Itusu tinonasa kubatisisa zvinonanga Bhaibheri ngo pamusoro po Cirangarijo, ico cinozivikanwazve inga “cirariro ca Tenji,” Kurarira kokupejisira pomwe no Kurangarira rufu hwa Jesu. (1 VaKorinto 11:20; Biblia Mazwi a Mwari) Mukusiana, zvinotendhwa no zvinoizwa ngo vamweni vecinanga kuti vari kureremeja ciitiko ici, azvicijikiri muBhaibheri.

Cinangwa co Cirangarijo kuitira kuti ticeukije Jesu, tecikhombijira kubonga ngo kujipira kwake kuti atibesere. (Mateu 20:28; 1 VaKorinto 11:24) Kureremeja uku asipi mukhuva jinoizwa ngo vozviara kuitira kupsaka kuregerehwa zvishaishi. * Bhaibheri rinojijisa kuti zvishaishi zvedu azviregerehwi ngo kuita mukhuva muceci, asi zvinoregerehwa kudari tikava no gonda na Jesu.​—VaRoma 3:​25; 1 Johani 2:​1, 2.

Jesu wakabvunja vajiji vake kuti vaidikana kucerekeja Cirangarijo, asi aazivi kunanga kuti vaidikana kuzviita kangana. (Luka 22:19) Vamweni vanokheta kuzviita mweji ngo mweji, vamweni bviki ngo bviki, vamweni njiku ngo njiku atee vamweni kuzviita kakawanda panjiku, zvaanosana mundhu kuti aite. * Asi pano mativi amweni anodikana kuti avoniwe.

Jesu wakagaja Cirangarijo pa njiku yaiita vajudha phasika, zve ngo kufamba ko nguva wakafa pa njiku yondhoyo. (Mateu 26:​1, 2) Izvi azvizivi kutoitawo hazvo kudhivana. Ngo kuti Bhaibheri rinoezanisa muripo wa Jesu no mupiro wiya waiizwa ngo bvuta. (1 VaKorinto 5:​7, 8) Phasika yaicerekejwa kamwe pagore. (Exodo 12:​1-6; VaLevi 23:5) Ndizvonavo zvondhozvo, maKristu okutanga aicerekeja kamwe Cirangarijo co kufa kwa Jesu, * zve Zvapupu zve Jehovha zvinotevera ndhungamiriro jakacijikira mu Bhaibheri.

Ndhungamiriro jakagaja Jesu jinobesera pakuziva kuti Cirangarijo cingaizwa kangana pagore, njiku yapi zve nguvenyi. Jesu wakazviita mu njiku 14 ya Nisani mugore ra 33 N.V.Y., mukuzwirana no karendario yomuBhaibheri. (Mateu 26:18-​20, 26) Tiri kuramba tecicerekeja Cirangarijo mu njiku iyi gore ngo gore ngo kuti ndizvona zvakaizwa ngo maKristu okutanga. *

Pikija hazvo 14 ya Nisani yo gore 33 N.V.Y. mainga mu Cishanu, njiku iyi wari uno ingakhandika mu njiku iri yese yo vhiki gore ngo gore. Tinoguma pa kuziva kuti ngoyapi njiku ingazwirana na 14 ya Nisani ngokushandisa manera ovaishandisa pa nguva ya Jesu, haiwa kushandisa karendario yo maJudha anyamasi. *

Pa kuceukija kupsa, Jesu wakashandisa pau icina mbijo no vhinyu yakapsuka yakasara pakuha ko phasika. (Mateu 26:26-​28) Itusu tinotevera muezaniso wake ngo kushandisa pau icina mbijo kana kuengejehwa zviri zvese no vhinyu yakapsuka kana kuti tinto, iciripi yo uvha nee icizivi kuengejehwa zvinotapira kana kudihwa zvimweni.

Vamweni vanoshandisa pau ino mbijo kana yakadihwa zvimweni, asi mbijo kazinji kakona muBhaibheri inoimirira cishaishi no ubzinyiriri. (Luka 12:1; 1 VaKorinto 5:​6-8; VaGalàsia 5:​7-9) Ngokudaro, pau icina mbijo kana zvimweni zvakaengejehwa ndiyona basi ingafanera kuimirira muviri wa Kristu ucina cishaishi. (1 Pedru 2:​22) Umweni muitiro ucikawaniki muBhaibheri ngo wokufakeya vhinyu ngo uvha jicina mbijo. Izvi zvinoitwa ngo maceci amweni ngokuti vanorambisa kumwa doro, izvo zvinosiyana no zvinonanga Bhaibheri.​—1 Timoti 5:​23.

