Paul: Itusu tainga takadakara maningi! Wainga mweji wa Novembro mu gore ro 1985, tainga teciita hwendo tecienda ku Liberia, West Africa. Kuti tishande inga mamisiyonario. Uhu hwainga hwendo wokutanga kushanda mu nguva yakazara. Ndeki yedu yakaima ku Senegal. Anne wakananga kudari: “Pari kucota nguva imwe basi kuti tigume ku Liberia.” Perapo pakaithwa ciziviso cokuti: “Vandhu vari kwenda ku Liberia vanodikana kubzuka pano. Ngo ndava yo gorpi dhi estadho ndeki aicaizokwanisepi kumata kondhoyo.” Ko njiku jinokhwedera kuita gumi, taigara no mamisiyonario ku Senegal. Perapo pakazozika masoko okuti vandhu vazinji vaiurawa, cimwenizve utongi aucaitendera kuti vandhu vabude mu mamuzi mavo.

Anne: Mundhu waitama kuzwira waifuhwa ngo nvuti. Itusu tiri vandhu vakangwara. Kuvhira pandainga mwana mudoko ndaizivika inga Anxious Annie. Inini ndinonyangajwa maningi nee pandinonga ndecida kudarika citaka. Asi tainga tatema civaringo cokwenda ku basa ratainga tagajwa.

Paul: Tese tovaviri tiri vo ku west ku England. Itusu takakurira mu mutundhu umwewo. Inini na Anne takatanga kushanda inga mapiyona patakapejisa cikora. Inini na Anne takaashira besero ro vabari vedu, ku divi rangu ndaakashira besero ro vabari vangu asi Anne wakabesehwa ndi mai wake. Cido cedu cainga cokushanda mu nguva yakazara. Vabari vedu vakatibesera kamare. Pandainga no makore anokwana kuita 19, ndakava no cidakajiso cokushanda pa Bheteri, kuveni Anne wakazoenda ku Bheteri patakacadha mu gore ro 1982.

Anne: Itusu taida maningi Bheteri. Asi tainga no cido cokwenda koshanda kwaidiwa maningi vashandi. Zvecivoneka kuti ku Bheteri taishanda no hama jainga jakamboshanda inga mamisiyonario, cido cataingari naco cakaengejekavo maningi. Taaita mukumbiro ngo pamusoro pazvo ko makore anokwana kuita matatu. Takadakara maningi mu gore ro 1985 patakaashira mukoka kuti tiende kucikora co Giriyadhi turma 79. Perapo takagajwa kuti tiende koshandira ku Liberia, ku West Africa.

Paul: Takakhwira ndeki yakatanga kutendehwa kuti tiende ku Liberia. Vandhu vazinji vaithya maningi. Cimwenizve avacaidikanepi kubuda pamuzi pavo no usiku. Kuti tijizwe takagajana taiverenga mativi amweni o bhuku ra Nduyo tiri pamwepo. Asi itusu taida maningi  basa rataingari tagajwa. Anne waishanda inga misiyonario ku ndima, inini ndaishandira pa Bheteri. Ndaishanda pamwepo na hama John Charuk. a Zviitiko zvavo no kuzwisisa kwavaiita zviitiko zvo hama no hambzaji, yakava rovejo huru kwandiri.

Anne: Ngenyi takakasika kudakarira maningi ku Liberia? Ngo ndava yo hama no hambzaji jedu. Ivona vakatikhombijira rudo no kuva vakagondeka. Itusu takabatana navo, ivona vakava mbhuri yedu. Mbhangiro javo jakativangisa ku divi ro ku mujimu. Basa ro kucumaera cainga ciro cataidisisa maningi. Vandhu vataicumaera, potaipinda ngo kukasika ivona vainyangajwa, mungazvitenda izvi? Vandhu vaibhuisana ngo pamusoro po Bhaibheri mu makwanja. Imwimwi maitoguma motonghwiniravo mu mabhuyowo. Tainga tino vajiji vo Bhaibheri vaiwanda zvokuti zvainesa kuda kujija navo vese. Ici cainga ciri cineso cataidakarira maningi.

