1. Musiyano wapi uripo pakati po zvoticikadikani kutama no zvotinoda?

KUNO zviro zvishoma basi zvonodiwa kuti tirarame. Inga muezaniso, atidikani kutama zvokuha, zvokusimira no pokugara. Asi kuna zviro zvakawanda maningi zvotingada. Zve vandhu vazinji avazvizivi kamare kuti azvidikani maningi zviro zvese izvo zvovanoda waro.

2. Ngozvapi zviro zvimweni zvinodiwa ngo vandhu?

² Mundhu anorarama mu nyika ino urombo angada zviro zvakasiyana kamare no zvinoda mundhu anoraramira mu nyika yakakhupuka. Mu mativi amweni o nyika, vandhu vaizoda kuva no foni, mota, kana ndau yo kuvaka. Mu ndau jimweni, vandhu vanoda kuva no nguvo jakawanda jokudhura, nyumba huruwane, kana zvifambiso zvakawanda zvokudhura. Asi, azvinenyi kuti tinoraramira kwapi kana tino mare yakawanda zvakadini, tingatanga kuda zvizinji kubatanija no zviro zvizinji zvaticina dikano yo kuva nazvo kana zvoticikakwanisi kutenga.

3. I cinyi kudisisa upfumi?

³ I cinyi kudisisa upfumi? I murangariro wo mundhu anobatikana maningi ngo pamusoro po zviro zvo kunyama kupinda ushamwari hwake na Mwari. Iyena aakwani ngo kuva basi no zvinodiwa, asi iyena anondoda zvizinji nguva jese. Pikija vaya vacina mare yakawanda kana vaya vacikatengi zviro zvinodhura, vangaguma pa kudisisa upfumi. Ivona vangaregera kudira Umambo pa kutanga.—Vaheberi 13:5.

4. Sathana anoshandisisa kudini “ruyemuro hwo majiso”?

⁴ Sathana anoda titende kuti tinowana mudakaro basi ngo kuva no zviro zvakawanda. Ngokudaro iyena anoshandisa nyika yake no “ruyemuro hwo majiso” kuti aeje kutiita kuti tide kuva no zvakawanda nguva jese. (1 Johani 2:15-17; Genesi 3:6; Mazwi Akangwara 27:20) Nguva jese tinovona no kuzwa zviro zvipsa zvecimimihwa kuitira kutikhohwesa kuti tizvitenge. Makatenga ciri cese mu bazari ngokuti makacivona kuti cakaseja maningi kana kuti makacivona cecitokoteswa here? Kudari makatenga, kangaije makavona kuti ciro ici amucaicidepi. Potinogara ticitenga zviro zvoticikadi, tinonga tecinesa upenyu hwedu. Zviro izvo zvingatikangaija pa kushandira Jehovha. Inga muezaniso, tingatokonehwa kuva no nguva inokwana yo kuita jijo yo Bhaibheri, kunasirira musongano no kuenda kosonganira, no yo kuenda kocumaira nguva jese. Rangariranyi kuti mupostori Johani wakangwaja kudari: “Nyika yo pasi no madisiro ayo bzinopera.”

5. Zvicinyi zvingaitikira vaya vanoshandisa maningi simba ravo kuti vawane zvizinji?

⁵ Sathana anoda kuti tishandise simba redu kuti tiwane mare zinji no zviro zvakawanda kunja ko kurishandisira kuna Jehovha. (Mateu 6:24) Asi kudari tinodakarira kuzviwanira zviro zvizinji basi, upenyu hwedu hunozova hucina cinangwa. Tinozoperehwa ngo cokuita kana kuva no zvineso zvo mare. Kana mukushatisisa, tingazoruza gonda redu kuna Jehovha no Umambo hwake. (1 Timoti 6:9, 10; Apokalipsi 3:17) Jesu wakananga kuti “kuemurira bzizinji” kwakaezana no muzwa jinopingaija mbeu kuti icadoreba no kubara mucero.—Marco 4:14, 18, 19.

6. Cijijo capi cotinojija ndi Bharuki?

⁶ Rangarijanyi basi ndi Bharuki, mutari wo muphorofeta Jeremia. Bharuki paakatanga ‘kujipsakira bziro bzikuru,’ Jehovha wakamuceuja kuti Jerusarema rinozoparajwa sasambi. Asi wakagondesa Bharuki kuti waizoponesa upenyu hwake. (Jeremia 45:1-5) Bharuki aacaidikanepi kuveterazve ciro cimwenizve. Jehovha aacaizosiya kuparaja zviro zvo vandhu. (Jeremia 20:5) Nyamasi uno, tiri kurarama phedo no kumagumo ko nyika ino ya Sathana. Ngokudaro, wari asipizve nguva yo kugara ticindopsaka zviro zvakawanda. Zve atidikani kuvetera kuti pa kupera ko dambujiko guru, tinozoramba tino zviro zvotinazvo wari, pikija zvecisisira maningi kwatiri.—Mazwi Akangwara 11:4; Mateu 24:21, 22; Luka 12:15.

