1, 2. (a) Sananguranyi muezaniso wa Jesu wo mune wo munda. (b) Ndhorovondho iyi inokhombijisa kudini kukova no unyasha hucikafaneri?

PA MANGWANANI o imwe njiku, mwanarumwe umweni wainga mune wo munda wakaenda ku ndau yo kutengesehwana zviro koopsaka vandhu kuti vaende koomushandira. Iyena wakavabvunja kuti mutengo wakatikuti waizovapoceresa pakupeja basa, zve ivona vakatendera. Asi zvecivoneka kuti mune wo munda uwu waida vashandiri vazinji pa njiku yondhoyo, iyena wakaramba ecindohwirira ngo kundohwirira koopsaka vandhu. Wakananga kuti waizopoceresa vese mutengo unozwirana kamare no basa riyana. Pakupera ko njiku, mune wo munda wakakwengweneja vashandi vese kuti avapagari mare javo. Iyena wakapa mutengo umwe wo mare kuno vese, azvinenyi vakashanda njiku yamutero kana vakashanda nguva i mwe basi. Asi, vanarume vakashandaya njiku yamutero pavatanga kun’gun’guta, iyena wakananga kudari: ‘Atizivi kusungisana no mutengo wo mare imwe? Andikwanisi kuita bzo ndinoda no  bziro bzangu? Dangani unoita thima ndini ngokuti ndakarungama?’—Mateu 20:1-15.

² Ndhorovondho yakaverengari Jesu inotijijisa zvinosisira maningi ngo pamusoro po ‘unyasha hucikafaneri’ hwa Jehovha. ^[1] (Vonanyi masoko o kupejisira.) (Verenganyi 2 Korinto 6:1.) Kuitisa kudini? Vamweni vangarangarira kuti vaya vakashandaya njiku yamutero ngavaifanira kupuwa mare yakawanda maningi kupinda vamweni. Asi mune wo munda wakakhombija kuva no unyasha hucikafaneri kuwana kuno vashandi vakashandaya mukuvo mushomani basi. Umwe mujiji wakananga kudari ngo pamusoro po mashandisihwe o gama ro kuti ‘unyasha hucikafaneri’ mu Bhaibheri: ‘Gama iri kamare rinoda kunanga cipo cicikafaneri kuwana zve cokupuwa mahara, cinopuwa mundhu acizivi kucishandira, zve acikafaneri kuciashira.’

3, 4. Jehovha wakakhombijisa kudini unyasha hucikafaneri kuwana kuno vandhu, zve zvakazviitisa kudini?

³ Bhaibheri rinotibvunja kuti nyasha ucikafaneri kuwana hwa Mwari i “cipuo” cicikapagahwi. (VaEfeso 3:7) Zvecivoneka kuti atikwanisi kuzwira Jehovha ngo maitiro akakwana, atitusu atifaneri kukhombijihwa kunaka mwoyo kuri kwese ndiyena. Zvokadi, itusu tinofanera kufa. Mambo Soromona wakananga kudari: “Akuna mu nyika mundhu wakarurama, anoita bzakanaka basi, acikaxaixi.” (Mucumaeri 7:20) Pa kufamba ko nguva, mupostori Pauro wakananga kudari: “Mbzakadi; vese vakaxaixa, vokonehwa goja ra Mwari” zve “mupocero wo uxaixi, rufu.”—VaRoma 3:23; 6:23a.

⁴ Zvecivoneka kuti Jehovha anoda maningi vandhu, iyena wakatumira “Mwana wake umwe ega” kuzotifira. Ici cakava ciito cikuru co unyasha ucikafaneri. (Johani 3:16) Pauro wakananga kuti Jesu ‘wapuwa junguja ro goja no ro rukujo ngo kuti iyena wakafa, kuitira kuti ngo unyasha hucikafaneri kuwana wa Mwari kuti aravire rufu ngo kuitira vese.’ (Vaheberi 2:9, Shanduro yeNyika Itsva) Hina, “cipo ca Mwari, uhomi hucikaperi, ngo njio ya Kristu Jesu, Tenji wedu.”—VaRoma 6:23b.

5, 6. Ngo japi muviyo jinowanikepo ngo kutungamirihwa (a) ngo cishaishi? (b) ngo unyasha hurukafaneri kuwana?

