Onkalamwenyo otayi kala yi li ngiini ngele kaku na etango? Etango ohali gandja oonkondo kiimeno yi tule ko omafo, oongala, iiyimati, oofukwa noonkenya. Ohali li yi kwathele wo yi kuthe omeya mevi okupitila momidhi gu uka komafo taga yi mombepo ge li molupe lwomuku.

Omvula omagano ga dhenga mbanda ga za kuKalunga ndjoka hayi ningitha evi li tu pe iikulya. Kalunga ohe tu pe omvula tayi zi kegulu niilya pethimbo lyo opala, ohe tu pe iikulya noha nyanyudha oomwenyo dhetu.

Ootate oyendji ohaya kala tayi ipula kombinga yokumona iikulya ya gwana noonguwo dhaanegumbo yawo. Tala shoka Omanyolo taga ti: “Taleni oondhila dhokegulu. Nando ihadhi kunu, dho ihadhi teya, dho ihadhi pungula miigandhi, Ho yeni yomegulu ohe dhi palutha. Ano hane mboka mu dhi vule?” — Mateus 6:25, 26.

‘Taleni nokundhindhilika oongala dhokelundu, nkene hadhi koko. Ihe ngame otandi mu lombwele: [Nomukwaniilwa] Salomo meopalo lye alihe ina zala a fe yimwe yadho. Ano Kalunga ngele ta zaleke omwiidhi gwokelundu ngoka gwa thikama owala nena, ihe ngula otagu umbilwa meziko, unene ano ne mboka yeitaalo enkundi ite shi mu ningile ando?’ — Mateus 6:28-30.

Molwaashoka Kalunga oha vulu oku tu pa iikulya noonguwo, osha yela kutya ota vulu wo oku tu kwathele tu mone iinima yilwe mbyoka twa pumbwa monkalamwenyo. Ngele otwa pititha komeho okulonga ehalo lyaKalunga, ota ka yambeka oonkambadhala dhetu dhokulonga omapya tu mone iipalutha nenge e tu kwathele tu mone iilonga, opo tu vule okulanda iinima mbyoka twa pumbwa. — Mateus 6:32, 33.

Otu na shili omatompelo omawanawa gokukala tu hole Kalunga ngele otwa dhiladhila ketango, komvula, kuudhila nokoongala. Oshitopolwa tashi landula otashi popi kombinga yankene Omushiti gwetu a li a popi naantu.