Aavali yandje oya li yi ilongo oshili mo 1920 nasha, manga inaaya hokana. Onda valelwa moIngilanda, petameko lyomumvo 1939. Sho nda li okamatyona, onda li handi yi kokugongala pamwe naavali yandje nondi inyolitha mOsikola yOkudheula Aauvithi. Sigo okunena, ote dhimbulukwa oshipopiwa shandje shotango. Onda li nda londa kokapundi, opo ndi vule okwaadha kokauvithilo. Onda li ndi na omimvo hamano nonda li nda lyalyakana sho nda tala aapulakeni ayehe mboka ya li aakuluntu kungame.

Tate okwa li ha nyolele ndje pokakalata shoka tandi ka popya momapya. Oshikando shotango ndu uvitha egumbo negumbo ongame awike, onda li ndi na omimvo hetatu. Onda li nda nyanyukwa noonkondo sho omulumentu ngoka nda adha megumbo a lesha kokakalata kandje, e tandi mu pe embo: “Let God Be True.” Onda matuka mepandaanda ndi ka lombwele tate. Onda li ndi hole okuuvitha nosho wo okugongala naashono osha kwathele ndje ndi kale nda hala okulongela Jehova ethimbo lyu udha.

Onda kala ndi hole oshili yOmbiimbeli noonkondo, okuza sho tate a nyolitha ndje ndi kale handi pewa oshifo shOshungolangelo. Onda li handi lesha nziya oshifo kehe ngele nde shi mono. Einekelo lyandje muJehova olya koko, naashono oshi inyengitha ndje ndi mu igandjele.

Mo 1950, otwa yi natate nameme koshigongi shi na oshipalanyolo: Theocracy’s Increase, sha li moAmerika. MEtine mu 3 Auguste, oshipalanyolo shesiku osha li: “Esiku lyaatumwa.” Omumwatate Carey Barber, ngoka konima a ka ninga oshilyo shOlutuwiliki, oye a gandja oshipopiwa sheninginitho esiku ndyoka. Konima sho a pula aaninginithwa omapulo gaali pehulilo lyoshipopiwa she, onda thikama e tandi ti: “Eeno!” Onda li ndi na omimvo 11, ihe onda li ndi shi kutya onda katuka onkatu ya simana. Onda li nda tila okuya momeya, shaashi kanda li ndi shi okuyoga. Tategona, onkelo yootate, okwa yi pamwe  nangame kokandama hoka twa li tatu ninginithilwa nokwa shilipaleke ndje kutya iinima otayi ke enda nawa. Onda ninginithwa mepathimo lyeho, noompadhi dhandje inadhi lyata mo mokandama. Omumwatate gumwe okwa gandja ndje komumwatate ngoka a ninginitha ndje. Ngoka a ninginitha ndje okwa gandja ndje komumwatate gulwe ngoka a kutha ndje mokandama. Okuza esiku ndyono lya simana, Jehova okwa tsikile nokuyelekanitha ondjila yandje.

Sho nda mana osikola, onda li nda hala okukokola ondjila, ihe aalongi yandje oya li ya ladhipike ndje ndi ka tsikile nelongo lyopombanda. Molwaashoka oya li taya thiminike ndje, ondi igandja, e tandi yi kouniveesiti. Nziya konima yaashono, onde shi dhimbulula mo kutya itandi vulu okukala nda kola moshili, ngele otandi gandja eitulomo kelongo lyopombanda. Onkee, onde li etha po. Onda pula ekwatho kuJehova megalikano, nonda nyolele aanongeki yandje ontumwafo, moka nde ya yelithile nesimaneko kutya otandi sikola owala sigo opehulilo lyomumvo gwotango, e tandi yi. Molwaashoka onda li ndi inekela lela muJehova, onda tameke okukokola ondjila nziya.

MuJuli mo 1957, onda tameke iilonga yethimbo lyu udha, mondoolopa yaWellingborough. Onda pula aamwatate koBetel yaLondon ngele opu na omumwatate omukokolindjila a pyokoka ngoka tandi vulu okuwayimina. Omumwatate Bert Vaisey okwa dheula ndje nawa. Okwa li ekuwa lya ka nale mokuuvitha nokwa kwathele ndje ndi itulile po elandulathano ewanawa lyiilonga yokuuvitha. Megongalo omwa li mu na aamwameme yahamano aakokele, mboka ya li aakokolindjila nosho wo omumwatate Vaisey nangaye. Okwiilongekidhila okugongala nokukutha ombinga muko okwa li kwa koleke einekelo lyandje muJehova nokwa kwathele ndje ndi kale ndi na eitaalo lya kola.