⁵ Ngenyi tinoshaisha no kufa? Bhaibheri rinonanga kuti, ‘ kufa [“kwakava mambo”, Shanduro yeNyika Itsva] pasi ngo ndava yo uxaixi hwo mundhu umwe.’ Ngo kudaro, ngo ndava yo kuti tiri mubarihwana wa Adhamu, tese atizivi kukwana zve tinofa. (VaRoma 5:12, 14, 17) Pikija zvakadaro, itusu tingasana kutama kutongwa kana kuvonerehwa ngo cishaishi. Zvingakwanisika kudini? Patinokhombija gonda ku muripo wo kujipira wa Kristu, tinobesereka ngo unyasha hucikaneri kuwana hwa Jehovha. Bhaibheri tinoti: “inga uxaixi hwakatonga ngo kufa, unyaxa hutongevo ngo ururami. Kuti huwanike uhomi hucikaperi ndi Tenji wedu Jesu Kristu.”—VaRoma 5:20, 21.

⁶ Pikija zvakadaro, ticindori vashaishi, atidikani kutendera kuti cishaishi cititonge. Patinoshaisha, tinodikana kukumbira kuregerehwa ndi Jehovha. Pauro wakatingwaja kudari: “Ngokuti uxaixi ahucadikibze kumutonga: Amucatongwibze ngo Mupango, kaveta ngo unyaxa.” (VaRoma 6:14) Waro, tingabesereka kudini ngo unyasha  hucikafaneri kuwana? Pauro wakananga kudari: ‘Ngo kuti unyasha hucikafaneri kuwana hwa Mwari . . . hunotijijisa kuramba zviro zvinosiyana no zvinodiwa ndi Mwari no zviemuro zvo nyika zve kuti tirarame no murangariro jakanaka, no urungami, no kuzvipira pakati po mugariro uno wo zviro.’—Tito 2:11, 12, Shanduro yeNyika Itsva.

7, 8. Zvinorevenyi kunanga kuti unyasha hucikafaneri kuwana hwa Jehovha ‘unovoneswa ngo njira jakasiyana-siyana?’ (Vonanyi pikica yo kutanga.)

⁷ Mupostori Pedhru wakatara kudari: ‘Mukuzwirana no mapuwihwe o cipo akaitwa umwe nga umwe, cishandisenyi pa kushandirana inga vavonereri vakanaka vo unyasha hucikafaneri kuwana hwa Mwari unovoheswa ngo njira jasiyana-siyana.’ (1 Pedru 4:10, Shanduro yeNyika Itsva) Zvinorevenyi kunanga kuti unyasha hucikafaneri kuwana hwa Jehovha ‘unovoneswa ngo njira jakasiyana-siyana?’ Zvinoda kureva kuti azvinenyi zvineso zvapi zvatingava nazvo mu upenyu, Jehovha anozotipa zvitinoda kuti ticungirire. (1 Pedru 1:6) Iyena nguva jese anozotipa zvatinoda kamare kuti tikwanise kunyisa cineso cimwe nga cimwe.

⁸ Mupostori Johani wakatara kudari: ‘Ngo kuti tese takaashira mu kukwana kwake, unyasha hucikafaneri kuwana pamusoro po unyasha hucikafaneri.’ (Johani 1:16) Zvecivoneka kuti Jehovha unyasha hucikafaneri kuwana ngo maitiro akasiyana-siyana, itusu tinoashira makomborero akawanda. Ngo api amweni akona?

9. Tinobeseraka kudini ngo unyasha hucikafaneri kuwana hwa Jehovha, zve tingakhombijisa kudini kubongejesera kwedu?

⁹ Jehovha anoregerera zvishaishi zvedu. Ngo kuva no nyasha jikifaneri, Jehovha anotiregerera zvishaishi zvedu. Asi iyena anozviita basi kudari tikakhauya zve toenderera mberi ticihwisana no zvido zvakashata. (Verenganyi 1 Johani 1:8, 9.) Mupostori Pauro wakasanangura kuna maKristu ngo pamusoro po maregerere akaita Jehovha zvishaishi zvavo. Iyena wakati: “[Mwari] wakatibvisa mu simba ro cidima, wotiambusa ku Umambo hwo Mwana wake wakadika, wo tinowana ruponeso mwaari: kukungurihwa ko uxaixi.” (VaKolosi 1:13, 14) Kubonga kwedu Mwari ngo unyasha hwake kwakakura zvokuti tinoda kumukuja. Zve ngo ndava yo kuti Jehovha wakaregerera zvishaishi zvedu, tinokwanisazve kuashira makomborero amweni mazinji akanaka.

