Sangano ro Zvapupu zva Jehovha rakatanga kumbhiri ko gore ro 1800. Pa nguva yondhoyo, cikwata cidoko co vajiji vo Bhaibheri phedo no Pittsburgh, Pensilvânia, Estadhus Unidhus, cakatanga kuita urongwa wo kujija Bhaibheri. Ivona vaiezanisa zviro zvaijijiswa ngo magerejha amweni no zvinojijiswa ngo Bhaibheri. Vakatanga kuita kuti zvavaijija zvitahwe mu mabhuku, majhoronari pomwe no revhista rinozivikari nyamasi inga Murindiri Wokuzivisa Umambo Hwa Jehovha.

 Pakati po vandhu ava vaijijari Bhaibheri ngo kuvangisira kwese, painga no mwanarume umweni waidanwa Charles Taze Russell. Pikija ndiyena wakava wokutanga pa kutungamirira basa ro kujijsa vandhu Bhaibheri no kubudisa revhista Murindiri pa nguva iyi, Russell aazivi kuumba ciyara cipsa. Cinangwa ca Russell no Vajiji vamweni vo Bhaibheri, cainga co kuzivisa zvakajijiswa ndi Jesu Kristu no kutevera zvaiitwa ngo Makristu o muzana ro kutanga. Zvecivoneka kuti Jesu ndiyena wakatanga no Cikristu, tinodikana kumuvona inga ndiyena wakaumba sangano redu.—Vakorose 1:18-20.