Paul: Pasure po makore marongomuna tiri mu runyararo, mugore ro 1989, pakava no cinjo jakatevererana. Mu nyikemo makaitika hondo. Vaingari vecihwisana no utongi hwo nyika iyi vakatanga kutonga ngo divi raingari no Bheteri mu njiku 2 ya Julho wo 1990. Mukati mo mweji mutatu atizivi kukwanisazve kubhuya no vandhu vo nyika jimweni. Izvi zvaibatanija kutama kubhuya no ukama hwedu pomwe no cine ro pasi pese. Mu nyika iya mainga no uphanga, jowe-yowe, kutamika ko zvokuha cimwenizve vanakaji vaishaishwa kutajwa. Zvese izvi zvakaenderera mberi zveciitika ko makore anopindirija gumi na marongomuna, izvi zvakapsasa nyika yese.

Anne: Majinja amweni aihwisana no kuurayana. Mu ndau jese mainga no masoca. Ivona vainga no nvuti jakawanda, vaisimira nguvo jaithyisa no kunghwina mu mamuzi vecitora zvavaida. Ku vamweni kuuraya vandhu “zvaidari inga kuuraya huku” inga manera avaizvinanga. Masoca aifunga zvitaka kuitira kungwarira vandhu, vese vaidarika ndipona vaiurawa. Masoca aya aidira mutembo panyezuru po jimweni. Izvi zvaiitika mbhera phedo no pa Bheteri. Vashandiri va Jehovha vakagondeka vakaurawavo kubatanijavo no mamisiyonario maviri.

Hama no hambzaji jakadira upenyu hwajo pa ngozi kuti vavige hama jimweni jainga jeciteverehwa kuti jiurawe. Mamisiyonariyo no mabheterita vakaitavo zviro zvakafanana. Ku Bheteri hama jaiita ngokutiza jaivata ngo pasi, vamweni vaigara na itusu mudenga. Mu kwaratu yedu taigara no mbhuri imweni yainga no vandhu vaikwana kuita 7.

Anne: Njiku jese, masoca aieja kunghwina pa Bheteri kuti vavone dangani taiviga vandhu vamweni. Tainga no vandhu vaikwana kuita varongomuna vaiita  basa rokungwaririra. Vaviri vaiima ngo pajhanera vakasota, kuveni vaviri vaigara ku musuvo. Vaviri vaiimaya pa musuvo, nyara javo pavaijimusa josota kumbeji, izvi zvaivonesa kuti zviro zviri ushoni, asi nyara javo pavaijidira sure zvaivonesa kuti zviro azvizivi kugajana. Vaya vaisotaya ngo pajhanera, vaidikana kugogoma kwenda koviga hama.

Anne: Pasure po sumana jakawanda, masoca ainga akanyangajwa akakwanisa kunghwina pa Bheteri. Inini no hambzaji imweni takajifungira mu kazadhibhanyo. Mainga no arumariyo yainga no ndau doko yaifungika, hambzaji iyi yakajifungira mukatimo. Masoca aya akaviya mbhera mudenga mataingaro tiri. Ivona vakatanga kutaka musuvo. Paul wakavadeketerera eciti: “Mukaji wangu ari kushandisa kazadhibhanyo.” Kuti ndivhe pandaingaro ndiyende pa ndau imweni, zvaiita maningi musindo, cimwenizve ndaizononoka maningi, kunja kwa izvi basi, zvaizoitazve kuti ndinonoke ndogumira pakuzika. Ndakatanga kundhya-ndhya kuvhira ku makumbo mbhera ku musoro. Ndaizofunungurisa kudini musuvo? Ndakaita mukumbiro kuna Jehovha ndecimudeketerera kuti andibesere. Inini ndakafunungura musuvo, asi zvinoshamaisa maningi ngozvokuti ndakamukira kugajana. Umwe wo masoca aya wakandindundira pamutivi opinda kofunungura arumariyo ecisota mu magavheta, iyena aacaithembepi kuti apana caakawana. Kuvha pondhopo iyena no cikwata cake vakatanga kusota mu makwaratu ese asi apana cavakawana.

