Kalunga okwa li a uvanekele omuhunganeki Abraham kutya gumwe gwomoluvalo lwe ota ka etela “aantu yomiigwana ayihe” omayambeko. (Genesis 22:18) Mbela olye?

Konyala konima yomimvo 2 000 dha ka pita, Kalunga okwa li a pe Jesus, ngoka e li oluvalo lwaAbraham, oonkondo dhokulonga iikumithalonga. Iikumithalonga mbyoka oya li tayi ulike kutya euvaneko ndyoka Kalunga a li a uvanekele Abraham otali ka gwanithilwa iigwana okupitila muJesus. — Aagalati 3:14.

Iikumithalonga mbyoka Jesus a li a longo oya li ya kwathele aantu ye mu dhimbulule mo e li gumwe ngoka muye aantu taya ka yambekelwa noya li yu ulike nkene Kalunga te ke mu longitha a yambeke aantu sigo aluhe. Tala nkene iikumithalonga yaJesus yu ulike omaukwatya ge gamwe omakumithi.

Ohenda — Jesus okwa li a aludha aavu.

Oshikando shimwe, omunashilundu okwa li i indile Jesus e mu aludhe. Jesus okwe mu gumu e te mu yamukula ta ti: “Onda hala!” Mbalambala oshilundu oshe mu etha. — Markus 1:40-42.

Okugandja nehalo ewanawa — Jesus okwa li a kutitha aasindjala.

Jesus ka li a hala aantu ya ye nondjala. Poshikando shi vulithe pushimwe, okwa li a kutitha aantu omayovi mokwiindjipalitha iikwiila iishona nuuhi wumwe wumwe. (Mateus 14:17-21; 15:32-38) Ayehe oya li e taa kuta nopwa hupu iikulya oyindji.

Olukeno — Jesus okwa li a yumudha aasi.

Jesus okwa li a yumudha omumati a valwa awike kuyina omuselekadhi ngoka a li kee na ngoka te mu kwathele, oshoka “okwe mu uvile olukeno.” — Lukas 7:12-15.