Aantu yamwe ohayi ipula ngele Oohapu dhaKalunga odha lundululwa. Omuhunganeki Jesaja okwa popi a ti kutya Oohapu dhaKalunga “otadhi kala sigo aluhe.” (Jesaja 40:8) Ongiini tatu vulu okukala nuushili kutya Oohapu dhaKalunga odha kala dha dhigininwa dhi li ngaashi dhi li?

Kalunga oku na oonkondo dhokukaleka po Oohapu dhe nokudhi keelela kaadhi yonagulwe po. Pethimbo lyonale sho oondhingambo dha li hadhi nyolwa nomake, aanyoli oya li haya yalula ondanda kehe ya shilipaleke kutya inaya gwedha mo sha momanyolo, inaya lundulula nenge ya thiga po sha inaaye shi nyola. Ihe molwaashono aantu inaya gwanenena, aanyoli oya ninga mo ngaa omapuko omashona.

Opu na ookopi omayovi dhomanyolwakaha gonale dhOmbiimbeli. Ngele yimwe yomookopi ndhoka oya ningwa elunduluko lyontumba, ohayi vulu okuyelekanithwa nookopi dhilwe dhOombiimbeli ya mone kutya oshili oyini. — Opo wu tseye oshindji, tala oshitopolwa “Mbela Ombiimbeli oya lundululwa?” shi li kepandja lyetu lyokointaneta, jw.org.

Pashiholelwa, natu tale koondokumende dhonale hadhi ithanwa Oondhingambo dhomEfuta lyaSa, ndhoka dha li dhi itsuwa kaantu yamwe momakololo ge li popepi nEfuta lyaSa mo 1947. Oondokumende ndhoka dhonale odhi na iitopolwa yimwe yOohapu dhaKalunga dha nyolwa konima yomimvo omayuvi gaali. Aatseyinawa oya yelekanitha omanyolo ngoka gonale nOmbiimbeli ndjoka tu na kunena. Oya mono po shike?

Aalongwantu oya mona kutya Ombiimbeli ndjoka tu na kunena oyi na lela etumwalaka lya faathana naandyoka lyomanyolo gopetameko. * Omanyolo gonale sho ga konakonwa nuukeka otaga ulike kutya shoka hatu lesha kunena mOmbiimbeli, etumwalaka lyaKalunga li li ngaashi li li. Otatu vulu okukala nuushili kutya Kalunga okwa shilipaleka kutya etumwalaka lyomOohapu dhe oli li ngaashi li li sigo okunena.

Onkee ano, otatu vulu okulesha Oohapu dhaKalunga tu na einekelo thiluthilu nosho wo eitaalo kutya odhi li lela paushili. Tu na oshinima shoka momadhiladhilo, natu ka konakoneni shoka tatu vulu okwiilonga kombinga yaKalunga kaahunganeki ye.