Anne: Takagara ticina zvokuha ko mweji jakawanda. Pakunamata kwedu ko mangwanani pa Bheteri, “matabhishu” edu ainga zvokuha zvokumujimu basi. Izvi ndizvona zvaitiponesa.

Itusu taizviziva kuti kugara ticina zvokuha no kumwa, taizogumira pakusiya Bheteri. Asi tairangarira kuti hama jataivigaya jaizoitisa kudini? Kangaije jaizotohwa ngo masoca. Zvaaita inga kuti pa nguva kwayo Jehovha waiita mushamaiso ngo kutipekeja zviya zvatainga tecida. Jehovha wakataja zvinodiwa zvedu no kutibesera kuti tihwisane no zvineso zvedu.

Mugariro wo nyika pawaienderera mberi wecishatisisa, cokwadi caienderera mberi cecijeka. Nguva no nguva, hama jedu jaidikana kutiza kuti jikwanise kuponesa upenyu hwajo. Asi vakaenderera mberi vakagondeka no kugajana. Vamweni vakananga kuti “zviro zvaingaro zveciitika yainga rovejo kuitira dambujiko guru.” Majaha no vasharuka vakaita zvese zvavaikwanisa kuti vabesere hama. Pavakadikana kubuda mu mutundhu mavo, hama no hambzaji jairamba jakabatana. Vaicumaera mu ndau imbza no kuita musongano mu Nyumba jo Umambo jo mukuvo mushomani mu makwasha. Musongano jaivavangisa maningi ngokuti vainga vari pakati po gwasha vacina vetero. Kucumaera kwakabesera hama kuti jihwisane no mugariro wiya. Pataishanda mu bauhwa ro kubesera vawihwa ngo ngozi, taidakara maningi ngokuvona hama no hambzaji jecikumbira pasta jokwenda najo kocumaera haiwa nguvo. Vandhu vaisuruvara vacina vetero vaizwa kucumaehwa ko masoko akanaka. Ivona vaishamaisika maningi ngokuvona Zvapupu zva Jehovha zvakadakara no kuvanga. Ivona vaimonikira pakati po cidima ciya. (Mateu 5:​14-16) Kuvangisira ko hama no hambzaji kwakaita kuti masoca amweni aithyisa maningi ade kujija cokwadi.

Paul: Mukuvo jimweni takadikana kusiya nyika iyi ko mukuvo mushomani pa vhaza imweni ko gore rese. Hambzaji imweni inoshanda inga misiyonariro yakanasa kusanangura mazwiro edu. Iyona yakati: “Patainga tiri ku Giriyadhi takajijira kudira basa redu mu mwoyo. Izvi ndizvona zvatakaita. Kusiya hama no hambzaji jedu pa mugariro wiya zvaitihwaja maningi.” Takadakara maningi ngokuziva kuti pikija tainga tiri mu nyika yainga iri ngo phedopo, taizokwanisa kwenderera mberi tecibesera hama no hambzaji jedu jo ku Liberia.

Anne: Mu mweji wa Maio mu gore ro 1996, takavha no karu yo Bheteri no maphepha ainga no masoko aisisira ngo pamusoro po basa ku Liberia. Cido cedu cainga cokufambisa karu pa makiromita aikwana kuita 16 kuti tiende koguma ku dhorobha rainga rakajiviririka. Takasongana no masoca ainga akanyangajwa iwona akarijira nvuti mudenga no kutiimisa. Iwona akavhisa vandhu vatatu mukaru perapo vosara vecibhuya na Paul. Izvi pozvakaitika takathya maningi. Takazovona Paul eciviya asi kumeso kwake kwainga kwecipopoma ngazi. Pakutanga itusu takarangarira kuti dangani wafuhwa ngo nvuti, asi takazovona kuti nokwainga kuti ndizvona iyena aacaizokwanisepi kufamba. Kuveni musoca umweni wainga akamundunda kuti abude kunja ko karu. Asi zvinodakajisa ngozvokuti aazivi kukhuvazika maningi.

