Kuziva zvinoreva ndhondho injira imweni yo kufembera. Vanoziva zvinoreva ndhondho vanotenda kuti ndhondho, mweji no mapraneta zvino zvazvinorevera pa upenyu hwo vandhu. Vanojija ngo zvo ndhondho, vanonanga kuti manera azvinonga zvakagara zviro izvi panonga pecibahwa mundhu, zvinonga zvecireva manera anozogara undhu no upenyu hwake.

Kuziva zvinoreva ndhondho zvakatanga kare ku Bhabhironiya. Pikija na nyamasi zviciri kuenderera mberi zveciitwa. Kupsakisiswa kumweni kwakaitwa ku Estadhus Unidhus mu gore ro 2012, kwakavonesa kuti vandhu vanopindirija 30 pa 100 vainga vakavhunjiswa vaitenda kuti kuziva zvinoreva ndhondho kwakaezana “padoko no siensiya.” Kuveni vandhu vanokwana kuita 10 pa 100 vanototenda kuti kuziva zvinoreva ndhondho itori “siensiya kamare.” Kureva kuti siensiya inozwirana no kuziva zvinoreva ndhondho here? Haiwa. Vonanyi mathangwe akona basi.

• Magarire anonga akaita mapraneta no ndhondho azvina zvazvinorevera ku upenyu hwo vandhu inga zvinonangwa ngo vazivi vo ndhondho.

• Zvavanonangaro, zvinoitika no mundhu ari wese.

• Murangariro wavo wakacijikira pa zviro zvaizivika kare zvokuti mapraneta anotenderera nyika. Asi cokwadi ngo cokuti mapraneta anotenderera zuva.

• Zvavanonanga ngo pamusoro po mundhu umwe, zvinosiyana-siyana.

• Vanojija ngo zvo ndhondho vanonanga kuti kuno zvitatijo zvinokwana kuita 12. Kada mundhu ari mucimwe co zvikwata izvi zvozvitatijo zvo zodíaco zvecienderana no njiku yo kubahwa kwake. Asi pakufamba ko nguva, nyika yakacinja magariro ayo. Ngo kudaro, zvitatijo 12 zvo zodíaco azvicazwirani no zvainangwa kuti ndizvona zvazvinoimirira.

Zvinonangwa kuti zvitatijo zvo zodíaco zvinovonesa zvakaita undhu hwo mudhu. Asi cokwadi ngo co kuti pikija vandhu vakabahwa njiku yondhoyo, vanova no undhu hwakasiyana. Njiku yakabahwa mundhu aina zvainoreva ngo pamusoro po undhu hwake. Vanojija ngo zvondhondho vanonanga zvakaita mugariro wo mundhu vaciita ngo kurangarijira. Wondhowo asipi mukheto here?

Kuvhira kare, vandhu vandori kuvhunjisa vafemberi. Vafemberi vamweni vaieja kushandisa zvihwa zvo zvinyama, zvo vandhu kana manera anojoba huku zvokuha. Vandhu vamweni vanoenda kunyanga no kumaporofita kuti vazive manera unozogara upenyu hwavo kumbejiyo. Asi kureva kuti tingathembadi zviro izvi? Haiwa. Ngativone mathangwe anotiita kuti titame kuzvithemba.

Zvinonangwa ngo vafemberi azvizwirani, pikija vakatoshandisa njira yondhoyo yo kufembera ndiyona. Inga muezaniso, kudari mundhu akaenda kunyanga mbiri kuti azive manera anozogara upenyu hwake, iyena anodikana kuvhunjwa zviro zvakafanana. Asi andizvopi zvinoitika, kazinji iyena anovhunjwa zviro zvakasiyana.

vamweni avacatothembi zviro zvinoshandiswa ngo vafemberi. Inga muezaniso, vafemberi vanovhunjisa mundhu zviro zvakawanda maningi, vonasa kupurutana zvaanonga ecinanga no kunasa kusotesesa zvaanonga eciita. Perapo pavanozonanga kuti vari kuvoneswa zviro ngo vajimu, vanonga vecitoshandisa zvavavhunjwaya ngo mundhu wiya. Mundhu waendaya kopsaka kuda kuziva ngo pamusoro po upenyu hwake, anonga acikatozvivoni kuti ndiyena wapera kutovavhunja. Vafemberi vamweni nyamasi uno vari kuwana mare yakawanda ngo kuba vecishandisa njira iyi.

Kujija ngo zvo ndhondho no kufembera zvinoita kuti vandhu varangarire kuti takapera kutemehwa zvatinoda kuita mu upenyu hwedu. Kureva kuti ndizvona? Bhaibheri rinonanga kuti umwe na umwe wedu ano rusujunuko hwo kukheta zvaanoda kuita mu upenyu hwake. Perapo zvese zvaanosanaro zvino magumo azvo.—Joxwa 24:15.

Vandhu vanonamata Mwari vano thangwe rimweni rinoita kuti vatame kutenda zvo vazivi vo ndhondho no kufembera. Ngorapi thangwe rondhoro? Bhaibheri rinoti: “Pakati pako kucazowanika . . . muringiji nokuti mufemberi, beze nokuti nyamusoro, muiti wo masaramuso, mubvunjisi vo vanyakufa, mudaniji wo vanyakufa, ngokuti ndiani anoita ibzi anonyangajisa Tenji Mwari.”—Deuteronòmio 18:10-12.