Aantu yamwe mboka ya lesha ehokololo ndyoka taya endelele oyi ipula epulo ndyoka, ihe moovelise ndhono, omwa popiwa aalumentu yaali ayehe ya li ye na edhina Mefiboshet. Onkee, ehokololo ndyoka ngele otwe li konakona otatu vulu okwiilonga mo sha.

Omukwaniilwa Saul gwaIsraeli okwa li e na oyanamati yaheyali naakadhona yaali. Jonatan oye a li osheeli she. Omukwaniilwa ngoka lwanima okwa ka kala ishewe e na omwanamati gwedhina Mefiboshet, a valwa komukiintu gwe gwoponto Rizpa. Shoka oshihokithi, Jonatan naye okwa li wo e na omwanamati gwedhina Mefiboshet. Onkee, omukwaniilwa Saul okwa li e na omwanamati gwedhina Mefiboshet nosho wo omutekulu e na edhina lya fa ndyoka.

Pompito yimwe, omukwaniilwa Saul okwa li a tameke okukala e tonde Aagibeon mbono ya li mokati kAaisraeli, nokwa li a kambadhala oku ya komba po ayehe. Anuwa oyendji yomuyo oya li nokuli ya dhipagwa. Ihe oshinima shoka osha li sha puka lela. Omolwashike mbela? Oshoka pethimbo lyaJosua, aawiliki Aaisraeli oya li ya ningi ehangano lyombili nAagibeon. — Jos 9:3-27.

Ehangano ndyono lyombili olya li natango tali longo pethimbo lyomukwaniilwa Saul. Ihe nonando ongawo, omukwaniilwa ngoka okwa li a kambadhala okulatheka po Aagibeon ayehe. Oshinima shono a kambadhala okuninga oshe mu ningitha ‘ye negumbo lye ya kale ye na ondjo yombinzi.’ (2 Sam. 21:1, yelekanitha OB-1954) Hugunina, David okwa ka ninga omukwaniilwa. Aagibeon mboka ya hupu po oye mu lombwele kombinga yoshinima shoka oshinyanyalithi. David okwe ya pula kutya epuko ndyoka lya kwata miiti lya ningwa kuSaul ne li opaleke ngiini, opo Jehova a yambeke evi lyAisraeli. Pehala lyokupula iimaliwa, Aagibeon mboka oya pula ya pewe oyanamati yaheyali yaSaul, omulumentu ngoka a li a ‘hala e ya hanagule po’ ayehe, ye ya dhipage. (Num. 35:30, 31) David okwe ya pe epitikilo. — 2 Sam. 21:2-6.

Pethimbo ndyoka, Saul naJonatan oya adhika nale ya sila miita, ihe omwanamati gwaJonatan Mefiboshet okwa li natango e na omwenyo. Okwa li a mono oshiponga sho a li okanona e ta lemana, noka li a kutha ombinga meponokelo ndyoka lya li lya ningwa kuhekulu Saul, sho li a ponokele Aagibeon. Oshiningwanima shoka manga inaashi ningwa, David okwa adhikile a ninga ehangano lyuukuume naJonatan, ndyono lya li tali ka etela oluvalo lwe uuwanawa, mwa kwatelwa Mefiboshet omwanamati gwaJonatan. (1 Sam. 18:1; 20:42) Ehokololo ndyoka otali ti: ‘Molweuvaneko ndyoka yu uvanekelathana naJonatan koshipala shOmuwa, David okwa hupitha omuna gwaJonatan Mefiboshet, omutekulu gwaSaul.’ — 2 Sam. 21:7, yelekanitha OB-1954.

Ihe nonando ongawo, David okwa ningi shoka a pulwa kAagibeon. Okwa gandja oyanamati yaSaul yaali, gumwe gwomuyo edhina lye oMefiboshet, nosho wo aatekulu yaSaul yatano ya dhipagwe. (2 Sam. 21:8, 9) Shono David a ningi, osha ningitha moshilongo shaIsraeli kaa mu kale we ondjo yombinzi.

Oshiningwanima shono kashi shi owala ondjokonona. Ompango yaKalunga oya li ya yela. Otayi ti: ‘Oyana inaa dhipagelwa oondjo dhoohe.’ (Deut. 24:16) Andola oyanamati yaali yaSaul nosho wo aatekulu ye yatano oya li kaa ye na ondjo, ando Jehova ina pitika ya dhipagwe. Ompango ndjono oya gwedha ko ya ti: “Shaa ngoka na dhipagelwe iipogo ye mwene.” Osha fa shi li ngeyi kutya, oyanamati yaSaul yaali naatekulu ye yatano mbono ya dhipagwa oya li ya kutha ombinga mwaashono sha ningwa kuSaul, sho a kambadhala okudhipaga po Aagibeon ayehe. Onkee ano, ayehe yaheyali oya dhipagwa omolweyono ndyoka ya ningi.

Ehokololo ndika otali tu longo kutya omuntu ita vulu okutya ina ninga oshinima oshiwinayi shaashi e wete kutya okwe shi ningi aniwa a li ta landula owala omalombwelo. Eyeletumbulo limwe otali ti: ‘Yelekanitha oondjila kohi yoompadhi dhoye, noondjila dhoye otadhi ka kala dha kolelela.’ — Omayel. 4:24-27; Ef. 5:15.