PETHIMBO lyOmbiimbeli, iigonda oya li owala hayi pewa uukwanegumbo moka mwa za omufuko gwomukadhona, ngele omaukwanegumbo agehe moka mwa za omukadhona naamoka mwa za omumati ga zimine kutya naya hokane. Iigonda oya li hayi vulu okukala iinima mbyoka yi na ongushu, iinamwenyo nenge iimaliwa. Poompito dhimwe, omumati okwa li ha longo iilonga yontumba, ngaashi Jakob, ngoka a li a zimine a longele he yaRakel omimvo heyali opo e mu hokane. (Gen. 29:17, 18, 20) Omolwashike aantu ya li haya gandja iigonda?

Omulongwantu gumwe gwOmbiimbeli, Carol Meyers okwa ti: “Iigonda oya li hayi pewa uukwanegumbo moka mwa za omukadhona, opo yi futile po iilonga mbyoka a li ha longo, mbyoka ya li ya simana momaukwanegumbo ngoka ga li ge na iilonga [yuunamapya] nuuniimuna.” Iigonda oya li wo hayi koleke ekwatathano lyuukuume pokati komaukwanegumbo moka mwa za omumati naamoka mwa za omukadhona mboka taya hokana. Ekwatathano ndyoka olya li hali kwathele omaukwanegumbo ngoka gaali ga kwathathane pethimbo lyuudhigu. Shimwe ishewe, iigonda mbyoka oya li hayi ulike kutya omukadhona okwa gondwa nosho wo kutya ngashingeyi ita ka silwa we oshimpwiyu nokugamenwa kuhe, ihe okomusamane gwe.

Okugandja iigonda kasha li tashi ti kutya omukadhona okwa li ha landwa nenge ha landithwa po. Embo Ancient Israel — Its Life and Institutions otali ti: “Oshinakugwanithwa shika shokugandja iimaliwa nenge oshinima shilwe shongushu megumbo moka mwa za omukadhona osha li hashi ningitha oondjokana dhAaisraeli dhi kale dha fa hadhi landwa. Ihe osha fa shi li ngeyi kutya iigonda oya li hayi gandjwa kaanegumbo yaandjamukadhona molwaashoka ke shi we gwawo, ihe kaya li ofuto yoku mu landa po.”

Kunena miilongo yimwe, aantu natango ohaya gandja iigonda. Ngele aavali Aakriste otaya pula iigonda, naya ‘kale ye na olukeno naantu ayehe’ mokwaa ha pula iinima oyindji kaayi li pandjele. (Fil. 4:5; 1 Kor. 10:32, 33) Pamukalo ngoka otaya ulike kutya kaye “hole eliko” nenge kutya kaye na olwiho. (2 Tim. 3:2) Shimwe ishewe, ngele aavali Aakriste itaya pula iigonda ya pitilila, omumati ngoka ta hokana omwanakadhona gwawo ita ka thiminikwa a undulile ohango komeho sigo oosho a gwanitha iigonda mbyoka. Nenge a kale e uvite kutya oku na okweetha po uukokolindjila a ka longe iilonga yokwiikongela omboloto, opo a vule okumona iigonda oyindji noonkondo mbyoka ta pulwa.

Miilongo yimwe, iigonda ohayi gandjwa shi ikolelela kompango yomoshilongo. Ngele osho shi li ngawo, aavali Aakriste ohaya vulika koompango ndhoka. Omolwashike? Oshoka Oohapu dhaKalunga otadhi ti kutya Aakriste naya ‘vulike kaapangeli mboka taye ya pangele’ nokuvulika koompango ndhoka kaadhi li ompinge nehalo lyaKalunga. — Rom. 13:1; Iil. 5:29.