7. Ngozvapi zvoticada kujija zve ngenyi?

 ⁷ Waro, tinodikana kujisapota kudini no mbhuri yedu zve toramba takabatikana pa zvinosisira maningi mu upenyu? Tingatizisa kudini kudisisa upfumi? Zve ngenyi atidikani kuthya maningi ngo pamusoro po kuwana zvotinotama? Jesu wakatipa mbhangiro yakanaka pa Hurukuro yake yo pa Dundhu iyi. (Mateu 6:19-21) Ngativerenge no kubhuisana ngo pamuso pa Mateu 6:25-34. Izvi zvinozotikhohwesa kuti tinodikana kuramba ticipsaka Umambo, kuciripi zviro.—Luka 12:31.

8, 9. (a) Ngenyi atidikani kuthimwa-thimwa maningi ngo ndava zvinodiwa zvedu? (b) Jesu waizivenyi ngo pamusoro po vandhu no zvinodiwa zvavo?

⁸ Verenganyi Mateu 6:25. Jesu waiziva kuti vajiji vake vaithya ngo ndava yokuti vaizohenyi, vaizomwenyi zve vaizosimirenyi, ngokudaro, pa Hurukuro yake yo pa Dundhu, wakavabvunja kudari: “Mucathimwa-thimwa ngo maponero enyu.” Jesu waida kuvabesera kuzwisisa kuti ngenyi avacaidikanepi kukaya-kaya ngo ndava yo zviro zvese izvi. Iyena waizviziva kuti kudari vakaya-kaya maningi, pikija ngo zvinodiwa zvavo kamare, ivona vaizokanganwa zviro zvinosisira maningi mu upenyu. Jesu waitaja maningi vajiji vake zvokuti wakavangwaja karongomuna ngo pamusoro po ngozi iyi pa hurukuro yake.—Mateu 6:27, 28, 31, 34.

⁹ Waro, ngenyi Jesu wakatibvunja kuti titame kuthimwa-thiwa ngo ndava yokuti tinozohenyi, kana tinozomwenyi, kana tinozosimirenyi? Kureva kuti atidi zvokuhwa no zvokusimira here? Tinozvida! Tikatama mare yo kutenga zviro izvi, kazinji tingatokaya-kaya. Jesu waizviziva izvo. Iyena waiziva zvinodiwa zvovandhu. Zve waiziva kuti “pa njiku jokupejisira,” vajiji vake vaizorarama mu mukuvo unonesa maningi. (2 Timoti 3:1) Zvokadi kamare, vandhu vazinji avaripi kuwana basa zve zviro zviri kuramba zvicidhura maningi. Mu ndau zinji, vandhu vari varombo maningi zve vano zvokuha zvishoma kana avatona zvokuha. Asi Jesu waizivazve kuti upenyu hwo mundhu hunosisira maningi kunyisa cokuha, no muviri kunyisa nguvo.

10. Jesu paakajijisa vateveri vake kukumbira, wakananga kuti icinyi cinodikana kusisira maningi pa upenyu hwavo?

¹⁰ Pakutanga, Jesu wakajijisa vajiji vake kuti povaizoita mukumbiro, vaidikana kukumbira Baba wavo vo mugore kuti vavape zvinodiwa zvavo. Vaizokumbira kudari: “Tipenyi zuva rino kuha kwedu kunotamija nyamasi.” (Mateu 6:11, BMAA) Nguva imweni wakavabvunja kuti vakumbire kudari: ‘Tipenyi zvokuha zvedu zva nyamasi mukuzwirana no zvinodiwa zvo zuva ngo zuva.’ (Luka 11:3, Shanduro yeNyika Itsva) Asi izvo azvinangi kuti tinodikana kurangarijisisa nguva jese ngo pamusoro po zvotinotama. Kunasa kunanga, Jesu wakabvunja vateveri vake kukumbira kuti Umambo hwa Mwari huviye ndi  ciro cinosisira maningi kupinda kukumbirira zvinodiwa zvavo. (Mateu 6:10; Luka 11:2) Kuitira kubesera vajiji vake vatame kukaya-kaya, Jesu wakazovatondhoja ngo kuvaceukija makorondhere aanoita Jehovha zvisikwa zvake zvese.

11, 12. Tinojijenyi ngo matajiro aanoita Jehovha shiri jo mugore? (Vonanyi pikica yo kutanga.)