Ngo phedo no pataingari, painga no karu yo masoca yainga yakazara ngo vandhu vainga vecithya. Itusu takakhwira panyezuru po karupo. Asi painga pacina pokubata kuti tikwanise kucijikira kuti ticawa. Motorista wakafambisa karu ngosimba zvokuti tainga tecida kuwa. Takakhuwa kuti iyena aime asi iyena waithya maningi zvokuti aacaidepi no kuzwa. Pejisire takazokwanisa kucijikira asi takaguma takaremba mujira jedu jecitetemera ngo ndava yo simba rataiitaya kuti tikwanise kucijikira.

Paul: Takazara ngobukuta no nguvo jakapera kumweka, takavhunjisana kuti takaitisa kudini kuti tipone? Takavata pa ndau yainga yakashama phedo no gubhu-gubhu rainga rakadhezenyahwi mabara o nvuti. Ndirona raizotitora kwenda ku Sierra Leone pa njiku yaizotevera. Takabongesera maningi ngokupona kwedu asi taineseka ngo hama no hambzaji jedu.

Anne: Potakaguma ku Bheteri ro Freetown, Sierra Leone, itusu takajizwa takangwaririka cimwenizve takatajwa ushoni. Asi pamukuvo no mukuvo zviro zvakashata zvakaitikaya zvaiviya mumusoro mangu. Njiku jese ndaithya, ndainga ndecivona zvaingaya zvakaitika inga zviri kuitikazve ngapapsa. Zvese zvandaivona zvakanditendeneja, ndaizvivona inga zviciripi kuitikadi kamare. Cousiku inini ndaimuka ndecibuda ziya no kutetemera no murangariro wokuti zviro zvakashata zviri kuitika. Zvainesa kufema. Paul waindikumbatira no kuita mukumbiro na inini. Ndakaguma pakuvona kuti ndainga ndoita benji, cimwenizve, andicaizokwanisa kwenderera mberi ndiri misiyonario.

Andizokanganwi zviro zvakaitikaya. Pa sumana yondhoyo, ndakaashira revhista mbiri. Revhista imwe wainga Mukai! wa 8 wa Junho wo 1996. Iwona wainga uno musoro waiti, “Como Lidar com a Síndrome do Pânico.” Apa ndakazwisisa kuti zvicinyi zvainga zveciitika na inini. Revhista yo cipiri wainga uri Murindiri wo 15 wa Maio wo 1996, uwo wainga no musoro waiti: “Vanowana Kupi Simba Ravo?” Murindiri uwu wainga no foto yo berepeswa rainga rakakhuvazika. Musoro uwu waisanangura kuti kudari inga berepeswa rakhuvazika rinokwanisa kwenderera mberi reciha no kumburuka, pikija mapapiro aro akhuvazika, itusuvo tingakwanisa kwenderera mberi teciashira mujimu wa Jehovha kuti tikwanise kubesera vamweni pikija tecihwajihwa mu murangariro. Musoro iji jakandipekeja simba. Ijona jakava zvokuha zvaivha kuna Jehovha pa nguva kwayo. (Mateu 24:45) Zvakandibesera i kupsakisisa mu marevhista aya no kufamba nawo mu mupasta. Pa kufamba ko nguva, zvineso zvandaingari ndecisongana nazvo zvakatanga kupunguka.

Paul: Mugariro pawakatitendera kuti tihwirire kanyi ku Liberia, takadakara maningi. Kumbhiri ko gore ra 2004, itusu takakwanisa makore anokwana kuita 20 tiri mu basa ratainga takagajwa. Hondo yainga yapera. Kwainga no urongwa wokuvaka Bheteri ibza. Ngo civhumbu takakokwa kuti tiite basa rimweni ibza.