Sho nda tindi okuninga omukwiita onda tulwa mondholongo, moka nda kala okathimbo okafupi. Sho nda zi mo, ondi itsu po ontana yedhina Barbara, omukokolindjila i ikalekelwa. Shaashi iikwatakwata ohayi nika edhilo, otwa hokana mo 1959, notwa li twi ilongekidha okuya shaampoka tatu tuminwa. Tango, otwa tuminwa koLancashire, oshitopolwa shi li muumbangalantuninginino waIngilanda. Opo nduno muJanuali 1961, onda hiywa kOsikola yUukalele wUukwaniilwa, uule womwedhi gumwe koBetel yaLondon. Onda li nda kumwa shili, sho pehulilo lyosikola, nda langekwa po ndi li omutonateli omweendi. Onda li nda dheulwa uule wiiwike iyali komutonatelishikandjo a pyokoka, moshilandopangelo Birmingham. Omukadhandje Barbara naye okwa li a pitikwa a wayimine ndje. Okuza mpono otwa kala miilonga yuuyendi moshitopolwa shaLancashire noshaCheshire.

MuAuguste 1962, manga tu li mefudho, otwa yakula ontumwafo ya za koshitayimbelewa. Oya tumwa pamwe noofooloma dhOsikola yaGilead. Otwa galikana Jehova e tu kwathele notu udhitha oofooloma ndhoka, e tatu dhi tumu koshitayimbelewa meendelelo ngaashi twa lombwelwa. Konima yoomwedhi ntano, otwi ithanwa tu ye koBrooklyn, koAmerika, tu ka hite ongundu onti-38 yosikola yaGilead. Otwa kala uule woomwedhi omulongo, tatu longwa Ombiimbeli.

 Otwa nongekwa oshindji kombinga yOmbiimbeli, yehangano lyaJehova nokombinga yaamwatate naamwameme muuyuni awuhe. Ethimbo ndyoka otwa li tu na omimvo 20 nasha, notwi ilongo oshindji kaalongwa yalwe yomongundu yetu. Onda li ndi na uuthembahenda wokulonga pamwe nomumwatate Fred Rusk, ngoka a li gumwe gwomaanongeki yetu. Oshinima shoka a kala aluhe nokutsa omuthindo, osho okugandja omayele ge li pauyuuki, sha hala okutya, okushilipaleka kutya omayele ngoka to gandja oga kankamena kOmbiimbeli. Mokati kaanongeki yetu omwa li mwa kwatelwa mboka ye na owino oyindji, ngaashi omumwatate Nathan Knorr, Frederick Franz nosho wo Karl Klein. Otwa li wo twi ilongo oshindji koshiholelwa sheifupipiko shomumwatate A. H. Macmillan, ngoka oshipopiwa she sha li she tu longo nkene Jehova a kala nokuwilika oshigwana she pethimbo edhigu okuza mo 1914 sigo opetameko lyomumvo 1919.

Sho tu li pokupewa oonzapo, omumwatate Knorr okwa li a lombwele ndje nomukandhandje Barbara kutya otatu tuminwa koBurundi moAfrika. Otwa yi kongulumambo yaBetel tu ka tale mo-Yearbook kutya koBurundi oku na aauvithi yangapi pethimbo ndyoka. Otwa li twa kumwa sho inaatu mona mo omwaalu gwasha. Otwa mono kutya koshilongo hoka inaku uvithilwa nando onale, sho oshi li koAfrika, tse katu shi ko noinatu enda ko. Otwa li twa tila, ihe otwa galikana, shono she tu kwathele tu ngungumane.

Iinima ayihe moBurundi oya li iipe kutse, okuza ngaa konkalo yombepo, keputuko nosho wo kelaka. Otwa li tu na okwiilonga Oshifulaanisa. Otwa li wo tu na okukonga ehala lyokukala. Konima yomasiku gaali sho twa thiki moBurundi, omumwatate Harry Arnott, ngoka twa li pamwe naye kosikola, okwe tu talele po, sho a li ta shuna koZambia hoka a kala omutumwa. Okwe tu kwathele tu mone olukalwa, ndoka lwa ningi egumbo lyotango lyaatumwa moBurundi. Ihe opwa li aanambelewa yamwe yepangelo mboka kaaye shi naanaa oshindji kombinga yOonzapo dhaJehova taye tu ningile omatilitho. Iilonga yokuuvitha oya li tayi ende po nawa, ihe aakwanepangelo oye tu lombwele kutya itatu vulu okukala moshilongo, oshoka katu na oopelemeta dhiilonga. Otwa li twa yemata sho twa tidhwa mo moBurundi. Otwa yi koshilongo shilwe, koUganda.