10. Cicinyi catinaco wari ngo ndava yo unyasha hucikafaneri hwa Mwari?

¹⁰ Tingava no Ushamwari hwakanaka na Mwari. Itusu atizivi kukwana, ngo iyo ndava kubvira patakabahwa, tiri vavengi va Mwari. Asi Pauro wakananga kudari: “Inga mu mukuvo wo tainga vakorore, toviiraniswa na Mwari ngo njio yo kufa ko Mwana  wake.” (VaRoma 5:10) Ngo ndava yo muripo, itusu tingaviiraniswa na Mwari, kuda kureva kuti, tingava no runyararo naye tova shamwari jake. Pauro wakasanangura kuti zvondhozvo zvinozwirana kudini no unyasha ucikafaneri kuwana wa Jehovha paakananga kudari ecibvunja hama jake jo kuzojwa: ‘Wari, zvotanangwa kuti rakarungama ngo ndava yo rutendo, ngative no runyararo na Mwari ngo pamusana pa Tenji wedu Jesu Kristu, kubvira kwaari, ngo rutendo takanghwina mu unyasha hucikafaneri kuwana matiri wari.’ (VaRoma 5:1, 2, Shanduro yeNyika Itsva) Kubonga kwakadini kwatinako ngo kuva no ushamwari hwakanaka na Jehovha!

11. Vokuzojwa vari kuzisisa kudini “mabvuta amwenibze” ku urungami?

¹¹ Tingaguma pakuva vakarungama pamberi pa Mwari. Muphorofita Dhanyeri wakatara kuti mukati mo mukuvo wo kupejisira, “Vazivi,” kuda kureva vokuzojwa, vaizoviisa ‘vazinji ku bzakarurama.’ (Verenganyi Danieli 12:3.) Vokuzojwa vanozviitisa kudini zvondhozvo? Ivona vanocumaera masoko akanaka no kujijisa zviuru zvo “mabvuta amwenibze” mutemo ja Jehovha. (Johani 10:16) Ivona vanobesera kuva akarungama pamberi pa Mwari, zve izvo zvinokwanisika basi ngo ndava yo unyasha hucikafaneri kuwana wa Jehovha. Pauro wakasanangura kudari: ‘Vari kunangwa kuti vakarungama ngo ndava yo unyasha hucikafaneri kuwana hwake [Mwari] kubvira pa kusujunuhwa ngo muripo wakaripwa ndi Kristu Jesu, inga cipovo haco.’—VaRoma 3:23, 24, Shanduro yeNyika Itsva.

12. Kuita mukumbiro kwakabatana papi no unyasha hucikafaneri kuwana hwa Mwari?

¹² Tingaguma phedo na Mwari ngo mukumbiro. Ngo ndava yo unyasha hucikafaneri kuwana, tinokwanisa kuita  mukumbiro kuna Jehovha. Pauro wakadanija cigaro co umambo ca Jehovha kuva ‘cigaro co umambo co unyasha hucikafaneri kuwana,’ zve anotikoka kuti tikhwedere kociri no ‘rusujunuko hwo kuvereketa.’ (Vaheberi 4:16a, Shanduro yeNyika Itsva) Tingaita mukumbiro kuna Jehovha nguva iri yese ticishandisa Jesu. Zvikadi uwu rukujo hukuru! Pauro wakatara kudari: “Ndiyena, itisu tinokhwedera, ticingathyi, kuna Mwari ngo ndava yo kutenda.”—VaEfeso 3:12.

13. Unyasha hucikafaneri kuwana, ungatibesera kudini ‘pa nguva kwayo’?

¹³ Tingawana besero pa nguva kwayo kamare. Pauro wakativangisa kuti tiite mukumbiro kuna Jehovha pakandova no dikano ro kuzviita, ‘kuti titiitihwe unyasha zve tiitihwe unyasha hucikafaneri kuwana kuti tizobesehwe pa nguva kwayo.’ (Vaheberi 4:16b, Shanduro yeNyika Itsva) Tikandosongana no muejo kana matambujiko mu upenyu hwedu, tingadeketerera Jehovha kuti atibesere. Iyena anodavira mukumbiro jedu pikija acikadikani kuzviita. Anoshandisa hama no hambzaji jedu kuti jitibesere. Jehovha anodavira mukumbiro jedu kuti ‘tikwanise kunanga, ngo kugonda kwese, kuti: “[Jehovha] anondibesa, apana co ndinothya. Vangandiitira cinyi vandhu?”’—Vaheberi 13:6.

14. Unyasha hucikafaneri wa Jehovha unobesera kudini mwoyo jedu?

¹⁴ Tinotondhojwa ngo mwoyo jedu. I makomborero makuru kutondhojwa ndi Jehovha patinosongana no cineso. (Nduyo 51:17) MaKristu o ku Tesaronika paaiteverehwa, Pauro wakatara kudari: ‘Tenji wedu Jesu Kristu na Mwari Baba wedu, vakatida, vakatipa nyarajo icikaperi no vetero yakanaka ngo unyasha hucikafaneri kuwana, ngavanyaraje mwoyo yenyu no kumuvangisa.’ (2 VaTesalònika 2:16, 17) Zvokadi kamare zvinotondhoja kuziva kuti ngo unyasha hwake hucikafaneri kuwana, Jehovha anotida no kutikorondha!