¹¹ Verenganyi Mateu 6:26. Tinodikana ‘kuringisa xiri jo nyezuru.’ Pikija hazvo shiri i zvisikwa zvidoko, ijona jinoha maningi. Zvokadi kamare, shiri noyaikura kuezana no mundhu, yaizoha zvokuha zvakawanda kupinda zvinoha mundhu. Shiri jinoha mucero, mbeu, matoto no honye. Asi ajisimi mbeu nee ajikurisi zvokuha zvajo. Jehovha anopa zvinodiwa zvajo zvese. (Nduyo 147:9) Zvokadi kamare, iyena aapakisi shiri zvokuha! Ijona jinodikana kuenda kozvipsaka, asi zvokuhezvo zviriyo kuti jizviwane.

¹² Jesu aacaikana-kana kuti kudari Baba wake vanokorondha shiri, ivona vanozokorondhavo vandhu. (Vonanyi masoko o kupejisira.) (1 Pedru 5:6, 7) Mukuezana no shiri, atidikani kuita umbhwa kana nungo. Tinodikana kushanda ngo simba pa kurima kana kutenga zvokuha. Jehovha angakomborera kuvangisira kwedu. Zve potinonga ticina mare kana zvokuha zvakakwana, iyena angavepo kuti atipe zvotinotama. Inga muezaniso, vamweni vangatipavo zvovanazvo. Jehovha anopazve shiri ndau yo kugara. Iyena wakajiita kuti jikwanise kuvaka shaki kana njanja, zve wakaita zvojinoshandisa kuti jivake shaki kana njanja. Mu njira yakaezana, Jehovha anokwanisa kutibesera kuti tiwane ndau yakanaka yokuti mbhuri yedu igare.

13. Zvicinyi zvinotatija kuti tino mutengo mukuru kupinga shiri jo mugore?

¹³ Naapera kuceuja vajiji vake kuti Jehovha anopa zvokuha shiri, Jesu wakavabvunjisa kudari: “Imwimwi amuripi vakuru na ijona kani?” (Ezanisanyi na Luka 12:6, 7.) Paakabhuya izvi, zvinoita inga kuti Jesu wairangarija ngo mapire aaizoita upenyu hwake kuitira vandhu vese. Hina, Jesu aazivi kufira shiri kana zvinyama zvimweni. Iyena wakafira itusu kuitira kuti dangani tingazowana upenyu hucikaperi.—Mateu 20:28.

14. Mundhu anothimwa-thimwa aazokwanisi kuitenyi?

¹⁴ Verenganyi Mateu 6:27. Jesu waida kunangenyi paakananga kuti atikwanisi kunyengejera kureba ko upenyu ngo kuthimwa-thimwa? Iyena wainanga kuti atikwanisi kurebesa upenyu hwedu ngo kukaya-kaya ngo pamusoro po zvidiwa zvedu. Kudari tikaneseka mu murangariro, tingazowana ndhenda zve pikija kuzotofa.

15, 16. (a) Tinojijenyi ngo matajiro aanoita Jehovha maruva o mu bani? (Vonanyi pikica yo kutanga.) (b) Mubvunjo japi jotingadikana kuzvibvunjisa zve ngenyi?

¹⁵ Verenganyi Mateu 6:28-30. Tinodakara potinonga tino cokusimira cakanaka, maningi-ningi potinoenda kocumaira kana ku musongano no ku magungano edu. Waro, tinodikana ‘kuthimwa-thimwa . . . ngo bzokusimira’? Jesu wakaceujazve vajiji vake ngo matajiro aanoita Jehovha zvisikwa zvake. Jesu wakashandisa muezaniso wo “maruva o mu bani.” “Maruva” akadari inga gladíolo, jacintos, íris, no tulipas. Apana na rimwe rawo rinozvisonera nguvo. Asi iwona akaseja zvokuti Jesu wakananga kuti “Soromona, mu goja rake rese, aazivi kusimira kudari inga rimwe raro”!

 ¹⁶ Rangariranyi kuti Jesu wakazonanga kudari: “Kudari Mwari ecisimija kudaro mauxwa o mu bani, . . . anozotamisa kudini kupa bzizinji komuri, vandhu vokutenda padoko?” anozotipadi kamare zvotinotama! Asi vajiji va Jesu vaitama gonda. (Mateu 8:26; 14:31; 16:8; 17:20) Ivona vaidikana kugonda kuti Jehovha waida kuzovasapota zve iyena waizovasapotadi kamare. Tingati kudini ndisuvo? Tinotenda kuti Jehovha anozotitaja here?

