Omuhunganeki Moses okwa ti kutya, ngele otwa vulika kiipango yaKalunga, Kalunga ote ke tu yambeka. (Deuteronomium 10:13; 11:27) Ihatu vulika kuKalunga molwaashoka twa tila e tu geele. Omaukwatya omawanawa gaKalunga ogo hage tu inyengitha tu vulike kuye, molwaashoka otu mu hole notwa hala okuyanda okuninga kehe shimwe shoka tashi vulu oku mu yemateka. “Ohole yokuhola Kalunga oyo okuvulika kiipango ye. Iipango ye kayi shi iidhigu kutse.” — 1 Johannes 5:3.

Omayambeko geni hatu mono ngele otwa vulika kuKalunga? Tala komikalo mbali.

“Ongame Omuwa Kalunga koye, ngoka tii ku [“longo,” NW] shoka she ku opalela noku ku ulukila ondjila u na okweenda nayo.” — JESAJA 48:17.

Jehova Kalunga, Omushiti gwetu, oku tu shi nohe tu pe ewiliko ndyoka twa pumbwa. Ngele otwa hala omalongo ge ge tu kwathele tu ninge omatokolo gopandunge, otwa pumbwa okwiilonga mOohapu dhe, shoka a hala tu ninge nokutula miilonga shoka tatu ilongo.

“Aanelago oomboka taa uvu oohapu dhaKalunga e taye dhi dhiginine.” — LUKAS 11:28.

Kunena, aantu omamiliyona mboka haya vulika kuKalunga, oye na enyanyu lyashili. Pashiholelwa, tala koshiholelwa shomulumentu gumwe gwokuSpania ngoka a li ha geye mbala noha ungaunga nayalwe nonyanya mwa kwatelwa nomukadhi. Esiku limwe okwa li a lesha mOmanyolo gomuhunganeki Moses, kombinga yuukwatya weifupipiko waJosef, omwanamati gwaJakob. Josef okwa li a landithwa po e li omupika, ihe nonando ongawo, okwa kala omwiifupipiki, omunambili noha dhimine po. (Genesis ontopolwa 37-45) Omulumentu ngoka gwokoSpania okwa ti: “Sho nda dhiladhila koshiholelwa shaJosef, oshi inyengitha ndje ndi kokeke uukwatya weifupipiko, wombili noweipangelomwene. Oshizemo, ngashingeyi onda nyanyukwa.”

MOohapu dhaKalunga omu na omayele ogendji gankene tu na okuungaunga nayalwe. Ilonga oshindji kombinga yaashoka moshitopolwa tashi landula.