Pau no vhinyu yokupsuka inofambiswa pa Cirangariro, zvitatijo kana kuti zvinoimirira nyama no ngazi ya Kristu. Asipi kuti zvinocinjwa ngo mushamaiso zvotoitadi kamare nyama no ngazi ya Jesu inga zvinonanga vamweni. Vonanyi basi zvinonanga Bhaibheri ngo pamusoro po murangariro wondhowo.

• ● Kudari Jesu wakabvunja vajiji vake kuti vamwe ngazi yake, waizonga ecivabvunja kuti vaphanye mutemo wa Mwari wokuti mundhu aadikani kuha ngazi. (Genesi 9:4; Maitiro o Vapostori 15:28, 29) Ngokudaro, izvi azvicaizomboitazve kuti Jesu ajijise vamweni kuti vaphanye mutemo wa Mwari ngo pamusoro po kucena ko ngazi.​—Johani 8:​28, 29.

• ● Kudari vapostori vakamwa kamare ngazi ya Jesu, iyena aacaizonangepi kuti ngazi yake “inozopopomera vazinji,” zvinokhombija kuti muripo wake wainga ucada kuitika.​—Mateu 26:28.

• ● Muripo wa Jesu wakaitika kamwe basi ‘kuitira vese.’ (Vaheberi 9:​25, 26) Ngokudaro, kudari pau no vhinyu yaicinja kuita muviri no ngazi zva Jesu kamare pa Cirariro ca Tenji, zvinonga zvecireva kuti vanongaro varipo vari kuphinda muripo wondhowo.

• ● Jesu wakati: “Itanyi ibzi mucindiceukijira,” haiwa “mecindipira.”​—1 VaKorinto 11:24.

Vaya vanotenda kuti pau no vhinyu zvinocinja kuita nyama no ngazi kamare ya Jesu, vanozviita ngo ndava yo matarihwe akaitwa mavhesi o maBhaibheri amweni. Inga muezaniso, mu sandujo jimweni jo Bhaibheri, zvakanangaya Jesu ngo pamusoro po vhinyu, zvakasandujwa kudari: “Iyi ingazi yangu.” (Mateu 26:28) Asi, magama a Jesu aya, angasandujwavo inga: “Iyi inoreva ngazi yangu,” “Iyi inoimirira ngazi yangu.”  * Inga cirovejeso cake, Jesu waijijisa eciita kushandisa kuezanisira.​—Mateu 13:34, 35.

Zvapupu zva Jehovha pazvinocerekeja Cirariro ca Tenji, vashoma vedu basi ndivona vanoha pau nokunwa vhinyu. Ngenyi zvakadaro?

Kuduruhwa ko ngazi ya Jesu kwakagaja “citenderano cipsa” ico cakafakeya citenderano caJehovha Mwari no jinja roIziraeri yokare. (Vaheberi 8:​10-​13) Vaya vari mu citenderano cipsa ici, vanotendehwa kuha pau no vhinyu zvo paCirangarijo. Izvi azvibataniji maKristu ese, asi kuitira basi “vaya vakadanijwa” ngo njira kwayo ndi Mwari. (Vaheberi 9:​15; Luka 22:20) Ava ndivona vanozotonga mugore pamwepo na Kristu, zve Bhaibheri rinonanga kuti mutengo unokwana kuita 144,000 zvo vandhu ndivona vanoashira cidakajiso ici.​—Luka 22:28-​30; Apokalipsi 5:​9, 10; 14:​1, 3.

Mukusiana no “muxambi mudoko” wo vaya vakadanijwa kuti vatonge na Kristu, vazinji vedu nyamasi uno tinovetera kuti tive divi ro “uzinji hukuru [kana mushambi mukuru]” uwo unozorarama upenyu ucingaperi pasi pano. (Luka 12:32; Apokalipsi 7:​9, 10) Pikija hazvo vano vetero yokuzopona pasi pano avahi pau no kumwa vhinyu paCirangarijo, itusu tinoenda kooceukijira tecivonesa kubongesera Jesu wakatipa muripo wake kuitira kutibesera.​—1 Johani 2:2.