Ciphorofeti ico cakanangazve kuti vaya vaizonamata Mwari pa njiku jo kupejisira vaizobatana inga mundhu umwe.

Jehovha wakabvunja muphorofeti wake Ezekieri kuti atare pa ndonga mbiri. Waidikana kutara pa ndonga imwe kuti, ‘Ngo ya Juda, no yovana vaIsraeri vanaye,’ pa ndonga imweni kuti, ‘Ngo ya Josefa, ndonga ya Efraimu, no yo nyumba yese yaIsraeli, vese vanaye.’ Ndonga mbiri iji jaizoita “imwe” mu nyara ja Ezekieri.—Ezekieli 37:15-17, Baiberi Mazwi Akacena aMwari.

 Soko rokuti “Efraimu” rinonangenyi? Ukama hwa Efraimu hwaenga no nduma maningi pa gumi ro ukama hwo umambo hwa Iziraeri hwo kanjikazi. Zvokadi kamare, mambo wokutanga kutonga umambo uhwo, Jerobhoamu, wakabva mu ukama hwa Efraimu. (Deuteronòmio 33:13, 17; 1 Majimambo 11:26) Ukama hwondhoho hwakabva ka Efraimu, mwana wa Josefa. (Bzviverengo 1:32, 33) Josefa wakapuwa makomborero akanakisisa ndi baba wake, Jakobe. Ngokudaro, zvaifanera kuti ‘ndonga ya Efraimu’ iyimirire gumi ro ukama hwo umambo hwo kanjikazi. Pa 740 o makore Kristu acito waviya, kare kamare Ezekieri acito waphorofeta, vaAsiria vakanyisa umambo hwo Iziraeri hwo kanjikazi no kutora vandhu kovaita shoko. (2 Majimambo 17:6) Makore akazotevera, vaBhabhironi vakazonyisa vaAsiria. Ngokudaro, Ezekieri paakatara uphorofeti uhu ngo pamusoro po ndonga mbiri, vazinji vo vaIziraeri vaenga vakaparajika mu Umambo hwese hwo Bhabhironi.

Mu gore ro 607 Kristu acito waviya, vaBhabhironi vakanyisa umambo hwo ukama huviri hwa Judha hwo kakusi no kuvatora kuenda Bhabhironi. Ivona vakatoravo ari wese wakasara mu umambo hwa Iziraeri hwo kanjikazi. Majimambo o umambo hwo kanjikazi aibva mu ukama hwa Judha. Vapiri vairaramavo mu Judha ngokuti vaishandira ku temberi mu Jerusarema. (2 Kronike 11:13, 14; 34:30) Ngokudaro, zvaifanera kuti ndonga yaengaya ‘ya Juda’ iyimirire ukama huviri hwo umambo hwo kakusi.

Ndonga mbiri jakabatanijwa rini? Izvi zvakaitika mu gore ro 537 Kristu acito aviya, pakahwirira vaimiriri vo umambo hwo ka kusi no vo umambo hwo kanjikazi ku Jerusarema kubva mu ushoko kuti vavakise temberi. Jinja ra Iziraeri raenga ricikazivizve kuparajana. VaIziraeri vakanamatazve Jehovha novari vese pamwe. (Ezekieli 37:21, 22) Kubatana uku kwakanangwazve ngo vaphorofeti Isaia na Jeremia.—Isaia 11:12, 13; Jeremia 31:1, 6, 31.

Uphorofeti hwa Ezekieri hwakanangenyi ngo pamusoro po kunamata kwakacena? Hwakananga kuti Jehovha anozoita kuti vese vanomunamata ‘vanozoita umwe.’ (Ezekieli 37:18, 19, BMAA) Cipikihwa ici ciri kukwanirisika mu mukuvo uno? Hina. Ciphorofeti ici cakatanga kukwanirisika mu gore ro 1919. Zvicito zvaitika, Sathana wakaeja kuparajanisa vandhu va Mwari mbhera narini. Asi mu gore ro 1919, vaenga vorongeswa padoko ngo padoko no kubatanijwa.

Pa mukuvo wondhowo, vandhu va Mwari vaenga no vetero yo kuva majimambo no vapiri kumatenga na Jesu. (Apokalipsi 20:6) Ivona vaiezana no ndonga ya Judha. Asi, kwaenga no vashoma vaenga no vetero ro kurarama kwenda no kwenda pasi pano. Pa kufamba ko nguva, vaya vaenga no vetero iyi vakazonyengejereka maningi. (Zakaria 8:23) Ivona vaiezana no ndonga ya Josefa.

Nyamasi uno, zvikwata zviviri izvi zviri kushandira Jehovha no zvakabatana. Zve zvina Mambo umwe, Jesu Kristu. Pa ciphorofeti ca Ezekieri, Jehovha wakanangira Jesu kuti ndi “Davidi muranda wangu.” (Ezekieli 37:24, 25) Jesu wakaita mukumbiro kuna Baba wake ngo pamusoro po vajiji vake kudari: “Kuti vave [umwe], kudari inga imwimwi, Baba, muri kondiri, na ininivo komuri.” * (Vonanyi masoko o pasi.) (Johani 17:20, 21) Jesu wakanangirazve mushambi wake mudoko wo vajiji kuti “vanozova . . . muxambi umwe” no ‘mabvuta amweni.’ Ese aizotevera “muhavisi umwe.” (Johani 10:16) Kudari ngo zvakananga Jesu, vandhu vese va Mwari vakabatana nyamasi uno, azvinenyi kuti vanozorarama kumatenga kana pasi pano!