Einekelo lyetu muJehova olye tu kwathele kaatu kale twa tila unene sho tatu yi koUganda, kaatu na oovisa. MoUganda otwa adha mo omumwatate Omukaanada, ngoka a li ta longo miitopolwa  moka mu na ompumbwe onene yaauvithi. Omumwatate ngoka okwa yelithile nawa omunambelewa ngoka hu ungaunga naamboka taye ya moshilongo kombinga yonkalo yetu. Otwa li twa pewa oomwedhi dhontumba, tu konge uuthemba wokukala moshilongo. Shoka osha li she tu ulukile kutya Jehova oku li pamwe natse note tu kwathele.

Onkalo moUganda, oya li ya yooloka ko thiluthilu kwaandjoka yomoBurundi. Iilonga yokuuvitha moUganda otwa adha yi li metifa, nonando moshilongo ashihe omwa li owala Oonzapo 28. Uuna tatu uvitha ohatu tsakaneke aantu oyendji mboka haya popi Oshiingilisa. Ihe opo tu kwathele mboka ye na ohokwe ya hume komeho, otwa li twa pumbwa okwiilonga elaka limwe lyomomalaka ngoka haga popiwa unene kaakalimo. Otwa tameke okuuvitha moshilandopangelo Kampala, moka mwa li hamu popiwa unene Oshiluganda. Onkee otwa tokola tu shi ilonge. Oshe tu pula uule womimvo dhontumba tu shi tseye nawa, noshe tu kwathele tu pondole miilonga yetu yokuuvitha. Otwa tameke nokuli okuuva ko nawa kutya aakonakoni yetu oya pumbwa shike, opo ya hume komeho. Oya tameke nokuli oku tu egululila omitima dhawo noku tu lombwela nkene yu uvitile oshili ndjoka tayi ilongo.

Osha li enyanyu enene kutse sho twa kwathele aantu yi ilonge oshili moUganda. Enyanyu lyetu olya gwedhelwa ishewe, sho twa pulwa tu ye miilonga yuuyendi. Oshitayimbelewa shaKenya, oshe tu pula ishewe tu ende noshilongo ashihe tatu yi pokakololo kehe, opo tu tale iitopolwa moka mu na ompumbwe onene yaakokolindjila yi ikalekelwa. Olundji otwa li hatu yakulwa nawa kaantu mboka inaaya tsakaneka nando onale Oonzapo. Oya li haye tu ningitha tu kale tu uvite uugumbo nohaye tu telekele nokuli.

Ondi idhenge mela lyondjila ndu uka kiilongo yilwe. Onda li nda yi molweendo lwomasiku gaali neshina lyokolutenda okuza moKampala ndu uka ketulilosikepa lyaMombasa, moKenya. Onda zi mo nosikepa ndu uka koSeychelles, okantuntu ke li mefuta lyaIndia. Okuza mo 1965 sigo 1972, omukadhandje okwa kala he ya okutalela ndje po iikando niikando moSeychelles. Pethimbo ndyono, mokantuntu moka omwa li owala aauvithi yaali, ihe oya ka ninga ongundu, ndjoka lwanima ya ka tamunuka mo, e tayi ningi egongalo. Onda li ishewe nda yi mela lyondjila ndi ka talele po aamwatate moEritrea, Etiopia nosho wo moSudan.

Onkalo moUganda oya lunduluka mepathimo lyeho, sho epangelo lyu umbwa koshipundi kaakwiita. Okuza mpono, onkalo oya kala ye tu lulila, ihe oya longo ndje kutya nani oshi li nawa okuvulika koohapu ndhoka tadhi ti kutya “shomupangeli, shi peni omupangeli.” (Mark. 12:17) Esiku limwe, opwa gandjwa elombwelo kutya aakwiilongo ayehe moUganda naye ki inyolithe kombelewa yopolisi ndjoka yi li popepi nayo. Tse otwa ningi ngaashi twa lombwelwa. Konima yomasiku omashona, manga tandi hingi ohauto moKampala ndi li nomutumwa gumwe, ohaluka omaapolisi yomonanguwi taye tu thikameke. Oomwenyo dhetu odha li dha nuka mo kuumbanda. Oye tu lundile kutya tse oondaadhi noye tu fala kosasiyona onene yopolisi, hoka twa ka yelitha nawa kutya tse aatumwa yombili. Otwe ya lombwele kutya otwi inyolitha nale kopolisi, ihe oya tindi oku tu pulakena. Otwa kwatwa po, e tatu falwa kopolisi ndjoka yi li popepi negumbo lyaatumwa. Sho twa thiki po, omupolisi ngoka twa adha mombelewa, okwe tu dhimbulula, e ta lombwele mboka twe ya nayo ye tu ethe, oshoka otwi inyolitha nale.

