Mwari Ari Ndau Jese, Naacikavoneki Here?
Mupinguro wo Bhaibheri
Mwari anokwanisa kuvona zviro zvese no kuita ciito kurikwese kwaanoda. (Mazwi Akangwara 15:3; Vahebheru 4:13) Asi, Bhaibheri arijijisi kuti ari kundau jese pa zviro zvese. Mukusiyana, rinokhombija kuti iyena ndi mundhu zve ano ndau yaanogara.
● Ciimo ca Mwari: Mwari i mundhu wo kumujimu. (Johani 4:24) Apana mundhu anokwanisa kumuvona. (Johani 1:18) Zvivoniso zvakatahwa mu Bhaibheri zvinonanga kuti ano ndau yake yo kugara. Azvizivi kutahwa kuti ari ndau jese.—Isaia 6:1, 2; Apokaripsi 4:2, 3, 8.
● Ndau yo kugara ya Mwari: Mwari anogara ku divi ro mujimu, kutosiana kamare no zvisikwa zvo kunyama. Mukati mo divi rondhoro, Mwari ngo ‘maanogara, mu gore.’ (1 Majimambo 8:30) Bhaibheri rinonanga cimwe ciitiko cokuti zvisikwa zvo kumujimu zvakaenda “kosongana na” Jehovha, a kukhombija kuti ngo maitiro ariese, Mwari ano ndau yaanogara.—Jobe 1:6.
Kudari Mwari aaripi ndau jese, anokwanisadi kundikorondha kamare here?
Anokwanisa. Mwari anonasa kukorondha mundhu umwe na umwe pacake. Pikija Mwari anogara ku divi ro kumujimu, anovona vandhu vanoda kumudakajisa vari pasi pano, zve anovajivirira. (1 Majimambo 8:39; 2 Kronike 16:9) Vonanyi kuti Jehovha anokaya-kaya kudini ngo mwoyo wese ngo ndava yo vanomunamata:
● Pomunoita mukumbiro: Jehovha anozwa mukumbiro pomunondouita.—2 Kronike 18:31.
● Pomunoti khurududu: “Mwari ari phedo no mwoyo yakakhuvazwa; anoponesa vese vakapera simba.”—Nduyo 34:19.
● Pomunoda ndhungamiriro: Jehovha anoti “ndinozokujijisa, ndecitatija gwanja ro kutevera” acishandisa Bhaibheri, Soko rake.—Nduyo 32:8.
Murangariro jakashata ngo pamusoro po kutama kuvoneka
Murangariro wakashata: Mwari ari ndau jese mu zvakasikwa.
Cokwadi: Mwari aagari mu nyika kana kumatenga kotinovona ngo meso edu. (1 Majimambo 8:27) Izvokadi kuti ndhondho no zvimweni zvakasikwa zvinotokotesa “goja ra Mwari.” (Nduyo 19:2) Asi, Mwari aagari mu zvaakasika, kuezanavo no mundhu anodhezenyari aagari mu madhezenyo aanoita. Asi, madhezenyo anokwanisa kutibvunja ciro ngo pamusoro po mundhu wakaaita. Mukufanana, nyika yotinovonari inotibvunja mugariro jicikavoneki jo Musiki, jakadari inga simba, ungwaru no rudo hwaanahwo.—VaRoma 1:20.
Murangariro wakashata: Mwari anodikana kuva ku ndau jese acikavoneki kuitira kuti azive zvese zve ave wo simba-rese.
Cokwadi: Mujimu mucena wa Mwari, kana simba rinobata basa, i simba rake riri kushanda wari. Acishandisa mujimu mucena, Mwari anokwanisa kuziva no kuita ciricese, pa nguva iriyese, pikija iyena acipo.—Nduyo 139:7.
Murangariro wakashata: Nduyo 139:8 inojijjisa kuti Mwari ari ku ndau jese ngo kunanga kuti, “ndikakhwira mu denga, muriyo; ndikaterera mu iba, ndinomuwaneyo.”
Cokwadi: Bhaibheri arinangi kunogara Mwari. Asi ngo masoko aya zvinoda kureva kuti akuna ndau yaanokonehwa Mwari kutibesera ngokuti indhambo maningi.
a Jehovha i zina ra Mwari rinonangwa mu Bhaibheri.
Zvimweni Zvamungadakarira nga Izvi:
MUVHUNJO JO BHAIBHERI JAKAPINGUHWA
Mwari Anondibesa Ndikaita Mukumbiro Here?
Mwari zvokadi anotaja zvineso zvedu?
NGO PAMUSORO PEDU
Kumbiranyi Kuvhakacihwa
Kuitira kukumbira kuvhakacihwa kuti mubhuisane ngo pamusoro po shwiro jo Bhaibheri kana kuda kuziva ngo pamusoro po urongwa hwedu hwo jijo yo Bhaibheri icikapagahwi, presherinyi forimurariyo iri mu saiti jw.org.