15. Ngo ndava yo unyasha hucikafaneri wa Mwari, vetero yapi yatinayo?

¹⁵ Tino vetero yo upenyu hucikaperi. Zvecivoneka kuti tiri vashaishi, atina vetero pacina besero ra Jehovha. (Verenganyi Nduyo 49:7, 8.) Asi Jehovha wakatipa vetero inodakajisa. Ngo yapi? Jesu wakati: “Kuda kwa Baba wangu nga uku: kuti wese anovona Mwana no kumutenda, ave no uhomi [kana upenyu] hucingaperi. Ininivo ndinozomumusa ko vakafa pa njiku yokupejisira.” (Johani 6:40) Ngo kudaro, tino vetero yo kurarama kwenda no kwenda ngo ndava yo unyasha hucikafaneri kuwana hwa Jehovha. Pauro wakati: “Unyaxa hwa Mwari hwakajivonesa kuti vandhu vese vaponeswe.”—Tito 2:11.

16. MaKristu amweni o kutanga aidheereresa kudini unyasha hucikafaneri kuwana hwa Mwari?

¹⁶ Tinoashira makomborero akawanda maningi ngo ndava yo unyasha hucikafaneri kuwana hwa Jehovha. Asi, atidikani kudheerera unyasha hwake, kuda kureva, kuhucinja kuva thangwe kuitira kushaisha. Pakati po maKristu o kutanga, kwainga no vamweni vaieja ‘kucinja unyasha hucikafaneri wa Mwari kuti vazvipembeje kuita mufambiro wakashata.’ (Juda 4, Shanduro yeNyika Itsva) Zvaivoneka inga kuti maKristu aya o kutama kugondeka airangarira kuti iwona aikwanisa kushaisha zve Jehovha  waizoregerera nguva jese. Iwona aitoeja kubatanijavo maKristu amweni mu zvishaishi zvavo. Nyamasivo mundhu anoita kudaro ‘anocamwisa mujimu wo unyasha hucikafaneri kuwana.’—Vaheberi 10:29, Shanduro yeNyika Itsva.

17. I mbhangiro yapi yakavanga yakapa Pedhru?

¹⁷ Sathana ari kucengeja maKristu amweni nyamasi uno kuti arangarire kuti angaita hao zvishaishi zve kuti Jehovha anozovaregerera pikija vacikaiti cise kuti varegerehwe. I zvokadi kuti Jehovha anoda kuregerera vashaishi vanokhauya; asi, anovetera kuti tihwisane no zvidisiso zvedu zvo kushaisha. Jehovha wakafemera Pedhru kuti atare kudari: “Ngo ndava yabzo, hama jokudikana, makangwajwa kare. Ngwaranyi, mucadokwevehwa ku uposi hwo vaxaixi, mowa pasi. Kuranyi mu unyaxa, no kumuziva Tenji wedu no Muponesi Jesu Kristu.”—2 Pedru 3:17, 18.

18. Ngo ndava yo unyasha kucikafaneri kuwana hwa Jehovha, mabasa api otinawo?

¹⁸ Tinobonga maningi ngo unyasha hucikafaneri kuwana hwa Jehovha. Ngo kudaro, tinodikana kushandisa zvipo zvedu pa kureremeja Jehovha no kubesera vamweni. Iro i zigava ratinaro kwavari. Tingashandisisa kudini zvipo zvondhozvo? Pauro wakati: “Ndibzo, ticiva no bzipo bzakasiana, ngo kuteveja unyaxa hwotakapuwa, . . . ndiani ana cipo co kuxandira, ngaaxandire. Ndiani ano cipuo co kujijisa, ngaajijise. . . . Ndiani anoita mabasa o unyaxa, ngaabziite ngo kudakara.” (VaRoma 12:6-8) Ngo ndava yo unyasha kucikafaneri kuwana hwa Jehovha, tino mutoro wo kushanda ngo simba mu mushando, kujijisa vamweni Bhaibheri, kuvangisa hama jedu no hambzaji, no kuregerera ari wese anotikhugunya.

19. I basa rapi roticazojija pa musoro unotevera?

¹⁹ Kudari inga vaya vakakomborehwa ngo unyasha hucikafaneri kuwana hwa Jehovha, tinodikana kuva no cido kushanda mbhera panoperera simba redu ‘kuti tiite ucapupu hwo masoko akanaka o unyasha hucikafaneri kuwana Mwari.’ (Maitiro o Vapostori 20:24, Shanduro yeNyika Itsva) Tinozopopora basa iri pa musoro unotevera.