Olundji otwa li hatu kala moshipyu kaakwiita pomainda gomoondjila, unene tuu ngele mboka ye ku thikameke owa adha ya lya omeya. Oshikando kehe tatu thikamekwa, otwa li hatu galikana nokukala twa ngungumana sigo twe ethiwa tu ye. Ihe  mo 1973, aatumwa ayehe mboka kaaye shi oomvalele dhomoUganda oya li ya lombwelwa ya ze mo moshilongo. Oshinima shono osha li she tu yemateke.

Otwa tuminwa ishewe koshilongo shilwe, Ivory coast, shoka shi li muuninginino waAfrika. Elunduluko ndika olya li enene kutse. Otwa li tu na okwiilonga ishewe eputuko epe, okupopya Oshifulaanisa ethimbo kehe nokwiigilila okulonga pamwe naatumwa mboka ya za kiilongo yi ili noyi ili. Natango Jehova okwa li e tu kwathele tu mone aantu aaifupipiki noye na omitima omiwanawa, mboka ye na ehalo okupulakena konkundana ombwanawa. Atuhe otwa li twa mono nkene Jehova a yelekanitha ondjila yetu, oshoka otwe mu inekela.

Pethimbo mpono otwa adhika po ishewe kuudhigu wulwe sho omukulukadhi gwandje a monika okankela. Otwa kala hatu yi olundji kegumbo, koEuropa, opo a ka pangwe. Mo 1983, otwa mono kutya itatu vulu we okukala aatumwa moAfrika, oshinima shono sha li she tu teya omukumo atuhe.

Onkalo yaBarbara oye ende tayi nayipala pethimbo sho tu li moBetel, moLondon. Odhoshili kutya nani nakwaala onasi, naye osho a si. Mboka twa li pamwe nayo moBetel oya hekeleke ndje. Opwa li aaihokani yamwe mboka ya kwathele ndje ndi idhidhimikile onkalo, nondi kale ndi inekela muJehova. Konima onda mono po omumwameme gumwe ngoka a li he ya okulonga moBetel omalupita, omukokolindjila i ikalekelwa noku hole Jehova. Edhina lye oAnn, notwa hokana mo 1989. Otwa taambwa moBetel yaLondon moka tu li sigo onena.

Okuza mo 1995 sigo mo 2018, onda kala omukalelipo gwoombelewa oonene muuyuni (ngoka a li hi ithanwa omutalelipo gwiitayimbelewa). Onda talela po konyala iilongo 60 ya yoolokathana. Moshilongo kehe, onda mono nkene Jehova ha yambeke aapiya ye kutya nduno oye li moonkalo dha fa peni.

Mo 2017, otwa talele po ishewe Afrika lyomutenya. Onda fala nekulu lyandje, Ann, koBurundi. Atuhe twa li twa kumwa unene okumona aantu oyendji mboka ye ya moshili. Mepandaanda moka nda li handi uvitha nale egumbo negumbo mo 1964, ngashingeyi omwa tungwa egumbo lyaBetel ewanawa. Omwaalu gwaauvithi moshilongo ashihe ogwa konda po 15 500.

Onda li nda nyanyukwa shimwe to nyengwa, sho nda mono Ivory coast e li momusholondondo gwiilongo mbyoka ndi na oku ka talela po mo 2018. Sho twa thiki moshilandopangelo, Abidjan, onda li ndi wete nda fa nde ya kegumbo. Sho nda tala momusholondondo gwoonomola dhoongodhi ndi tale kutya olye e li mondunda ndjoka ya landula yaayenda moBetel, onda mono mo edhina lyomumwatate Sossou. Onda dhimbulukwa kutya okwa li omukuluntu gwoshilando ethimbo nda li moAbidjan. Ihe nani ke shi Sossou ngoka ndi shi, ndele okwa li omwanamati.

Jehova oha gwanitha po omauvaneko ge. Momaupyakadhi agehe ngoka nda pita mugo, ondi ilonga mo kutya Jehova oha yelekanitha ondjila yetu shili, ngele otwi inekela muye. Ngashingeyi otatu tsikile okulandula ondjila ndjoka tayi ende tayi yela notayi tu fala muuyuni uupe moka tatu ka kala nomwenyo sigo aluhe. — Omayel. 4:18.