otaya vulu okuninga po shike ya kwathele okanona kawo ka kale taka gandja eitulomo kwaashoka taya kambadhala oku ka longa?

Tala kwaashoka Moses a li a popi. Deuteronomium 6:6, 7 ota ti: “Ino dhimbwa oohapu ndhika tandi dhi ku lombwele nena. Dhi nongeka aamwoye. Dhi hokolola, uuna u li moyaandjeni nuuna u li mepola, uuna to vululukwa nuuna to longo.” Oshitya “nongeka” otashi gandja edhiladhilo lyokulonga omuntu oshinima to shi endulula lwiikando. Okanona okashona oka fa okameno okashuushuuka hoka haka pumbwa okutekelwa pandjigilile. Molwaashoka okweendulula lwiikando ohaku kwathele aakuluntu ya dhimbulukwe iinima ya simana, osha yela kutya otaku ka kwathela wo aanona aashona.

Aavali oya pumbwa okukala haya kala noyana opo ya vule oku ya longa oshili yaKalunga. Muuyuni mbuka wi ipyakidhila noonkondo, okwiikalekela ethimbo lyoku ya longa otaku vulu okukala eshongo. Ihe omuyapostoli Paulus ote tu ladhipike tu ‘longithe nawa ethimbo’ miinima ya simana yopaKriste. (Ef. 5:15, 16) Ongiini shika tashi vulu okuningwa? Omukuluntugongalo gumwe  ngoka omukulukadhi gwe e li omukokolindjila gwondjigilile okwa li e shi mono oshidhigu okudheula okamwana, okugwanitha po iinakugwanithwa yegongalo nosho wo iilonga ye yokwiikongela omboloto. Ongiini mbela ya li taya vulu okukonga ethimbo ya dheule okamwanakadhona kawo? He yako okwa ti: “Ongulonene kehe manga inaandi ya kiilonga, ngame nomukulukadhi gwandje ohatu ka leshele mEmbo Lyandje lyOmahokololo gOmbimbeli nenge mokambo Konakona Omanyolo esiku kehe. Kongulohi, ohatu shilipaleke kutya otwe ka leshela manga inaa ka kotha, nohatu yi nako muukalele. Inatu hala tu hunuthe ompito ndjika yoku ka longa pethimbo lyoomvula ndhika dhotango dhonkalamwenyo yako.”

Otu na okukala twa hala aanona yetu ya ka kale aantu ye na oshinakugwanithwa. Ihe, elalakano lyetu lya simana olyo oku ya dheula ya kokeke momitima dhawo ohole yokuhola Kalunga. — Mark. 12:28-30.

Episalomi 127:4 otali ti: “Aamwoyemati u ya na methimbo lyuugundjuka woye, oya fa iikuti moshikaha shofule.” Kungawo aanona otaya yelekwa niikuti mbyoka yi na okukala ya shonekwa nawa kwaashoka tashi umbwa. Omuumbi guutati ke na esiku a galule oshikuti ngele e shi umbu. Aavali oye na “iikuti,” ano oyana, uule owala wethimbo efupi lya ngambekwa. Ethimbo ndyoka oli na okulongithwa mokutula omakatompango gaKalunga momadhiladhilo nomomitima dhoyana.

Omuyapostoli Johannes okwa nyola kombinga yoyana yopambepo a ti: “Kape na sha shilwe hashi nyanyudha ndje, shi vulithe okuuva kutya aamwandje oya kala moshili.” (3 Joh. 4) Aavali Aakriste otaya vulu wo okuulika olupandu lwa faathana sho ye wete oyana ‘ye li moshili.’