Uwu wakava muejo kwatiri. Tainga takabatana pamwepo no mbhuri yedu yo kumujimu. Taizohwisana kudini no mugariro wiya? Ngokukasika takaceukija  kuti pikija patakaenda ku Giriyadhi, takadikana kusiya ukama hwedu, cimwenizve takaashira makomborero mazinji aivha kuna Jehovha. Ngo kudaro, takatendera mukokewo. Itusu tainga takagajwa kuti tiende koshandira nyika yainga phedopo yo Ghana.

Anne: Takacema maningi patakasiya Liberia. Takashamaisika maningi hama imweni ino uzivi inozwi Frank yainga yaamusharuka, payakananga kudari: “Tikanganwenyi!” Perapo yakasanangura yeciti: “Ngo zvokadi kuti narini imwimwi amuzotikanganwi, asi munodikana kudira basa ibza iri ramagajwari mu mwoyo menyu. Irona ngo ra Jehovha, imwimwi munodikana kubatikana ngo hama jiri kondhoyo.” Izvi zvakativangisa maningi pa cineso catainga naco cokutangazve nga papsa. Ngokuti vandhu vashoma ndivona vaitiziva mu ndharaundha iya, cimwenizve zvese zvainga zvipsa kwatiri.

Paul: Izvi azvizivi kunonoka maningi, hama no hambzaji jo ku Ghana jakava mbhuri yedu imbza. Kwainga no Zvapupu zvakawanda. Takajijira zvizinji no hama no hambzaji jainga jakaivha no kuvanga ku divi ro kumujimu. Pasure pokushanda makore anokwana kuita 13 tiri ku Ghana, takaashirazve zviro zvimweni zvinoshamaisa. Takakokwa kuti tiende koshandira ku Bheteri ro East Africa ku Kenya. Pikija tainga taano cisuvo co hama no hambzaji jo kwataishandiraya kare, ngokukasika takabatana pamwepo no hama no hambzaji jakagondeka jo ku Kenya. Kusiyapo zvondhozvo, takajizwa ushoni ngokushandira ku ndima yakakura kwaidiwa maningi vashandi.

Anne: Ko makore ese aya ndakasongana no zvineso zvakawanda zvainesa. Pa mukuvo umweni ndaigara ndecithya. Zvese zvandakasongana nazvo, zvakandiviisira zvineso mu muviri no mu murangariro. Itusu atijivirihwi ngo mushamaiso, pandaizwa kurijwa ko nvuti mu ndani mangu maihwaja ndogara ndecitetemera. Asi ndakajijira kuti zvinosisira maningi kuthemba besero ra Jehovha kuti andivangise kubatanijavo no besero ro hama no hambzaji. Inini ndakajijira kuvha ku zviro zvakandiitikira, kuti kudari ndikabatikana pa zviro zvokunamata, Jehovha anozondibesera kuti ndienderere mberi ndiri pa basa randakagajwa.

Paul: “Imwimwi muri kudakarira basa ramakagajwa?” Nyika ingava yakaseja asi kangaije ingava ndau yakashata no inothyisa. Ndiyo ndava tinodikana kujivhunjisa kuti: Ngocapi candinodakarira maningi kuciripi nyika? I hama jedu no hambzaji jinosisira maningi. Pikija tiri vandhu vano zvirovejeso zvakasiyana, itusu tinorangarira ngo njira imweyo. Itusu tairangarira kuti takatumihwa kuti tiende kovavangisa, asi kunasa kunanga zvakaitikeyo zvakasiyana no zvatairangariraro.

Pese pataiashira cinjo, taivona zviro zvinoshamaisa, kuva no hama no hambzaji kwese kwataienda. Patinoenderera mberi teciita divi ro sangano, tinozova no mbhuri no pokugara. Tino cokwadi cokuti tikaenderera mberi tecithemba Jehovha iyena anozotipekeja simba ratinoda.—Vafiripi 4:13.