17. Icinyi cingadira pa ngozi ushamwari hwedu na Jehovha?

¹⁷ Verenganyi Mateu 6:31, 32. Vaya vacikamuzivi Jehovha vanobatikana mu upenyu hwavo pa kupsaka mare yakawanda no zviro zvakawanda. Asi kudari taizoitavo zvondhozvo, taizodira pa ngozi ushamwari hwedu na Mwari. Tinoziva kuti Jehovha ndi Baba wedu zve iyena anotida. Zve tinothemba kuti kudari tikaita zvaanotikumbira no kudira pa kutanga Umambo hwake mu upenyu hwedu, iyena anozotipa zvese zvotinotama no kutinyengejerera zvizinji. Tinozivazve kuti ushamwari hwakanaka na Jehovha ngohunozotiita kuti tidakare maningi zve hunotidesera kuti tikwaniriswe ngo kuva basi no “bzokuha no bzokusimira” zvotinodisisa.—1 Timoti 6:6-8.

18. Ngozvapi zvaanoziva Jehovha ngo pamusoro po umwe na umwe wedu, zve anozotiitirenyi?

¹⁸ Verenganyi Mateu 6:33. Kudari tikadira Umambo pa kutanga mu upenyu hwedu, Jehovha anozotipa zvinodiwa zvedu zvese. Jesu wakasanangura kuti ngenyi tingathembadi cigondiso ici. Iyena wakati: “Baba wenyu vo mugore vanoziva bzo munoda.” Jehovha anoziva zvomunotama pikija mucito marangarira kuti ndiri kuda cakati. (VaFilipi 4:19) Iyena anoziva mufumbo wo nguvo jotinozoda. Iyena anozivazve mukhaindi vo zvokuha zvomunozoda. Zve anozivazve ndau yomunozoda kugara no mburi yenyu. Jehovha anozova no gwinyiso ro kuti muwane zvinodiwa zvenyu.

19. Ngenyi atidikani kuthimwa-thimwa ngo zvinozoitika kumbeji kwedu?

¹⁹ Verenganyi Mateu 6:34. Jesu wakabvunjazve vajiji vake kudari: ‘Mucathimwa-thimwa.’ Jehovha anozotipa zvotinotama njiku ngo njiku. Ngo kudaro, atidikani kuthimwa-thimwa maningi ngo zvinozoitika kumbeji kwedu. Kudari tikathimwa-thimwa, tingatanga kujithemba, zvotiita kuti tive pa ngozi yo kuruza ushamwari hwedu na Jehovha. Kusiyapo izvi, tinodikana kumugonda ngo mwoyo wese.—Mazwi Akangwara 3:5, 6; VaFilipi 4:6, 7.

20. (a) Cicinyi camungadadamira mu basa ra Jehovha? (b) Ngozvapi zvomungaita kuti mureruse upenyu hwenyu?

²⁰ Zvaizova zvinosuruvarisa maningi kudari taizotama simba ro kushandira Jehovha ngo kuti takaripejera pa kueja kupsaka zviro zvo kunyama. Kusiapo izvi,  tinodikana kushandira Jehovha mbhera panoperera simba redu. Inga muezaniso, mungathutha kuenda koobesera ungano ino vacumaeri vashoma here? Mungaita mu piyona here? Kana kudari maa mupiyona, makarangarira ngo kuita cikumbiro co kuenda Cikora co Vabvangeri vo Umambo here? Mungapeja njiku nganani pa bviki mucibesera ku Bheteri kana ku hofisi yo kusanduja here? Kana kangaije mungava muzvipiri wo Departamento de Projeto/Construção Local (bauhwa ro urongwa hwo kuvaka) mucishandisa divi ro nguva yenyu pa kubesera pa kuvakwa ko Nyumba jo Umambo. Rangariranyi ngo zvomungaita kuti mureruse mararamiro enyu kuitira kuti muwane nguva zinji no simba kuti muite mabasa o Umambo. Bhokiso rinoti “Marerusiro Omungaita Upenyu Hwenyu” rinopa mazano amweni. Kumbiranyi Jehovha kuti amubesere kuita zvomunoda kuita. Perapo tanganyi kuita cinjo jinodiwa.

21. Icinyi cinozomubesera kuti mukhwedere phedo na Jehovha?

 ²¹ Jesu wakatijijisa kuti tipsake Umambo pa kutanga. Tikadaro, atizokayakai maningi ngo pamusoro po zvinodiwa zvedu. Tinokhwedera phedo na Jehovha ngokuti tinogonda kuti iyena anozotisapota. Tinojijira kujibata zve atizotengi ciri cese cotinoemura kana cinobudiswa ngo nyika, nee tecitokwanisa kucitenga. Kudari tikarerusa upenyu hwedu wari, zvinozotibesera kuti tirambe takagondeka kuna Jehovha zve kuti ‘tizowane uhomi [kana upenyu] hwokadi-kadi’ hwaakatigondesa.—1 Timoti 6:19.